August en Wia Sounpwong en Kalohk Kesempwal Ehu!
Kihseli Kisin Doaropwe Kapw Ehu me Pahn Wiawi nan Sampah Pwon
1. Doadoahk tohrohr dahieu me pahn wiawi sampah pwon ni atail kerenlahng katamanpen kokoudahn Wehin Koht me wiawi sounpar 100 samwalahro?
1 Kitail kerenlahng katamanpen kokoudahn Wehin Koht me wiawi sounpar 100 samwalahro. Ia uwen konehng kitail en kawauwih Siohwa ni atail pahn wia doadoahk tohrohr en kihla kisin doaropwe kapw wet! Erein sounpwong en August kitail pahn kihseli kisin doaropwe kapw me oaralape iei Ia Wasa Kitail Kak Diarada Ie Pasapengpen Peidek Kesempwal kan nan Atail Mour? Met pahn wiawi nan sampah pwon. Kisin doaropwe wet kin kangoange aramas en kin tehk Paipel pwehn diarada pasapeng kan oh e pil kin kawehwehda ia duwen jw.org eh kak sewese irail.
2. Ia duwen atail kak iang sawas wia ngilen kaping laud ong Siohwa me pahn wiawi erein sounpwong en August?
2 Ngilen Kaping Laud: Pwehn sewese sounkalohk kan kalaudehla arail doadoahk en kalohk, koasoandi tohrohr ehu wiawihda ong irail me men iang wia sawaspen pioneer nan sounpwong en August. Erein sounpwongo, sounkalohk me papidais kan pahn kak wia sawaspen pioneer me kin wiahda awa 30. Pwehki mie Nialem, Rahn Kaunop, oh Rahn Sarawi limau nan sounpwong en August, sounkalohk tohto me kin doadoahk de kohla sukuhl erein wihko pahn kak iang wia sawaspen pioneer. Ma mie omw onop en Paipel me kekeirda mwahu de noumw seri men me men wiahla sounkalohk men, koasoiong soun koasoanehdi pwihn en elder kan ahnsowohte. Ia uwen kangoang ma irail pwukat kak iang kitail nin duwen sounkalohk kei erein sounpwong kesempwal wet! Mehnda tohto pioneer kan kin kommoal erein sounpwong en August mwurinte arail kanekehla neirail awahn sounparo, ele re pahn kak wekidala arail koasoandi pwe ren kak iang pidada nan doadoahk tohrohr wet. Met iei ahnsou mwahu ong peneinei kan en koasoiapene ia duwen arail pahn iang sawas wia ngilen kaping laud ong Siohwa me pahn wiawi erein sounpwong en August.—Esra 3:11; Lep. Pad. 15:22.
3. Dahme kitail en kasikasik me pid doadoahk tohrohr wet?
3 Mehnda ma kitail iangehr soangen doadoahk tohrohr me duwehte met mwowe, kitail kasik me doadoahk tohrohr wet pahn wia mehkot me kitail pahn tamataman. Ia duwe, kitail kak lel awa, sounkalohk, oh sawaspen pioneer me keieu tohto sang mahs leledo met erein sounpwong en August? Ni atail pahn kaimwisekala pahr en kalohk en 2014, Siohwa en ketin kapaia doadoahk laud me sapwellime aramas kan nan sampah pwon pahn wia pwehn wiahla sounpwong en August en wia sounpwong en kalohk me keieu kaselel!—Mad. 24:14.