Ihs me Pahn Perenki Met?
1. Ni atail wadek neitail Kahn Iroir de Awake!, dahme kitail anahne medewe oh dahme kahrehda?
1 Kahn Iroir oh Awake! (lokaiahn wai) kin wiawihda ong aramas koaros nin sampah. Kahrehda, audepe kan kin koasoia soangsoangen oaralap kan. Ni atail kin wadek ehuehu ire nan neitail makasihn, kitail anahne medemedewe soangen aramas dah kan me pahn perenki wadek ire wet oh song kihong irail.
2. Soangen oaralap dah kan nan neitail makasihn me ekei aramas pahn perenki wadek?
2 Kahn Iroir kapwo kin kasalehda ehu oaralap en Paipel me kowe oh emen iengomw tohndoadoahk koasoia rahn teio? Mie ire me pid mouren peneinei me pahn kak sewese emen kisehmw? Mie me ke ese me pahn seiloaklahng ehu sahpw me ehu ire nan Awake! koasoia? Mie ehu makasihn me pahn mwahu ong ekei pesines de pali en koperment kan nan omw wasahn kalohk? Karasepe, makasihn ehu me kasalehda kahpwal kan me lih akan kin lelohng me pahn mwahu ong pwihnen lih akan nan sapwarail. Mwein palien kakehlaka kosonned pahn perenki wadek makasihn me koasoia duwen kauwehla kosonned.
3. Koasoia dahme wiawi me kasalehda katepen kihla makasihn kan ong irail kan me kitail medewe pahn perenki wadek ehu ire me mi loale.
3 Imwilahn Met: Mwurin ehu pwopwoud nan palieir en Aperika alehdi Awake! en October 2011 (lokaiahn wai) me koasoia “Ia Duwen Kakairada Seri Koahiek,” (How to Raise Responsible Children), delepwohnlahng wasahn sukuhl 25 nan ara wasahn kalohk. Wasa 22 alehdi makasihno oh kihong neirail tohnsukuhl kan. Pil ehu pwopwoud nan sahpwo medewehda soahngohte oh kihla makasihno ong wasahn sukuhl kan nan ara wasahn kalohk. Sounpadahk kan en ehu wasahn sukuhl ko pilada en doadoahngki makasihno ahnsoun sukuhl. Pwopwoudo ehukihong emen sounapwalih me kin seiloak dahme ira wia. E uhd kangoange mwomwohdiso kan ren kohla wasahn sukuhl kan nan arail wasahn kalohk. Ohpis en Sounkadehdehn Siohwa kan nan wasao alehdi pekipek tohto ong makasihn wet kahrehda re anahne pwurehng wiahda makasihno!
4. Dahme kahrehda kitail men kihong aramas tohto makasihn pwukat ni uwen me kitail kak?
4 Neitail makasihn kan kin koasoia kahrepen soahng pwukat kin wiawi, dahme kitail sukuhlki sang mepwukat oh pil kin sewese aramas ren kilanglahng Paipel oh Wehin Koht. Makasihn pwukat kelehpw me kin “pakairki duwen” komourala. (Ais. 52:7) Kahrehda kitail men kihong aramas tohto makasihn pwukat ni uwen me kitail kak. Ahl me mwahu en wia met iei ni omw pahn idek rehmw, ‘Ihs me pahn perenki met?’