En Dehr Uhdi Nan Weirentang En Mour!
“Kitail en nantihong nan atail mour me kitail tapihadahr, rasehng atail kin tang kehlail ni atail kin weirentang.”—IPRU 12:1.
1, 2. Wiewia kaperen dah kei me sapwellimen Siohwa ladu kan kin perenkihda erein imwin rahnpwukat?
KITAIL MOMOUR nan ahnsou me kaperen oh apwal. Sounpar 80 samwa samwalahro, nan 1914, Sises kesepwilda nin duwen Nanmwarki men en Wehin Koht nanleng. “Rahn en Kauno” oh iangahki “ansoun imwi” en koasoandi wet en mehkan tepiadahr. (Kaudial 1:10; Daniel 12:9) Sangete ahnsouwo en Kristian kan weirentang en mour kin wie kekeirada karuaru. Ladu kan en Koht kin nantiong pwehn peipeian sapwellimen Siohwa kuruma nanleng, sapwellime pwihn nanleng, me kin mwekimwekidwei sohte uhdi pwehn kapwaiada kupwuren Siohwa.—Esekiel 1:4-28; 1 Korint 9:24.
2 Sapwellimen Koht aramas kan kin diar peren ni ahr kin ‘tangwohng nan weirentang’ en mour soutuk? Ehi, uhdahn! Re kin perenki kilang kihkihpenen luhwen rien Sises kan, oh re perenki ese me kaimwseklahn kileledi en luhwen 144,000 kereniongehr imwisekla. (Kaudial 7:13, 14) Pil ehu, re perenki wehwehkihla me sapwellimen Siohwa Nanmwarki idihddao palki sapwellime naipokos pwehn kihpene “rahk en sampah.” (Kaudial 14:15, 16) Oh ia uwen rahk ehu me e pahn wia! (Madiu 9:37) Lau lel ahnsouwet, pohnangin aramas limerar me kohpeneiehr nan—“pokon kalaimwun, me sohte aramas kak wadekedi uwen tohto! Re kohsang nan wehi koaros, ni kadaudek koaros, nan sahpw koaros, oh lokaia koaros.” (Kaudial 7:9) Sohte me kak nda ia uwen pokono pahn ikmwuri tohtohkihla, pwehki sohte emen me kak wadekedi uwen tohto ie.
3. Mendahki soahngen mehn koarompwa dah kei me kitail en ahnsou koaros nantiong kekeirada ngehnin peren?
3 Mehlel, Sehdan kin song en kadipikelekelih kitail de kapwande kitailla ni atail tang marahra nan weiro. (Kaudial 12:17) Oh e sohte mengei en wie tangatang pwehki mahwen kan, lehk en mwenge, soumwahu lusulus kan, oh kahpwal teikan koaros me kin wia kilel en imwin rahn. (Madiu 24:3-9; Luk 21:11; 2 Timoty 3:1-5) Mendahki met, mohngiongatail kan kin luski peren ni en imwin weiro kin kerenlahng imwisekla. Se kin song kasalehda ngehno me Pohl kangoangehki ienge Kristian kan en ah mwehio en ahneki: “Kumwail en pereperen ahnsou koaros nan amwail miniminiong Kauno. I pil pahn pwurehng kosoia: kumwail en pereperen!”—Pilipai 4:4.
4. Soahngen ngehn dahieu Kristian mehn Pilipai kan en kasalehda?
4 Sohte peikidpe me Kristian kan me Pohl mahsanihong mahsan ko kin diarada peren nan arail pwoson, pwehki Pohl padahkiong irail: “Kaukaule pereperen ni amwail miniminiong Kauno.” (Pilipai 3:1) Mehn Pilipai kan iei mwomwohdiso ehu me kin kasalehda kadek, limpoak, me kin papah ni ngoang oh eimah. (Pilipai 1:3-5; 4:10, 14-20) Ahpw kaidehn Kristian en senturi keiou koaros kin ahneki soahngen ngehno. Karaspe ehu, ekei Kristian mehn Suhs kan me Pohl ntingihwohng pwuhk en Ipru kin wiahda kahpwal akan.
