Anahnepen Kitail Koaros Pwehn Wiahda Doadoahko
1 Tohnpadahk kan koaros en Sises Krais anahne en tamataman arail nannanti en utung oh iang doadoahk en kalohki Wehio me inenen kesempwal. Sises pohnese me uwen tohtohn wahn Wehio me emen emen sapwellime tohnpadahk kan pahn kapwarehda pahn wekpeseng. (Madiu 13:23) Mendahki pioneer tohto kin doadoahk laud oh wiahda pali laud en doadoahk en kalohk, koaros me kin ngoangki kaukaule kalinganahda Koht ni arail kin kapwarehda uwen tohtohn wah kan me re kakohng warohng ale kaping.—Sohn 15:8.
2 Nannanti en Pwihn ehu kin Wiahda Soahng Tohto: Sises kohpada me kekeiradahn nannanti en sapwellime tohnpadahk kan koaros pahn kapwarehda doadoahk kan me laud sang ah. (Sohn 14:12) Mendahki ma pein atail irair kin irehdi dahme kitail kak wia de mweidong kitail en kak doadoahngki ahnsou laud nan doadoahk en kalohki Wehio, mie anahnepen kitail koaros pwehn kak wiahda doadoahko. E duwehte me Pohl mahsanih: “Kakon akan en paliwar wet kin sonamwahupene, oh paliwaro unsek kin tengetengkipene kakon koaros. Eri, ni ehuehu kakon eh kin wiewia pwaise, paliwar unsek kin keirda oh laudla ni limpoak.”—Episos 4:16.
3 Ekei ele pahn pehm me arail nannanti sohte wiahda mehkot pwe e tikitik. Ahpw, mwohn silangen Siohwa me keieu kesempwal iei me atail doadoahk en kohsang nan mongiongatail. Soahng koaros me kitail wiahiong ih me kesempwal oh e kin kalahnganki met.—Pil tehk Luk 21:1-4.
4 Kaukaule Utungada Doadoahko: Kitail koaros ahneki kapai en sawaskihda dipwisou kan ong doadoahko nan sampah pwon. Ekei pil kak sawaski iang doadoahk kan me pidada utungada doadoahk en Wehio. Emen emen kitail kak nantiong kihda pasapeng kan nan mihding kan me kitail kaunopada mwahu oh iang kisehn Theocratic Ministry School. Ni atail isaneki ahnsou mwahu kan en kangoange mehteikan, kitail kin kihda sawas kesempwal ehu ong pali ngehn en mwomwohdiso, oh met kin kamwahuwiala ah koahiek en wiahda doadoahko me likilikpe kohwong en wiahda.
5 Ehi, mie anahnepen kitail koaros pwehn kak wiahda doadoahko. Emen en dehr pehm me sohte anahnepe. Atail nannanti kan koaros, me laud oh tikitik, ni atail papah Siohwa kin kasansalehda me kitail kelepw me wia tohnkaudok mehlel en Koht. (Malakai 3:18) Emen emen kitail kak iang kisehn kawauwih Siohwa oh sewese mehteikan en esehla ih oh papah ih.