Kalaudehla Atail Koahiek Nan Doadoahk En Kalohk​—Pwurehng Pwurala

DAHME KAHREHDA E KESEMPWAL: Aramas tohto me kin kasalehda me re perenki rong rohng en Wehio kin raparapahki padahk mehlel duwen Koht. (Ais 55:6) Pwe kitail en kak pweida ni atail ekisekis padahkih irail, kitail anahne pwurepwurehng pwurala rehrail. Aramas akan kin lelohng soangsoangen kahpwal kan, eri mwomwen atail kin kakairada arail perenki rong pahn wekpeseng. Ahpw, kitail pahn pweida mwahu ma kitail kaunopada mwahu oh ma mie mehkot me kitail koasoanehdi pwehn kapwaiada ehuehu ahnsou me kitail pwurala. Mehn akadei me kitail keieu men kapwaiada iei en tapiada onop en Paipel rehrail.

IA DUWEN OMW PAHN WIA MET:

• Nantihong en mwadang pwurala, ele mwein mwurin rahn keite.​—Md 13:19

• Kasalehda kadek oh wahu. Song en dehr saloh

• Tepikihda rahnmwahu ni elen kadek. Doadoahngki eden aramaso. Katamankihong ih dahme kahrehda ke pwurala reh, mwein pwe ken sapengala peidek ehu, wahla reh Kahn Iroir kapw, kasalehiong ih neitail website, kasalehiong ih kasdo ehu, de kasalehda mwomwen onop Paipel. Wekidala dahme ke pahn koasoia ma e kasalehda me e perenki koasoia ehu oaralap tohrohr.​—Pil 2:4

• Kalamwuri weren padahk mehlel me ke padokedi nan eh mohngiong sang ni omw pahn ehukihong ih ehu ire sang nan Paipel de kihong ih ehu sawaspen Paipel. (1Ko 3:6) Song en wiahda en perenki amwa kin pehsepene

• Kaunopada tohnihmwo en kasik omw pahn pwurehng pwurala