“Ngoangki Kapwaiada Mwahu”
5. (a) Soahngen ngehn dahieu Kristian mehn Ipru kan ahneki ni ahnsou me tepin mwomwohdisohn Kristian kakauda? (b) Kasalehda soahngen ngehn me ekei Kristian mehn Ipru kan ahneki mpen sounpar 60 C.E.?
5 Tepin mwomwohdisohn Kristian nan poadoapoad en sampah kin wiawikihda pwilidak en mehn Suhs oh irail kan me wekiong lamalam en mehn Suhs (proselytes) oh e kakauda nan Serusalem nan pahr 33 C.E. Soahngen ngehn dah me mwomwohdiso ahneki? Emen pahn wadekte irelaud keiou kan en pwuhk en Wiewia oh sukuhlki duwen arail ngoang, oh peren, mendahki kalokolok kan. (Wiewia 2:44-47; 4:32-34; 5:41; 6:7) Ahpw, mwurin sounpar tohto, irairo wikila, oh Kristian mehn Suhs tohto sansal me re wawaila nan arail weirentang en mour. Ehu pwuhk kosoia met duwen arail irair me wiawi nan pahr 60 C.E.: “Irair en dangahnga oh pwang, irair en nsensuwed pwe dahme re kasik sohte pweida, koapwoaroapwoar kan me sohte pweida, pein nsenkihda soh pweida kan oh sohla kamehlele iren mour en ehu ehu rahn. Re wia Kristain kei ahpw solahr ahr kalahnganki lingan en arail mour nanleng.” Iaduwen Kristian keidi kan lelohng nan soahngen irairo? Medemedewe kisehn nein Pohl kisinlikou ong mehn Ipru kan (ntingdi mpen pahr 61 C.E.) pahn sewese kitail koaros rahnwet en liksang mihla nan soahngen irairohte en luwetla ni pali ngehn.
6. Ia wekpeseng kan en kaudek pahn Kosonned en Moses oh kaudek me poahsonda pohn pwoson Sises Krais?
6 Kristian mehn Ipru kan kohsang pelien lamalam en Suhs, koasoandi ehu me kin kose me re kin peikiong Kosonnedo me Siohwa ketikihong Moses. Kristian mehn Suhs tohto kin kaukaule kolokolte Kosonnedo, ele pwehki erein sounpar epwiki kei Kosonnedo kelepw me kin wia elen pwarwohng Siohwa, oh e kin wia koasoandi kaselel en kaudek, me audaudki koasoandi en samworo, meirong kaukaule kan, oh ahneki tehnpas ehu nan Serusalem me ndand nan sampah. Pelien lamalam en Kristian me tohrohr sang kaudek teikan. E poahsonda pohn lamalam ngehnin, duwehte me Moses ahneki, me “kilikilengwohngete keting me pahn kohdo” oh “wohnlahte mwowe nan eh seilok, likamwete e kilang Koht me soh sansal.” (Ipru 11:26, 27) E sansal me Kristian mehn Suhs tohto sohte ahneki soahngen madamadau wet en pali ngehn. Re mwomwen pilingek ah kaidehn tangatang idipek nan weirentang en mour ni mwohmw ehu me mie katepe.
7. Iaduwen koasoandio me kitail kohsang loale kin kamwekid mwomwen atail tang nan weirentang en mour?
7 Mie irair ehu rahnwet me duwehte met? Eri, ni sohpeikidpe, irair en rahnwet sohte uhdahn duwehte. Mendahki met, Kristian kan kohsang nan koasoandi en mehkan me kin wiahda suwei laud kan. Sampah kin kihda ahnsou mwahu kaperen kan, ahpw, ni ahnsowohte, e kin kihda pwukoa toutou kan pohn aramas akan. Patohngete met, pali moron en kitail kin momour nan sahpw kan me lamalam en peikasal kin paraparla ie oh wasa me aramas kan kin ahneki lamalam en roporop en ngehi-mahs. Ma kitail mweidohng pein kitail en mihla pahn soahngen koasoandi wet, ‘mesen mohngiongatail,’ pahn mengei en kunsla. (Episos 1:18) Iaduwen atail pahn kak tang mwahu nan weirentang en mour ma kitail sohte kak kilang sansal iawasa kitail tangatangla ie?
