“Kaukaule Idawehn Ie”
1 Aramas tohto kin keieu mwohneki pein arail nsenamwahu, ahpw pali laud en ahnsou, irail kin nsensuwed. Sises kasalehda duwen ehu wiewiahn soh roporop me pahn kak wahdo peren mehlel. (Wiewia 20:35) E mahsanih: “Mehmen me men iengiehla, en tounmeteikihla pein ih . . . oh kaukaule idawehn ie.” (Mark 8:34) Met kin wehwehki laudsang en ihte sohte iang ekei mehn kaperen kan ekei ahnsou. E kin wehwehki me atail momour en rahn koaros en kin kaperenihada Siohwa Koht, a kaidehn kitail.—Rom 14:8; 15:3.
2 Tehk duwen mehn kahlemeng mwahu en Pohl. Pwehki “soahngteieu me inenen katapan oh kesempwal iei marain en Sises Krais,” Pohl pwilikihdi rapahki pein ah nsenamwahu, oh kihong ah mour ohng ni kalaudepen mehkan me pid Wehin Koht. (Pilipai 3:7, 8) E mahsanih: “I pahn netikihla mehkoaros me I ahneki, pil pein ngehi,” pwe en kak sewese aramas. (2 Korint 12:15) Emenemen kitail anahne idek rehtail: ‘Iaduwen ahi kin doadoahngki ahi ahnsou, kehl, koahiek oh kepwe kan? I kin rapahki pein ahi nsenamwahu, de I kin raparapahki ahl akan en kaperenih Siohwa?’
3 Ahnsou Mwahu en Kihwei: Ehuehu sounpahr, sapwellimen Koht aramas akan kin doadoahngki awa billion kei ong doadoahk en komour me iei doadoahk en kalohki Wehio. Nan mwomwohdiso, mehnda ma irail me pwulopwul de mah, koaros kin iang ahneki pwukoah kan me kin sewese emenemen. Pil doadoahk laud kin kohwong kapokon tikitik oh kapokon laud kan oh pil duwehte doadoahk en kokou ihmw kan ong kamwahupe oh kalaudpen atail kaudok. Oh pil, medewehla duwen elen epwel limpoak me kin kohda sang rehn riatail kan ni pali ngehn me kin iang palien Hospital Liaison Committee kan oh Patient Visitation Group kan. Koaros doadoahk ngenin tounmetei pwukat kin wia kapai kei ohng atail pirien en pali ngehn.—Melkahka 110:3.
4 Ahnsou me melimel, lapake, rerrer en sahpw, de mehkot soh kasikpe pwarada, soangen ahnsou pwukat kin wia ahnsou mwahu en kihda pein atail sawas ni soangsoangen ahl akan. Ahpw, pali laud en ahnsou, kitail pahn diar me riatail Kristian kan kin anahne sawas oh kangoang. (Lepin Padahk 17:17) Ni atail kin kaukaule toukihda pein kitail ong sewese meteikan oh kalaudehla doadoahk en Wehio, kitail kin kahlemengih Sises. (Pilipai 2:5-8) Kitail en wonlahte wia met.