Sukuhl Sang Sounkalohk Koahiek kan

Kitail kin uhdahn kesempwalki irail sounkalohk koahiek kan nan atail mwomwohdiso. Ekei irail papah Siohwa ni lelepek erein sounpar tohto. Ah pil ekei ele ahpwtehn koahiekla nan ar doadoahk en kalohk. Sounkalohk pwukat koaros kilangehr ia duwen Sises eh kin ketin kaweid mwomwohdisohn Kristian ni imwin rahn pwukat ong kalaudehla doadoahk en kalohk oh katohnpadahk. (Mad. 28:19, 20) Ni arail iang doadoahk en kalohk wet, irail alehdier “manaman lapalap” ahnsou me re kin lelohng pein arail kahpwal kan oh kasongosong kan. (2 Kor. 4:7) Kitail kak sukuhlki soahng tohto sang sounkalohk koahiek pwukat. Ahnsou me re alehdi ahnsou mwahu en padahkihong meteikan dahme re sukuhlkier, re kin perenki wia met. (Mel. 71:18) Ihme kahrehda, kitail en pil isaneki ahnsou mwahu en ale kasukuhl sang irail. Ia duwen met eh kak wiawi?

Nan Doadoahk en Kalohk. En pweida nan doadoahk en kalohk, sounkalohk kapw de sounkalohk me saikinte koahiekla kan anahne ale kaiahn. Re kak ale kaiahn laud ni arail kin tetehk ia duwen sounkalohk koahiek kan ar kin wia ar doadoahk en kalohk. (Kilang ire me mi nan Kahn Iroir en February 1, 2015, “Ngoangkihte Omw Doadoahk en Kalohk,” parakrap kesiluh pahnangin sawaspen oaralap “Sewese me Sohte Nohn Koahiek.”) Ia duwen omw paiekidahr omw iang emen me koahiek nan doadoahk en kalohk?

Ke kak luke emen sounkalohk koahiek pwehn iang uhk doadoahk en kalohk? Ma sounkalohko mah de luwet ni paliwar, ele ekei pak ke kak lukehdo omw onop en Paipel ni imwen sounkalohko. Mwurin onopo, ke kak peki ahn sounkalohko eh kaweid oh sawas.

Kihong Omw Ahnsou Ong Irail: Esehla sounkalohk koahiek kan sang ni omw pahn kihong omw ahnsou ong irail. Luke emen irail en iang omw kaudok en peneinei oh idek peidek reh. Ma sounkalohko mah de luwet ni paliwar, ia duwe, koasoandi kak wiawihda pwe koaros en kak paiekihda kaudok en peneinei ni imweo? Esehda ia duwen eh alehdi padahk mehlel. Kapai dah kan me e alehdi? Soangen kekeirda dah kan me e kilang nan mwomwohdiso? Soahng kaperen dah kan me e diar ni eh papah Siohwa?

Ken kadek oh toupahrek ni omw kasik dahme e kak sawaskihda. Pil duwehte kitail koaros, irail sounkalohk koahieklahr pwukat kin ahneki soangsoangen koahiek kan me wekpeseng nan doadoahk en kalohk. (Rom 12:6-8) Ekei likeilapalahr oh ele met kak katikala ahnsou me re kak mwemweit rehtail. Mendahki met, kitail kakete sukuhlki soahng tohto sang irail pwehki arail koahieklahr nan ar papah Siohwa ni lelepek.