8. Ia ekei ahl akan pelien lamalam en Kristian kin ilehsang kaudek pahn Kosonnedo?
8 Pwehn kak kamwekidada Kristian mehn Suhs akan, Pohl katamankin irail duwen koasoandi en Kristian ah ilehsang Kosonned en Moses. Mehlel, ni ahnsou me pwilidak en mehn Israel kan kin wiawihkihdahte sapwellimen Siohwa aramas kan pahn Kosonnedo, Siohwa kin mahsan ong irail ki soukohp sarawi kan. Ahpw, Pohl mahsanih, me rahnwet e kin ketin lohkihda sapwellime mahsan “ki Iehros menet, iei ih me Koht ketin wiahkihda nanleng oh sampah pokon.” (Ipru 1:2) Pil ehu, Sises lapalap sang nanmwarki kan koaros en kadaudek en Depit, “ienge kan.” E pil ilehsang tohnleng kan.—Ipru 1:5, 6, 9.
9. Dahme karehda kitail, me duwehte mehn Suhs kan ni mwein Pohl, anahne “ngoangki kapwaiada mwahu” dahme Siohwa mahsanih?
9 Ihme karehda, Pohl kaweidki rie mehn Suhs Kristian kan: “Ihme karehda e konehng mehlel kitail en ngoangki kapwaiada mwahu padahk kan me kitail rongehr, pwe kitail dehr katiasang mour soutuk.” (Ipru 2:1) Mendahki sukuhlki duwen Krais kin wia kapai kaselel ehu, re anahne wia mehkot laud sang met. Re anahne tehk ni keneinei Mahsan en Koht pwehn kak pelianki lamalam en mehn Suhs kan me kapilirailpene. Kitail pil anahne “ngoangki kapwaiada mehlel” dahme Siohwa mahsanih me pid padahk en sampah me kitail kin lelohng. Met kin wehwehki me kitail en kekeirada tiahk mwahu en onop Paipel oh kolokolte koasoandi mwahu en wadek Paipel. Nin duwen me Pohl mahsanih mwuri nan nah kisinlikou ong mehn Ipru kan, e pil kin wehwehki iang towehda mihding kan kaukaule, oh kalohki atail pwoson ong meteikan. (Ipru 10:23-25) Soahngen wiewia pwukat pahn sewese kitail en mwasamwasahn ni pali ngehn pwe kitail en dehr katiasang atail koapwoaroapwoar kaselelo. Ma kitail kadirehkihla atail lamalam madamadau kan en Siohwa, kitail sohte pahn toutoukihla pwupwkihdi dahme sampah wet kak wiahiong kitail.—Melkahka 1:1-3; Lepin Padahk 3:1-6.
“En Sewese Emen Emen”
10. (a) Dahme kak wiawi ong emen me sohte kin tehk kanaiong Mahsan en Siohwa? (b) Iaduwen kitail kak “kaukaule sewese emen emen”?
10 Ma kitail sohte kin tehk kanaiong me ngehnin kan, eri inou kan en Koht pahn mwomwen sohla mehlel. Met pil wiawi nan tepin pahr kan en Kristian ni ahnsou me mwomwohdiso kan kin keiou wiawihkihda Kristian keidi kan oh ekei wahnpoaron kan kin wie momourte. Pohl panawihki mehn Ipru kan: “Riei souleng ko, kumwail mwasahn pwe emen kumwail dehr nan kapehd suwedla oh soupwosonla, oh kahrehda eh pahn sohpeisang Koht ieias. Eri, ahnsou wet, me wehwehki “Rahnwet” me Pwuhk Sarawi kadokehkin kitail, kumwail en sawaspene rahn koaros, pwe dihp dehr widingeikumwaildi oh kakeptakaikumwailla.” (Ipru 3:12, 13) Mahsan en Pohl en “mwasahn” kin kasalehda kesempwalpen en mwasamwasahn. Keper kin kauwehla! Soupwoson—“dihp”—kak kekeirada nan mohngiongatail, oh kitail kak mweisang Koht oh sohla kerenih ih. (Seims 4:8) Pohl katamankin kitail “en sewese emen emen.” Kitail anahne limpoak en riatail pwihn en Kristian kan. “Aramas me sohte kin men patehng meteikan kin nsenohkihte pein irail; re kin sapwungki mehkoaros me aramas koaros ese me pwung.” (Lepin Padahk 18:1) Anahnepen soahngen werek wet kin kamwekid Kristian kan nan rahnpwukat en kin iang mihding kan en mwomwohdiso, oh kapokon kan kaukaule.
