Dahme Kahrehda Aramas Sohte Kak Ahneki Popohl Rehn Meteikan?​—Dahme Paipel Mahsanih?

Kaunen wehi kan oh soangsoangen pwihn kan sohte kak wahdo popohl nin sampah. Rahnwet, mahwen tohtohsang mahso sangete ni Mahwen Keriau en Sampah. Mpen aramas rielik—pahkis ehu en aramas koaros en sampah—kin kousoan nan wasa me mahwen kin wiawi ie.

Dahme kahrehda aramas sohte kak wahdo popohl? Dahme Paipel mahsanih?

Mie kahrepe siluh me aramas sohte kak wahdo popohl

1. 1. Aramas akan kin kasalehda wiewia de madamadau me kin ireiraildihsang ahneki popohl. Paipel kohpada me nan atail ahnsou, “aramas akan pahn kin roporop ong pein irail, poakohng mwohni, aksuwei, pohnmwahso, . . . soaloalopwoat, . . . sohte men pwungki meteikan, . . . sohte kak kaunda pein irail, lemei, . . . keptakai, aklapalap.”—2 Timoty 3:2-4.

2. 2. Aramas akan, emenemen de pwihn ehu, sohte ahneki koahiek en kamwahwihala arail kahpwal kan ma sohte sawas kohsang Sounkapikpatailo, Siohwaa Koht. Paipel mahsanih me “sohte aramas emen me kaunda pein eh mour.”—Seremaia 10:23.

3. 3. Sampah mi pahn manaman en kaun kehlail oh suwed men, Sehdan me Tepil, me “kin pitipitih sampah pwon.” (Kaudiahl 12:9) Erein ‘sampah pwon eh mi pahn manaman en me suwedo,’ mahwen oh pei pahn kin wiawi.—1 Sohn 5:19.

Ihs me kak wahdo popohl?

Paipel kamehlelehiong kitail me aramas akan sohte pahn wahdo popohl, ahpw Koht me pahn ketikihdo.

•  “KAUN-O kin ketin kakehlahda sapwellime aramas akan oh kupwuramwahwih kin irail popohl.”—Melkahka 29:11.

Ia duwen Koht eh pahn ketin kapwaiada inou wet? “Koht me kin ketikihda popohl, pahn . . . kamwutepene Sehdan.” (Rom 16:20) Koht pahn ketin doadoahngki koperment ehu nanleng, me Paipel kin kahdaneki “Wehin Koht,” pwehn ketikihdo popohl nin sampah. (Luk 4:43) Ni ahnsou me Sises Krais, Nanmwarkien Wehi wet, pahn kaunda sampah, aramas akan pahn sukuhlki duwen ar pahn ahneki popohl.​—Aiseia 9:6, 7.

•  Pwehn kalaudehla omw ese duwen met, menlau wadek “What Will God’s Kingdom Accomplish?”