Doadoahngki Ekei Soahng kan en Pwuhken Paipel Padahngki me Pahn Pweida Mwahu
Ni tohnsukuhl en Paipel men eh sukuhlki dahme Paipel uhdahn padahngki oh kapwaiada dahme e sukuhlki, e pahn kekeirda oh kapwarehda wahn eh nanpwungmwahu rehn Siohwa. (Mel. 1:1-3) Kitail kak sewese neitail tohnsukuhl en kekeirda sang atail kin doadoahngki mwahu ekei soahng kan en pwuhken Paipel Padahngki.
Peidek kan ni Tepin Pwuhko: Ehuehu irelaud kin tepikihda peidek kei me pasapengla nan irelaudo. Ke kak idek peidek pwukat rehn noumw tohnsukuhlo pwehn kahrehiong ih en men rong dahme kumwa pahn koasoiapene mwuhr. De ke kak luke en sapeng ni mwotomwot ehuehu peidek pwukat. Ma ehu eh pasapeng ko sapwung, ke sohte anahne en kapwungala ahnsowohte. Eh pasapeng kan pahn sewese iuk en kasawihada oh dehdehki mehnia ire kan me anahne sawas oh kalaudepen kawehwe.—Lep. Pad. 16:23; 18:13.
Oaritik kan: Ma tohnsukuhlo wehwehki oh pwungki audepen oaralapo de onopo, ke kak ihte kangoange en kousapahlih oaritik kan me pid ireo ni pein eh ahnsou. Ni amwa pahn pwurehng onop, ele ke kak kihla kisin ahnsou kis en tehk kanahieng ma e wehwehki. Ahpw, ma e pahn wia kamwahupe, ke anahne wiahda ahnsou erein onopo kumwa en koasoiapene oaritik kan me pid oaralapo ni amwa wadek parakrap kan oh idek peidek kan me ke kaunopadahr.
Koakon en Kousapahl: Koakon en kousapahl me kin mi ni imwin ehuehu irelaud kin audaudki ire kan me sapengala peidek kan me mi tepin irelaudo. Ke kak doadoahngki soahng pwukat pwehn tehk kanahieng ma noumw tohnsukuhlo wehwehki oh kak kawehwehda ire kesempwal kan. Wadek ehuehu ire kan me sapengala peideko ni ngihl laud pil iangahki iren Paipel kan me pid ireo. Kowe eri luke noumw tohnsukuhlo en doadoahngki iren Paipel kan en kawehwehda dahme kahrehda ire ko me sapengala peideko uhdahn mehlel.—Wiewia 17:2, 3.