11, 12. Dahme karehda kitail endehr itarkihte ese padahk mengei kan en Kristian?
11 Mwuri nan nah kisinlikou, Pohl kihda kalaudpen kaweid kesempwal wet: “Pwe lel ahnsou wet e itar kumwail en wiahla sounpadahk; ahpw soh, pwe kumwail anahnehte emen en kin padahkihong kumwail keieun padahk kan duwen mahsen en Koht. Kumwail me saikinte kakohng tungoale kisin tungoal kekeluwak; ihte me kumwail kakohng, pilendihdi. . . Kisin tungoal kekeluwak, iei ih me aramas koahieklahr kan kin tungoale, irail kan me ahnlahr oh eselahr wekpeseng en me mwahu oh me suwed.” (Ipru 5:12-14) E sansal me, ekei Kristian mehn Suhs kan sohte kalaudehla arail loalokong. Re pwand en alehda kalaudepen maraino me pid Kosonnedo oh sirkumwsaia. (Wiewia 15:27-29; Kalesia 2:11-14; 6:12, 13) Ihme re kin kesempwalkihte soahngen tiahk kan me duwehte Sapad oh Rahn en Tomw.—Kalesia 2:16, 17; Ipru 9:1-14.
12 Ihme karehda, Pohl mahsanih: “Eri, kitail doulahng mahs ni mehkan me unsek duwen Krais oh pwilikihdi tepin padahk kan duwen rongamwahuwo.” (Ipru 6:1) Emen soun weirentang me kin kanaiong dahme e kang pahn kak dadaurete nan weirentang apwallo. Me rasehng met, Kristian men me kin tehk kanaiong dahme e kang ni pali ngehn—oh sohte pahn ihte kang mwenge pilen kan, de ‘tepin padahk kan’—pahn kak tangatangete nan weirentango oh kanekehla weiro. (Pil tehk 2 Timoty 4:7) Met kin wehwehki en kekeirada perenki “tehlap en oh reirei en oh ihle en oh loal en” padahk mehlel, pwehn kak kekeirada mahla ni pali ngehn.—Episos 3:18.
“Kumwail Uhdahn Pahn Kanengamah”
13. Iaduwen Kristian mehn Ipru kan kasalehda arail pwoson mahso?
13 Nan ahnsouwo mwurinte Pentocost 33 C.E., Kristian mehn Suhs akan kin kesihnenda teng mendahki uhwong laud kan. (Wiewia 8:1) Ele Pohl kin medemedewe duwen met ni ah ntingihdi: “Kumwail tamanda duwen kumwail mahso. Ni ahnsouwo, mwurin marain en Koht dakerkumwaildahr, apwal tohto lelohng kumwail, ahpw kumwail sohte lohdiong.” (Ipru 10:32) Arail dadaur lelepek kin kasalehda arail poakohng Koht oh kihong irail saledek en koasoai mwohn ih. (1 Sohn 4:17) Pohl panawihki irail en dehr kesehla arail saledek en koasoai pwehki arail soupwoson. E kangoangehkin irail: “Kumwail uhdahn pahn kin kanengamah, pwe kumwail en kapwaiada kupwur en Koht oh ale mehkan me e ketin inoukihong kumwail. Pwe, duwen Pwuhk Sarawi eh mahsanih, ‘Ahnsou tehr kis, a ih me ketiket kohdo pahn leledo; e sohte pahn pwapwand.’”—Ipru 10:35-37.
