Miniminkihpene Amwail Pakairkiseli nan Sampah Pwon Duwen Kapokon en District me Oaralape Mahsanih “Idawehn Krais!”
Sounkalohk kan Pahn Pwurehng Kihpeseng Kisin Doaropwe Tohrohr Ieu
1 Nan pahr teio doadoahk en luhk tohrohr ieu wiawihier pwehn pakairkiseli nan sampah pwon duwen kapokon en District ieu me oaralape iei “Kamaiauparail leledohr!” Kapokon en District wet wiahier mehn sawas kehlail ieu ohng irail akan me kin perenki rong padahk mehlel. Irail akan me alehdahr luhk tohrohr wet oh kohdohngehr kapokono, ehdin arail kehn duwen kamadipw en mwengehn ngehn akan me kin mih rehn Sounkadehdehn Siohwa kan. (Aiseia 65:13) Irail kin perenki iang patalahng riatail Kristian limpoak oh minimin akan. (Melkahka Kan 133:1) Pwehn kak sawas uwen tohtohn aramas koaros me kak en iang towehda Kapokon en District me oaralape “Idawehn Krais!” kitail pahn pil pwurehng iang kihpeseng nan wasa koaros nan sampah kisin doaropwe tohrohr ieu.
2 Pweidahn kan nan Pahr Teio: Sang ni ripoht kan me alahldi sang wasa koaros nan sampah, re kasalehda me imwilah inenen sikla mwahu ieu wiawihier pwehki doadoahk en pakairkiseli duwen Kapokon en District me oaralape “Kamaiauparail leledohr!” ah wiawio. Nan wasa tohto, rohng kaselel kan kin kohda me pid kapokono. Karasepe, nan ehu kahnimwo, nuhspehpa ieu ntingihada artikel ieu me reireiki column-weneu me pid duwen doadoahk en pakairpen kapokono me koasoia: “Pwe aramas koaros en kak alehdi kairo ni erein ahnsou me anahn, Sounkadehde kan kin pil kihong irair en karuwaru tohrohr ong arail kihseli luhk kan ohng mehn mparail akan—irail kin kareireila arail awahn kihseli doaropwe kan, alu reirei sang me re kin kalap wia, oh sohte koasoakoasoi reirei ohng aramas akan.” Koasoandi kaselel wet me wiawi ni kihpeseng en doaropwehn luhk pwukat kin kamwakidada madamadau en irail soun wia nuhs akan nan kahnihmw me kerendohng wasa me doadoahko wiawi ieu, oh irail pil wiahda nuhs en doadoahko. Nuhspehpa siluh, oh e pil kakete tohtohsang, me ntingihada koasoipen doadoahk en kihseli luhk kan, mwohn kapokono ah wiawi. Emen soun ntingihada nuhs wiahda rohng me audehda doaropwe reirei sang pali riau nan nuhs en Rahn Sarawi. E kin oaritikiada duwen atail pwoson, oh atail minimin en wia pirien ehu, oh pil duwen doadoahk en kihseli doaropwehn luhk, oh pil duwen kapokono. Ni ahnsou me emen sounkalohko kihla doaropwehn luhko ni ehu ihmwo, ah tohnihmwo eri sopukala ah koasoi oh nda: “Ei. I wadekehr men nan doaropwehn nuhso!” Emen pil tohnihmw pa werikihla: “I ahpwtehn wadewadek duwen kumwail oh me iet kumwail! Iei nei luhken men?” Lih menet eri kapatahiong nda: “Met wia soahng mwahu iei me Sounkadehdehn Siohwa kan en kin wiewia.”
3 Aramas tohto me perenki rong kan kin kohdohng wasahn kapokono oh wa neirail doaropwehn luhk kan nan pehrail. Ekei irail me men rong kan kin dakehdo sidohsa sang kahnihmw doh kan pwe ren iang rong padahk kan. Atail poaden doadoahk en luke mehteikan me kahrehda aramas tohto en kin iang towehda kapokon, oh ehu kahnimwo tohtohkihla 27% sang kapokon en pahr en mwowehu.
4 Idipek en Doadoahk nan Wasahn Kalohk: Ke pahn kakehr tepida kihkihpeseng doaropwehn luhk kan, wihk siluh mwohn amwail rahn en kapokono. Kitail en wia soahng koaros me kitail kak pwe kitail en kak kanekehla wasahn kalohk me kilelediong atail mwomwohdiso. Ohng mwomwohdiso me laud arail wasahn kalohk, sounkalohk kan kak kihdi doaropwehn luhk ni ihmw sou lipilipil akan me sohte towe, ni keimwiseklahn wihk mwohn kapokono. Mwomwohdiso kan en nantiong kanekehla oh kihpeseng doaropwehn luhk koaros me kihong irail oh pil kanekehla uwen wasahn kalohk koaros me kohieng irail uwen me kak. Doaropwe me tohtohsang uwen me mehteikan kak kihla, ah en kohieng irail pioneer en nan amwail mwomwohdiso kan en uhd doadoahngki.
5 Dahme Ke Pahn Nda: Ke kak nda duwe met: “Se kin patehng sampah pwon en kihpeseng luhk wet ohng wiewia kesempwal ieu. Met noumw doaropwe. Ke pahn kak wadek oaritik kan nan doaropwehn luhk wet.” Koasoi mwotomwot pahn sewesei iuk ken kanekehla wasa laud. Ni mehlel, ma mie en tohnihmw peidek, ke dehr karuwaru oh sapengirailla. Wasa kan me aramas kasalehda me re men rong, ntingihdi ederail oh pwurala rehn emen emen irail ni ahnsou mwadang.
6 Ia uwen kesempwal kitail en nantihong idawehn Krais! (Sohn 3:36) Atail kapokon me kohkohdo pahn sewese aramas koaros me pahn iang towehda kan en wia met. Ni mehlel kitail pahn kak kasik me lapalahn kalohk oh kadehde pahn pwurehng wiawi pwehki minimin utuht ohng wia pakairpen Kapokon en District me oaralape “Idawehn Krais!” Kahrehda ken ngoang nan doadoahk en luke uwen tohtohn aramas me kak towehda koaros. Sapwellimen Siohwa kapai laud en ieiang omw doadoahk nin doken omw iang wiewia doadoahk wet me pahn wiawi sampah pwon.