Ke Kin Wia “Mehn Kapoudiahl”!

¹ Wahnpoaron Pohl ntingihdi: “Kitail wialahr mehn kapoudiahl ong sampah, ong tohnleng kan, oh ong aramas akan.” (1 Kor. 4:​9, New World Translation) Ia wehwehn met, oh iaduwen e pahn pid kitail oh atail doadoahk en kalohk rahnwet?

² Ong mehn Korint kan, lepin lokaia pwukat “mehn kapoudiahl” kin katamandohng irail dahme kin wiawi ni kaimwiseklahn mwadong en “gladiator” en mehn Rom kan (aramas akan kin peiki dipwisou keper kan pwehn kasalehda ihs me kak kemehla emen) oh aramas akan me pahn kamakamala kin kapar mwohn aramas teikan me kin kilikilang irail oh, mwurin mwo, wiepen kamakam suwed kin wiawiong irail. Ni soangen mwomwohte, irail me tohto​​—⁠aramas akan oh pil tohnleng kan​​—⁠kin kilang duwen kamakamala suwed kan me kin wiawi ong tepin Kristian kan en keieun senturi pwehki arail kalohki Rongamwahu en Wehio. (Ipru 10:​32, 33) Re kasalehda me re lelepek mendahki soahng suwed kan me kin wiawiong irail, oh met kin kamwekid meteikan en pil kolokol arail lelepek; duwehte atail lelepek rahnwet kin pil kak kamwekid meteikan. Ihs me kin kilikilang kitail?

³ Ong Sampah oh ong Aramas akan: Ekei pak, palien nuhs kin koasoia duwen wiewia kan en sapwellimen Siohwa aramas akan. Mehlel, kitail kin kalahnganki ahnsou me palien nuhs kin kapinga sapwellimen Siohwa aramas akan oh wia nuhs kan me kin mehlel oh pwung me pid atail doadoahk en kalohk, ahpw kitail pil wehwehki me, ekei pak, pahn mie nuhs me kin kihda koasoi likamw akan oh kitail wehwehki me nuhs pwukat kin kohsang irail me kin men kauwe Sounkadehde kan. Ahpw, kitail en kasalehda mwohn mehkoaros me kitail kin wia sapwellimen Koht sounpapah kei mehnda ma aramas kin “kauwe de kapinga” kitail. (2 Kor. 6:​4, 8) Ong irail aramas akan me mohngiong mehlel oh kin kilang dahme kin wiawiong kitail, re kin tepida wehwehki me kitail wia sapwellimen Sises Krais tohnpadahk mehlel kan.

⁴ Ong Tohnleng kan: Tohnleng kan kin pil kilikilang kitail. Tepil oh nah kan pil kin kilikilang kitail​​—⁠ahpw, re kin wia met ni “lingeringer kowahlap” pwehki re men kauhdi doadoahk en kalohki “padahk me Sises kadehdehier.” (Kaud. 12:​9, 12, 17) Tohnleng lelepek kan kin kilikilang oh kin perenkihda me dipan emen eh kin koluhla oh wiliakapwala. (Luk 15:10) E kin kakehlailih kitail en wehwehki me tohnleng kan kin kilangwong atail doadoahk en kalohk nin duwen doadoahk ehu me keieu kesempwal, mwahu oh inenen karuwaru me kin wiawi nan sampah rahnwet!​​—⁠Kaud. 14:​6, 7.

⁵ Ni ahnsou me aramas akan uhwong uhk de kahpwal kan kin lelohng uhk de ke pehm me ahmw doadoahk en kalohk sohte kin pweida, tamataman me ke kin wia “mehn kapoudiahl” me wehwehki me kitail kin wia aramas ekei me sansalehr mwohn aramas akan oh pil tohnleng kan. Ahmw loalopwoat ong Siohwa kin kasalehda uwen kehlail en ahmw limpoak ong Siohwa. Kedekedeo, ahmw nantihong nan ‘weirentang en pwoson’ pahn sewese iuk en ‘ahneki koapworopwor kehlail ong ale mour soutuk.’​​—⁠1 Tim. 6:​12.