Doadoahngki Mwahu Makasihn en Mwowe kan
Pwehki sohte mehmen pahn paiekihda atail kolokol de kesehla makasihn en mwowe kan, kitail anahne kihla makasihn pwukat. Makasihn ehute pil kak kamwakid aramas emen en men rong padahk mehlel oh kamwakid ih en tepida likweriong mwaren Siohwa. (Rom 10:13, 14) Iet ekei iren sawas kan en doadoahngki mwahu neitail makasihn en mwowe kan.
Ni atail kin kalohk nan wasa kan me doadoahk en kalohk sohte kalapw wiawi ie, mwein ke kak kihdi ehu makasihn ni ihmw akan me sohte towe, ahpw kihdi wasa me sohte pahn sansal ong koaruhsie.
Ni atail kin kalohk nan wehi pokon wasa me aramas kin mwomwohd awiawih, duwehte wasa me re kin awiawih pwoas de train de wasahn sompihr, idek rehrail ma re men wadek mehkot. Kasalehiong ekei neitail makasihn en mwowe kan oh mweidohng ren pilada.
Ni atail kin kohla wasahn lopwolopw, wasahn apwalih aramas mah kan, imwen wini kan de wasa kan me duwehte soangen wasa pwukat me ahmw mwomwohdiso kin kalohk ie, pwilikihdi ekei neitail makasihn en mwowe kan nan wasa me aramas kan kin mwomwohd oh awiawih. E kin kalapw mwahu ken pekihda mahs rehn me kin apwalih wasao mwohn ahmw wia met. Ma ke kilang me miehier neitail makasihn wasao, dehr kihdi ekei wasao.
Ni omw pahn kaunopada ong pwurehng pwurala rehn me men rong, medewe mahs dahme aramaso kin perenki. Mie eh peneinei? E kin perenki seiloak? E kin perenki mwetuwel? Kilangseli nan makasihn en mwowe kan ma ke pahn kak diarada ire ieu me e pahn perenki wadek. Kasalehiong ih ire wet ni omw pahn pwurala reh.
Ma ke pwurepwure aramas men me perenki rong ahpw sohte tuhwong, ni ahnsou me ke pahn tuhwong, kasalehiong makasihn en mwowe ko me e saikinte alehdi.