14. Ire mehlel dah kei anahne sewese kitail en kanengamah mendahki atail pahpa Siohwa erein sounpar tohto?
14 Iaduwen kitail nan rahnpwukat? Pali moron en kitail kin ahneki ngoang ahnsou me kitail ahpwtehn sukuhlki padahk mehlel en Kristian. Kitail ahnekihte soahngen ngoango? De kitail ‘kesehlahr limpoako me kitail tepin ahneki’? (Kaudial 2:4) Atail pwoson loulahr, ele kitail lemeleme me atail koapwoaroapwoar pitikitaildi de kitail pwangakihda awih Armakedon? Ahpw, uhdi, oh medemedewe. Padahk mehlel sohte tikitikla ah kaselel sang mahso. Sises wiahte atail Nanmwarki nanleng. Kitail kin koapwoaroapwoarkihte mour soutuk nan paradais nin sampah, oh kitail ahnekihte atail nanpwung mwahu rehn Siohwa. Oh dehr manokehla: “A ih me ketiket kohdo pahn leledo; e sohte pahn pwapwand.”
15. Duwehte Sises, iaduwen ekei Kristian kan kanengamah pahn kalokolok kehlail kan?
15 Ihme karehda, mahsan en Pohl me kileledi nan Ipru 12:1, 2 me inenen konehng: “Eri, kitail kesehsang kitail mehkoaros me kerempwai kitail, oh dihp me kin salihkitaildi, oh kitail en nantihong nan atail mour me kitail tapihadahr, rasehng atail kin tang kehlail ni atail kin weirentang. Kitail kainenehiongete kapehditail kan ong Sises, me tepin atail pwoson oh me kaunsekala atail pwoson. E sohte ketin mwosurkihla lokolok en tuhkeo! A, pwehki peren me e kasikasik, e sohte mwahn kupwurohkihla kanamenekpen eh pahn pwoula nin tuhkeo; eri ahnsou wet e ketiketier ni palimaun en mwoalen Koht.” Mie soahng tohto me ladu kan en Koht kin kanangamah pah nan imwin rahn pwukat. Duwehte Sises, me lelepek lau e matala ni lokolok, ekei riatail Kristian kan kin ni lelepek dadaurete kalokolok kan me inenen lemei—duwehte seldi nan imweteng kehlail kan, kalokolok, ahngkehlaildi, iangahki kamakamla. (1 Piter 2:21) Mohngiongatail soh kin dirkihla limpoak ong irail ni atail kin medemedewe arail loalopwoat?
16, 17. (a) Kahpwal dah kei ong atail pwoson me Kristian tohto kin peiong? (b) Tamataman dahkot pahn sewese kitail en tangatangete nan weirentang en mour?
16 Ahpw, ong Kristian tohto, pouslahn mahsan en Pohl kin kadoadoahk: “Pwe ni amwail kin uhwong dihp oh pelianda, kumwail saikinte lel ahnsoun mehkihla.” (Ipru 12:4) Mendahki met, nan koasoandi wet elen padahk mehlel sohte kin mengei ong kitail koaros. Ekei kin mworuskihla “kailok me e ketin alehsang rehn me dipan akan” nan wasahn doadoahk de nan sukuhl, de en kanangamah pahn kepit kan de en pelian kasongosong en wiahda dihp. (Ipru 12:3) Kasongosong kehlail kan kin kaluwetehla nannanti en ekei en kolokolte sapwellimen Koht kosonned ile kan. (Ipru 13:4, 5) Irail kan me kin uhwong padahk mehlel kin kauwe ngehnin touparek en ekei me kin rong ahr padahk likamw akan. (Ipru 13:9) Wekpeseng en irair kan kin karehong meteikan en sohla peren. Nohn mwohnekihla mehn kamweit kan oh wiewiahn mwadong kan kin kaluwetehla ekei Kristian kan. Oh me tohto kin pwunodki kahpwal kan en mour nan koasoandi wet en mehkan.
17 Mehlel, sohte ehu irair pwukat me kin wiawihda pwehn ‘lel ahnsoun mehkihla.’ Oh ekei irair kan ele kin kohsang koasoandi sapwung kan me pein kitail wiahda. Ahpw irair pwukat koaros kin wiahda kahpwal ong atail pwoson. Ihme karehda kitail en kilangwohngete kalimeng kaselel en Sises en kanengamah. Kitail en dehr manokehla ia uwen kaselel en atail koapwoaroapwoar. Kitail en dehpa katiasang dahme kitail kin kamehlele me Siohwa “kin ketin katingih irail kan me kin raparapahki.” (Ipru 11:6) Eri, kitail pahn ahneki kehl en pali ngehn en kaukaulehte tangatang nan weirentang en mour.
