Alasang Soukohp akan—Soel
1. Ia duwen atail kak alasang ahn Soel aktikitik ni atail kin kalohk?
1 Ihs soukohp Soel? E kin kasalehda me ih “nein Petuel.” (Soel 1:1) Soukohp aktikitik menet kin kesempwalki sapwellimen Siohwa rohng laudsang pein eh pwukoa nin duwen sounkair men. Pil duwehte, kitail en dehr rapahki kaping ong pein kitail de aramas en tehk kitail, ahpw kitail en kahrehiong aramas en kilanglahng Siohwa oh Paipel nan atail kalohk. (1 Kor. 9:16; 2 Kor. 3:5) Patehng met, kitail kin ale kehl sang rohng me kitail kalohki. Mehnia ire kan sang kokohp en Soel kak kihong kitail ngoang oh koapworopwor rahnwet?
2. Dahme kerendohn rahnen Siohwa kamwakid kitail en wia?
2 ‘Rahnen Siohwa Kerendohr.’ (Soel 1:15): Mendahki mahsen pwukat ntingdier sounpar kid kei samwalahro, kitail kin momour ni ahnsoun imwiseklahn pweidahn mahsen pwukat. Suwedlahn irair en sampah oh atail kin kalapw tuhwong aramas me sohte kin nsenohki oh kapailok nan atail wasahn kalohk kin kadehdehda ni mehlel me imwin koasoandi suwed wet leledohr. (2 Tim. 3:1-5; 2 Pit. 3:3, 4) Ni atail kin medemedewe duwen kerendohn imwio, kitail ahneki kahrepen atail en mwohneki kalohk nan atail mour.—2 Pit. 3:11, 12.
3. Dahme kahrehda doadoahk en kalohk uhdahn kesempwal ni atail kin kerenlahng kahn kamakam kowahlap?
3 “Siohwa Pahn Ketin Wia Wasahn Ruk ong Sapwellime Aramas akan.” (Soel 3:16, NW): Rerrer me kilel nan ire tikitik wet kin doadoahk ongete sapwellimen Siohwa kadeik erein kahn kamakam kowahlap. Kitail kin nsenamwahu ni atail kin ese me Siohwa pahn ketin kapitala sapwellime ladu lelepek kan erein ahnsowo. (Kaud. 7:9, 14) Ni atail kin iang doadoahk en kalohk oh kilang duwen Siohwa eh kin ketin sewese oh kakehlaka kitail, kitail kin kakehlailihala atail pwoson oh kanengamah me pahn sewese kitail erein ahnsoun kahn kamakam kowahlap me kohkohdo.
4. Dahme kahrehda kitail kak nsenamwahu oh kilangwohng ahnsou kohkohdo ni koapworopwor?
4 Mendahki ekei kin nda me rohng me Soel kasalehda kin wia mehkot kansensuwed, e kin kihong sapwellimen Koht aramas kan koapworopwor kaselel en komourala. (Soel 2:32) Eri kitail kilangwohng ahnsou kohkohdo ni koapworopwor oh ngoangki kalohki rongamwahu en Wehin Koht ni atail kin kapwaiada mahsen en Soel 2:23: “Kumwail nsenamwahula, kumwail perenkihda . . . KAUN-O, amwail Koht.”