Alasang Soukohp akan—Sepanaia
1. Nan soangen irair dahieu me Sepanaia papah nin duwen soukohp, oh ia duwen eh wia mehn kahlemeng mwahu ong kitail rahnwet?
1 Mpen pahr 650 Mwohn Krais, kaudok ong Paal kin wiawi ni sansal nan Suda. Nanmwarki suwed Amon ahpwtehn kamakamala, oh met Nanmwarki pwulopwul Sosaia me wie kakaun. (2 Kron. 33:21–34:1) Erein ahnsowo, Siohwa ketin kesepwilda Sepanaia en kalohki rohng en sapwellime kadeik. Mendahki Sepanaia ele wia emen kisehn peneinei en nanmwarki en Suda, e sohte song en wia pwe sapwellimen Siohwa rohng en kadeik kan ong kaundahn Suda en mwomwen sohte nohn kesempwal. (Sep. 1:1; 3:1-4) Ni ahlohte, kitail kin wia uwen atail kak en alasang en Sepanaia eimah oh kitail en dehr mweidohng kisehtail kan en kerempwa atail papah Siohwa. (Mad. 10:34-37) Rohng dah me Sepanaia kalohki, oh ia imwilahn met?
2. Soangen mwekid dah kan kitail anahne wia pwe kitail en pitsang ni rahn en sapwellimen Siohwa engieng?
2 Sohpeiong Siohwa: Siohwa kelehpw kak ketin kapitala aramas akan ni rahn en sapwellime engieng. Ihme kahrehda, Sepanaia padahkihong aramas kan en Suda en sohpeiong Siohwa, rapahki irair pwung kan, oh rapahki aktikitik erein eh miehte ahnsou. (Sep. 2:2, 3) Met pil mehlel duwehte nan atail ahnsou. Duwehte Sepanaia, kitail kangoange meteikan en sohpeiong Siohwa, ahpw kitail pil anahne mwekid, koasoanehdi teng en dehr ‘sohpeisang oh sohla idawehn’ Siohwa. (Sep. 1:6) Ahpw, kitail kin sohpeiong Siohwa sang ni atail kin onopki sapwellime Mahsen ni keneinei oh kapakapki sapwellime kaweid. Kitail kin rapahki irair pwung sang ni atail kin mourki mour mwakelekel. Kitail kin rapahki aktikitik sang ni atail kin kakairada irair en mpahi oh uhpa oh sang ni atail kin mwadang kapwaiada kaweid kan sang sapwellimen Siohwa pwihn.
3. Dahme kahrehda kitail anahne kolokol madamadau pwung nan kalohk?
3 Imwila Mwahu: Rohng en kadeik me Sepanaia kalohki kamwakid ekei mehn Suda ko ahpw keieu rehn kisin pwutak pwulopwul Sosaia, me tepida rapahki kupwuren Siohwa ni eh wia kisin pwutak. Mwuhr e tapiada kamwakelehsang dikedik kan nan sahpwo. (2 Kron. 34:2-5) Rahnwet, mendahki ekei kisin werentuhke en Wehio kin pwupwudiong pohn kisinial akan, nan wasa takain, de nanpwungen dihpw tekatek kan, ahpw ekei pil kin pwupwudiong nan pwelmwahwo oh miehla wah. (Mad. 13:18-23) Kitail koapworopworki me Siohwa pahn ketin pousehlahte kapaia atail kin nannanti ni atail kin pwerisekiong kamwarak werentuhke en Wehio.—Mel. 126:6.
4. Dahme kahrehda kitail anahne awiawih Siohwa?
4 Ekei nan wehin Suda pehm me Siohwa sohte pahn ketin mwekid. Ahpw, Siohwa ketin kamehlelehiong irail me sapwellime rahn inenen keren. (Sep. 1:12, 14) Komourala pahn kowohng irail kante me kin wiahki ih arail wasahn ruk. (Sep. 3:12, 17) Ni atail awiawih Siohwa, kitail en perenki miniminiong iengetail tohnkaudok teikan papah samatail Koht lapalap!—Sep. 3:8, 9.