Kitail Kak Kanengamah
18, 19. Wiewia dah kei nan poadoapoad kasalehda me Kristian mehn Ipru kan nan Serusalem kin kapwaiada kaweid sarawi en Pohl?
18 Iaduwen Kristian mehn Suhs kan mwekidki nein Pohl kisinlikouwo? Mpen sounpar weneu mwurin kisinlikouwo ong mehn Ipru kan ntingdi, Sudia kin wie mahmahwen. Nan pahr 66 C.E., sounpei en Rom kan kalowehdi Serusalem, oh kapwaiada mahsan en Sises: “Ni amwail pahn kilang karis en sounpei kei me kapilpenehr Serusalem, kumwail pahn esehki me ahnsoun eh ohla kerendohr.” (Luk 21:20) Ahpw, ong kamwahupen Kristian kan me pahn mih nan Serusalem nan ahnsouwo, Sises mahsanih: “Eri, ni ahnsouwo irail kan me mihmi nan Sudia, re en sopolahng pohn dohl kan; oh me mihmi nan kahnimwo, re en sopohsang loale; oh me mihmi nansapw, re dehpa pwurolong nan kahnimwo.” (Luk 21:21) Ihme kahrehda mahwen me re wiahiong mehn Rom kin kapwarehda kasongosong ehu: Irail Kristian mehn Suhs kan pahn kesehla Serusalem, poahson en kaudek en mehn Suhs kan oh wasahn tehnpas lingano?
19 Mwadangete, ni soh karepe sansal, mehn Rom kan pweiekdi. Ele, mehn Suhs sarawi kan kin kilangwohng met me iei kilelen en Koht kin ketin pere arail kahnimw sarawio. Iaduwen Kristian kan? Poadoapoad kasalehong kitail me re tangasang wasao. Eri, nan pahr 70 C.E., mehn Rom kan pwuredo oh kauwehla douluhl Serusalem ni ahr kemehla aramas tohto. “Rahn en Siohwa” me Soel kohpada pweidahier pohn Serusalem. Ahpw Kristian lelepek kan solahr mih wasao. Re pitla ni ahr tangasang wasao.—Soel 2:30-32; Wiewia 2:16-21.
20. Ni atail ese me “rahn lapalap en Siohwa” kerendohr pahn kamwekid kitail ni ahl dah kei?
20 Rahnwet, kitail ese me ehu “rahn en Siohwa” pahn ahnsou keren lelohng koasoandi wet en mehkan. (Soel 3:12-14) Kitail sohte ese iahd me rahno pahn kohdo. Ahpw Mahsan en Koht kihong kitail koapwoaroapwoar me e pahn kohdo! Siohwa mahsanih me e sohte pahn pwand. (Apakuk 2:3; 2 Piter 3:9, 10) Ihme karehda, kitail en “ngoangki kapwaiada mwahu padahk kan me kitail rongehr.” Kitail en liksang soupwoson, “dihp me kin salihkitaildi.” En nantiong dadaur uwen reirein ahnsouwo. Tamataman, sapwellimen Siohwa pwihn en nanleng me rasehng kuruma lapalap ehu kin mwekidwei. E pahn kapwaiada kupwure. Eri, kitail koaros en wie tangatangte oh dehr uhdi nan weirentang en mour!
Komw Tamataman?
◻ Kapwaiada peneu dahieu en Pohl ong mehn Pilipai kan pahn sewese kitail en dadaurete nan weirentang en mour?
◻ Dahme pahn sewese kitail en pelian lamalam en sampah wet en kauhdi kitail?
◻ Iaduwen kitail kak sewese emen emen pwehn kak kanangamah nan weirentango?
◻ Ia ekei soahng kan me kak kapwandehla emen Kristian?
◻ Iaduwen kalimeng en Sises kak sewese kitail en kanangamah?
[Kilel nan pali 8, 9]
Kristian men endehr mweidohng mehkan me sampah wet kin kihda en koarompwa ih en uhdisang tangatang nan weirentang en mour
[Kilel nan pali 10]
Sohte mehkot me kak peredihsang sapwellimen Siohwa kuruma lapalap sang en kapwaiada kupwure