Kisinlikou Sang Pwihn me Kin Apwalih Mwomwohdiso nan Sampah Pwon
Riat kan:
Samatail nanleng Siohwa iei mehn kahlemeng keieu mwahu en limpoak. Ihme kahrehda Paipel mahsanih: “Koht iei limpoak.” (1 Sohn 4:8) Mendahki Siohwa iei me Lapalahpie, sapwellime Mahsen sohte mahsanih me “Koht iei manaman” de “Koht iei kehl.” Sapwellimen Koht kaunda kin poahsoankihda limpoak. Ia uwen met eh kin kahrehiong kitail en perenki Ih.
E mwahu pwe Siohwa sohte kin ketin idingkihong kitail en papah Ih. Kaidehn Ih kaun lemei men. E kupwurki kitail en papah ih pwehki limpoak me kohsang mohngiongitail. Ni atail kin wia met kitail kin kasalehda me kitail mwahuki sapwellime kaunda pwehki kitail kamehlele me sapwellime elen kaunda me pwung oh limpoak. Met mehkot me sansal sangete tepin poadopoad en aramas.
Siohwa sohte ketin idingkihong Adam oh Ihp ira en peikiong ih, ahpw E ketikihong ira ahnsou mwahu en wiahda pein ara pilipil. Ma ira uhdahn poakohng Siohwa oh kesempwalki dahme E ketin wiahiong ira, ira pahn pelianda ahn Sehdan eh nanti kahrehiong ira en uhwong.
Mwuhr, Moses nda ni eh kaimwiseklahn padahk ong wehin Israel: “Rahnwet I kihong kumwail en pilada nanpwungen me mwahu oh me suwed, oh nanpwungen mehla oh mour.” (Deud. 30:15) Aramas kin ahneki saledek en pilada ia duwen ar pahn mour. Pil duwehte, Sosua ndaiong mehn Israel kan: “Ma kumwail sohte men papah KAUN-O, eri, kumwail pilada rahnwet ihs me kumwail pahn papah.” Aramas ko uhd sapeng Sosua koasoia: “Se sohte pahn mweisang KAUN-O.” (Sos. 24:15, 16) Ih duwen atail pil kin pepehm rahnwet. Pwehki atail poakohng Siohwa, kitail “sohte pahn” mweisang ih.
Nin duwen Kristian mehlel kan, kitail kin ese ni sansal ia wehwehn saledek en pilipil. Mendahki elder kan ahneki manaman en kaweid oh kaiahn, re sohte kin kaunda mour oh pwoson en meteikan. Wahnpoaron Pohl ntingihedi: “Se sohte men wiahda kosonned ong kumwail dahme kumwail pahn pwoson, pwe amwail pwoson me uhdahn kehlail; ahpw se kin iang kumwail doadoahk ong ni pein amwail peren.”—2 Kor. 1:24.
Ia uwen kaperen en wia mehkot pwehki atail men wia a kaidehn emen idingkihong kitail! Siohwa ketin luke kitail en wia dahme mwahu pwehki limpoak. Kesempwalpen met kin sansalda ni mahsen kan me Pohl ntingihedi: “Ma I pahn kisakiskihwei mehkoaros me I ahneki, oh ma I pil pahn mweidala paliwereiet pwe en isihsla oh roangala—ahpw sohte limpoak rehi, sohte mwahn katep ehu pahn kohieng ie.”—1 Kor. 13:3.
E kin wahdo peren laud oh kaping ong Siohwa ni eh ketin mahsanih riatail rar kei kin papah ih pwehki arail poakohng ih sang mohngiong unsek.
Siohwa pil kin ketin poakohng sapwellime ladu kan koaros iangahki kumwail seri kan oh me pwulopwul kan me kin kasalehda amwail limpoak ong Siohwa a kaidehn ong sampah oh ineng roporop kan. Koapworopworki me se pil uhdahn poakohng kumwail.—Luk 12:42, 43.
Pahr samwalahro, pwehki limpoak ong Siohwa, kumwail riat kan oh me pwulopwul kan kin doadoahngkihla awa 1,748,697,447 ong kalohki rongamwahu. Mwekidki limpoak, meh 7,782,346 iang doadoahk en kalohk nan sampah pwon. Se perenkihda me irail me kapw kan meh 268,777 oh nanpwungarail me pwulopwul tohto me iang kasalehda arail inou ong Siohwa sang ni arail papidaisla. Met wehwehki me meh 5,168 kin papidaisla ehuehu wihk. Met uhdahn kaperenda kitail!
Nan imwin ahnsou pwukat, sapwellimen Koht aramas kan kin anahne powehdi diren kahpwal kan, kalokolok kan, soumwahu kan oh pil ekei kin anahne dadaur kahpwal pwehki arail mahlahr. Ahpw kitail koasoanehdi teng en dehr “loaltikla” de ‘kesehla atail pwoson.’ Se kin uhdahn poakohng kumwail.—Ipru 10:39; 2 Kor. 4:16.
Riamwail kan,
Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan