Kasikasik Rahn En Siohwa
“Sounkepit kan pahn pwarada ni imwin rahn.”—2 PITER 3:3.
1. Soahngen irair karuwaru dah me Kristian kan en rahnwet kin ahneki?
EMEN sounkalohk me kalohkiehr sounpar daulih 66 ntingihdi: “I kin ahnsou koaros ahneki pepehm en karuaru. Nan ahi lamalam, Armakedon pahn wiawi lakapw. (Kaudial 16:14, 16) Duwehte ahi pahpa, oh ah pahpa, I kin mourki ahi mour nin duwen me wahnpoaron [Piter] kangoangehki, ‘en kasikasik rahn en Siohwa.’ I kin ahnsou koaros kilangwohng inoun sampah kapwo nin duwen ‘kamehlele mehkan me kitail sohte kak kilangki masatail.’”—2 Piter 3:11, 12; Ipru 11:1; Aiseia 11:6-9; Kaudial 21:3, 4.
2. Ia wehwehn en kasikasik rahn en Siohwa?
2 Mahsan en Piter en “kasikasik” rahn en Siohwa kin wehwehki me kitail endehr manokehla met. Kitail endehr manokehla me rahn me Siohwa pahn kauwehla koasoandi wet en mehkan me pahn wia kaunopada ehu ong kakaudahn sapwellime inoun sampah kapwo inenen keren. Met anahne wia mehkot me uhdahn mehlelohng kitail me kitail kak kilang sansal, me mihte mwohtail. Ih duwen met e uhdahn wia mehkot me mehlelohng sapwellimen Koht soukohp kan en mahs, oh re kin kalap koasoia me e kerendohr.—Aiseia 13:6; Soel 1:15; 2:1; Opadaia 15; Sepanaia 1:7, 14.
3. Dahme ni sansal kamwekidada kaweid en Piter me pid rahn en Siohwa?
3 Dahme karehda Piter kangoangehki kitail en kilangwohng rahn en Siohwa me e uhdahn pahn kohdo, me duwehte, “lakapw”? Pwehki ekei ni sansal kin tepiada kepitiki padahk en ketier en Krais inoudao me erein ahnsouwo me suwed kan pahn ale kalokeparail. (2 Piter 3:3, 4) Ihme karehda nan irelaud 3 en nah kisinlikou keriau, me kitail pahn ahnsouwet tehkpene, Piter kin sapengla karaun kan en sounkepit pwukat.
Pekipek Limpoak en Tamatamante
4. Dahme Piter men kitail en tamatamante?
4 En Piter limpoak ong rie Kristian kan kin sansal sang ah kalap ekerkin irail nan irelaud wet “koampoakepahi ko.” Ni ah kin ni limpoak wie pekipek rehrail endehr manokehla dahme re padahngkier, Piter tepkihda: “Koampoakepahi kan, . . . kuwail tamanda mahsen en soukohp ako me wiawiher kawao oh kosonned en Kauno oh Sounkomour me amwail wahnpoaron ko kihong kumwail.”—2 Piter 3:1, 2, 8, 14, 17; Sud 17.
5. Dahme ekei soukohp kan koasoiahki duwen rahn en Siohwa?
5 “Mahsen en soukohp” dah kei Piter kangoangehki irail kan me wadek nah kisinlikou wet en tamatamante? Duwen ketier en Krais nan manaman en Wehi oh duwen kadeik en me dohsang Koht akan. Piter mwowe kasalehdahr mahsan pwukat. (2 Piter 1:16-19; 2:3-10) Sud kin kosoia duwen Enok, me wia tepin soukohp me Paipel ntingihdi duwen ah panauwihki kadeik en Koht pohn me suwed kan. (Sud 14, 15) Soukohp teikan idawenla kalimeng en Enok, oh Piter sohte men kitail en manokehla dahme re intingihdi.—Aiseia 66:15, 16; Sepanaia 1:15-18; Sakaraia 14:6-9.
6. Mahsan dah kan en Krais oh sapwellime wahnpoaron kan kin kamarainkin kitail duwen rahn en Siohwa?
6 Patohngete met, Piter padahkihong irail kan me kin wadek nah kisinlikou en tamatamante “kosonned en Kauno oh Sounkomouro.” Kosonned en Sises kin oarepene peneuo: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail, oh pwunod kan en sampah wet . . . pwe rahno kakete leledohng kumwail ni ahnsou mwadang duwehte nsar ehu.” “Kumwail mwasamwasahn oh pepehd, pwe kumwail sehse ahnsawi.” (Luk 21:34-36; Mark 13:33) Piter pil kangoangehkin kitail en kapwaiada mahsan kan en wahnpoaron ko. Karaspe ehu, wahnpoaron Pohl, ntingihdi: “Rahnen Kauno (Siohwa) pahn leledo rasehng lipirap emen me kin pwarodo nipwong. Eri, kitail dehr memeir duwehte meteikan ahpw kitail pepehd oh onohnop.”—1 Deselonika 5:2, 6.
Ineng Kan en Sounkepit kan
7, 8. (a) Soahngen ohl dah kei irail ko me kin kepitki rong en peneu kan en Koht? (b) Dahme sounkepit kan kin kose?
7 Duwen me sansalehr mwowe, karepen Piter kihda peneuo iei pwe ekei tepiadahr kouruhrki soahngen peneu pwukat, duwehte mehn Israel kan en mahs me kin kapailokehki met sapwellimen Siohwa soukohp kan. (2 Kronikel 36:16) Piter kawehwe: “Mwohn mehkoaros, kumwail en ese pwe ni imwin ahnsou kan aramas ekei pahn pwarodo me pahn kin kaweidki ar mour pein ar ineng suwed kan.” (2 Piter 3:3) Sud mahsanih me ineng en sounkepit pwukat iei en “weweidki pein ar ineng suwed kan.” E kahdanekin irail “me kin kaweidkihte pein irail ineng en sampah, a kaidehn Ngehnen Koht.”—Sud 17-19.
8 Sounpadahk likamw kan me Piter mahsanih me re kin “kapwaiada ineng pwelipwel en paliwararail kan” kin iang kisehn irail sounkepit pwukat me sohte arail pali ngehn. (2 Piter 2:1, 10, 14) Re kin kapailok kalelepek rehn Kristian lelepek kan: “E soh inoukihong kumwail me e pahn pwurodo? Eri, ia ih? Samatail ko melahr, a mehkoaros duweduwehte sang nin tepin sampah eh wiawihda.”—2 Piter 3:4.
9. (a) Dahme karehda sounkepit kan kin songosong en kapwandekihla irair en karuwaru me pwilsang Mahsan en Koht? (b) Iaduwen en kasikasik rahn en Siohwa kin wia perepe ehu ong kitail?
9 Dahme karehda re kin kepitkiki? Dahme karehda re kin kose me dene ketier en Krais sohte pahn wiawi, oh me Koht sohte kedirepe nan wiewiahn tohnsampah oh me e sohte pahn wia met? Eri, ni ahr kin kapwandehla irair en karuaru me pwilsang Mahsan en Koht, irail sounkepit pwukat me rasehng mahn lawalo kin rapahki pwehn kameirla meteikan ong nan irair en soukautih en pali ngehn oh eri karehong ren mengeiong lohdiong widing roporop kan. Ia uwen met wia mehn kangoang kehlail ehu ong kitail rahnwet en pepehdte ni pali ngehn! Kitail en kasikasik rahn en Siohwa oh ahnsou koaros tamataman me sihlangih kin kilikilang kitail! Eri kitail pahn mwekidki en papah Siohwa ni ngoang oh kolokolte atail tiahk mwakelekel.—Melkahka 11:4; Aiseia 29:15; Esekiel 8:12; 12:27; Sepanaia 1:12.
Pein Nsenki oh Kailok
10. Iaduwen Piter kadehdehda me sounkepit kan me sapwung?
10 Soahngen sounkepit pwukat pohnsowehla ire kesempwal ehu. Re pein nsenki pohnsowehla met oh song karehong meteikan en manokehla duwen met. Dahme karehda? Pwehn mengeiong pitihdi aramas kan. Piter ntingihdi: “Pwe, nin duwen ar ineng, re sohte men ese ire mehlel wet.” Ire mehlel dahieu? “Duwen Koht eh ketin mahsenier kawao, oh duwen nanleng oh sampah eh wiawihkihda mahseno, duwen sampah eh pwarada oh wiawihda sang pihl oh nan pihl, oh duwen eh ohkihla pihl kawao, iei pilen Nohlik Lapalapo.” (2 Piter 3:5, 6) Ehi, Siohwa kasorasang pohn sampah me suwed kan erein Nohliko ni mwein Noha, ire mehlel ehu me Sises pil kasalehda. (Madiu 24:37-39; Luk 17:26, 27; 2 Piter 2:5) Ihme, weksang dahme sounkepit kan koasoia, soahng koaros sohte “duweduwehte sang nin tepin sampah eh wiawihda.”
11. Dahme Kristian kan en mahs kin kasik nohn mwadangala me karehong ekei en kepitkin irail?
11 Sounkepit kan kin kapailoke Kristian lelepek kan pwehki dahme irail pwukat kin kasikasik saikinte pweida. Mwohnte Sises mehla, sapwellime tohnpadahk kan “kin lemeleme me Wehin Koht nektehn pahn sansalda.” Eri, mwurin ah kaiasada re kalelepek ma Wehin Koht pahn mwadang kakauda. Pil ehu, mpen sounpar eisek mwohn Piter ntingihdi nah kisinlikou keriau, ekei kin “kedirepwkihda” pwehki “koasoi ehu” de “kisinlikou ehu,” me dene kohsang rehn wahnpoaron Pohl de ienge kan, me dene “Rahnen Kauno (Siohwa) leledohr.” (Luk 19:11; 2 Deselonika 2:2; Wiewia 1:6) Ahpw, dahme tohnpadahk kan en Sises kin kasikasik sohte likamw, ihte e mwadangala ahnsouwo me re kasik ong soahng pwukat. Rahn en Siohwa pahn kohdo!
Mahsan En Koht Me Likilik
12. Iaduwen Mahsan en Koht kin sansalda me e likilik nan ah kokohp akan duwen “rahn en Siohwa”?
12 Duwen me sansalda mwowe, soukohp kan en mahs kin kalap panawihki me rahn en dupuk en Siohwa kerendohr. “Rahn en Siohwa” wiawi ni ahl tikitik ehu nan pahr 607 B.C.E. ni ahnsou me Siohwa kaloke sapwellime aramas keptakai kan. (Sepanaia 1:14-18) Mwuri, wehi teikan, iangahki Papilon oh Isip, pil ale lokolok ni ehu “rahn en Siohwa.” (Aiseia 13:6-9; Seremaia 46:1-10; Opadaia 15) Paipel pil kohpada duwen koasoandi en mehn Suhs kan en tepin pahr ah pahn imwisekla, oh e pweida ni ahnsou me sounpei kan en Rom kauwehla Sudia nan pahr 70 C.E. (Luk 19:41-44; 1 Piter 4:7) Ahpw Piter kin idialahng ehu “rahn en Siohwa” me kohkohdo, ehu me Nohliko uhdahn tikitiklahsang ni ira kapahrekpene!
13. Karasaras en poadoapoad dahieu kasalehda me imwin koasoandi wet en mehkan uhdahn miehiehr?
13 Piter kasalehda duwen ohlao me kohkohdo, mahsanih: “Ahpw ki mahsanohte.” E ahpwtehn koasoia me “ki mahsan en Koht,” sampaho mwohn Nohliko kohdasang “pihl oh nan pihl.” Irair wet me Paipel koasoiahki kapikipiko, karehda Nohliko en mie ni ahnsou me pihl wudekidi sang ni kaweid en Koht, de mahsan en Koht. Piter pousehla mahsanih: “Ahpw, nanleng oh sampah en ahnsou wet mihmiheki mahsenohte en Koht oh wie nekinek ong ni ahnsou re pahn ohkihla kisiniei. Re wie nekinek ong rahnen kadeik, iei rahnen kamwomwmwomwlahn me suwed kan.” (2 Piter 3:5-7; Senesis 1:6-8) Kitail naineki mahsan likilik en Koht ong met! E pahn kaimwsekla “lahng oh sampah”—koasoandi wet en mehkan—nan engieng en sapwellime rahn lapalap! (Sepanaia 3:8) Ahpw iahd?
Ngoangki Imwio En Kohdo
14. Dahme karehda kitail kak koapwoaroapwoarki me kitail ahnsouwet momour ni “imwin rahn akan”?
14 Tohnpadahk kan en Sises men ese iahd imwio pahn kohdo, ihme re kalelepek reh: “Kilel dahkei me pahn kasalehda ahnsoun omwi pahn ketiehr oh imwin sampah?” E sansal me re kin kalelepek duwen iahd me koasoandi en mehn Suhs pahn imwisekla, ahpw pasepeng en Sises kin keiou doakedoake ahnsou me ‘lahng oh sampah’ en ahnsouwet pahn lelohng ohla. Sises kohpada soahng pwukat duwehte mahwen lapalap, lehk en mwenge, rerrer en sahpw, soumwahu oh mwersuwed. (Madiu 24:3-14, NW ; Luk 21:5-36) Sangete nan pahro 1914, kitail kilangehr kilelo ah pweida me Sises ketikihda ong “kaimwseklahn koasoandi en mahkan” iangahki soahng kan me wahnpoaron Pohl kosoia me pahn kadehdehda “imwin rahn.” (2 Timoty 3:1-5) Ni mehlel, mehn kadehdeho inenen sansal me kitail momour ni ahnsoun imwin koasoandi wet en mehkan!
15. Dahme Kristian kan kalap wia mendahkihla peneu en Sises?
15 Sounkadehde kan en Siohwa kin ngoangki men ese iahd me rahn en Siohwa pahn wiawi. Pwehki arail ngoangkihla re kin ekei pak songosong en kapata iahd me e pahn kohdo. Ahpw ni arail wia met, re kin duwehte tohnpadahk kan en Sises mahso, me sohte kin kapwaiada peneu en arail Soumas me kitail “sehse ahnsawi.” (Mark 13:32, 33) Sounkepit kan kin kapailoke Kristian lelepek kan pwehki ahnsou me re kin kasik me iei rahno sohte kin pweid. (2 Piter 3:3, 4) Mendahki met, Piter kadehdehda, me rahn en Siohwa pahn kohdo, nin duwen Sapwellime ahnsou.
Anahne Ahneki Lamalam en Siohwa
16. Peneu dahieu kitail en ni loaloakong kapwaiada?
16 Kitail anahne ahneki lamalam en Siohwa me pid ahnsou, nin duwen me Piter ahnsouwet katamankin kitail: “A kumwail, koampoakepahi ko, kumwail dehr manokehla mehkotet: duwen mwohn silangin Koht (Siohwa), rahnteieu oh sounpar kid ara raspenehte, oh duwen sounpar kid eh duwehte rahnteieu rehn Koht.” Ia uwen mwotomwot en atail mour en sounpar 70 de 80 ma kapahrekiong met! (2 Piter 3:8; Melkahka 90:4,10) Eri ma pweidahn inou kan en Koht kin mwomwen pwapwand, kitail anahne pwungki peneu en soukohp en Koht: “Mehnda ma e pahn pwand, ahpw awiawihte; pwe e pahn pweida ni ahnsawi; oh e sohte pahn pwand.”—Apakuk 2:3.
17. Mendahki imwin rahn akan kin wia reireila sang dahme me tohto kin kasikasik, dahme kitail kak koapwoaroapwoarki?
17 Dahme karehda imwin rahn en koasoandi wet wie reireila sang dahme aramas tohto kin kasikasik? Ong karepe mwahu ehu, nin duwen me Piter mwuri kawehwe: “Kauno (Siohwa) sohte kin ketin pwapwand ni wiepen sapwellime inou, duwen ekei ar kin lemeleme. Ahpw e kin ketin kanengamahiong kumwail, pwehki e sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” (2 Piter 3:9) Siohwa kin ketin nsenohki dahme pahn mwahuong tohnsampah. E kin nsenohki mour en aramas, nin duwen me e mahsanih: “I sohte kin kupwurperenki mehlahn aramas dipan. Ahpw en wiliakapwasang eh suwed pwe en mour.” (Esekiel 33:11) Ihme kitail kak koapwoaroapwoarki me imwio pahn kohdo ni ahnsouwo me kileleohng pwehn kapwaiada kupwuren atail Sounkapikada erpit oh limpoako!
Dahme Pahn Sohrala?
18, 19. (a) Dahme karehda Siohwa kupwurki en kasorala koasoandi wet en mehkan? (b) Iaduwen Piter kasalehda duwen imwin koasoandi wet en mehkan, oh dahme uhdahn pahn kasorala?
18 Pwehki Siohwa kin uhdahn poakepoake irail kan me kin papah ih, e pahn kamwakelehsang irail ko koaros me kin kareheong irail pwukat pahtou. (Melkahka 37: 9-11, 29) En tehk, duwen me Piter wia mwowe, me ohla wet pahn kohdo ni ahnsou ehu me re sohte ese, Piter ntingihdi: “Eri, Rahnen Kauno (Siohwa) pahn leledo duwehte lipirap emen. Ni rahno, lahng pahn sohrala ni ngihl kamasepwehk, audepen pahnlahng pahn roangala, ohkihla kisiniei, oh sampah iangahki audepe kan koaros pahn sohrala.” (2 Piter 3:10; 1 Deselonika 5:2) Weren lahng oh sampah sohte ohla nan Nohliko, oh ira sohte pahn pil ohla erein rahn en Siohwa. Eri, dahkot, me pahn “sohrala,” de ohla?
19 Koperment en aramas me kakaun tohnsampah kin rasehng “lahng” me pahn ohla oh iangahki “sampah,” de koasoandi en aramas dohsang Koht akan. “Ngihl kamasepwehk” ele kin kasalehda wekiwekla mwadang en lahng kan. “Audepen pahnlahng” me wiawikihda koasoandi en aramas en rahnwet pahn “ohkihla kisiniei,” de ohla. Oh “sampaho,” iangahki “audepe kan koaros,” pahn “sohrala.” Siohwa ni mwuledek pahn kasalehda wiewia suwed en aramas kan ni ah pahn wahdohng koasoandi en sampah ohla me warohng irail.
Kilikilangwohngete Ahmw Koapwoaroapwoar
20. Iaduwen atail mour en mwekidki atail wehwehki duwen wiewia kan me mihmi mwowe?
20 Pwehki wiewia kapwuriamwei pwukat kerendohr, Piter mahsanih me kitail anahne pidada nan “mour mwakelekel oh kasarawihong Koht, ni atail kasikasik Rahnen Siohwa.” Sohte peikidpen met! “Me lahng pahn roangala oh ohkihla kisiniei, oh audepen pahnlahng pahn peikipeseng karakar mwuledek.” (2 Piter 3:11, 12) Ire mehlelo me wiewia kapwuriamwei pwukat kak wiawi lakapw pahn kamwekid soahng koaros me kitail wia de pilahn en wia.
21. Dahme pahn uhd wiliandi lahng oh sampah en ahnsouwet?
21 Piter ahnsouwet padahkiong kitail dahme pahn uhd wiliandi koasoandi meringo ni ah mahsanih: “Eri, kitail koapwoaroapwoar oh awiawih lahng kapw oh sampah kapw, wasa me pwungen kalahngan en Koht pahn poadada ie poatopoat, duwen eh ketin inoukidahr.” (2 Piter 3:13; Aiseia 65:17) Ia uwen met wia mehkot kansenamwahu! Koperment en “lahng kapw” pahn wiawihkihda Krais oh sapwellime 144,000 me pahn iang ih kaunda, oh “sampah kapwo” pahn wiawihkihda aramas kan me pitsang imwin sampah wet.—1 Sohn 2:17; Kaudial 5:9, 10; 14:1, 3.
Kolokolte Irair en Karuwaru oh Tiahk Mwakelekel
22. (a) Dahme pahn sewese kitail liksang mweimweila oh saminla ni pali ngehn? (b) Keper dahieu Piter panawihki?
22 Piter pousehla mahsanih: “Eri, koampoakepahi ko, nindoken amwail kasikasik Rahno, kumwail wia uwen me kumwail kak pwe kumwail en kin mwakelekel oh pwung mwohn silangen Koht oh ni kapehd popohl. Kumwail tehk mwahu sapwellimen Koht kanengamah ong kumwail ni eh ketikihong kumwail ahnsou mwahu en ale komour.” Ni atail kin awiawih oh kasikasik oh kilikilangwohng pwand en rahn en Siohwa me iei kasalepen kanengamah en Koht e pahn sewese kitail en liksang mwaimwai de samin en pali ngehn. Ahpw, miehte keper! Piter panawihki me nan nting kan en “riatail koampoake Pohl . . . mie ekei wasa kan me apwal en kawehwehda, oh me soaloalokong kan oh me kohweikohdo kan kin kawehwehda sapwung, duwehte ar kin wiahiong wasa teikan en nan Pwuhk Sarawi. Iei duwen ar kin pein wiahiong irail kaupahr.”—2 Piter 3:14-16.
23. Ia kaimwseklahn ahn Piter peneu?
23 Sounpadahk likamw kan ni sansal kin kawehwe sapwung en Pohl ntingih duwen kalahngan en Koht, oh kin doadoahngki met pwehn pwainkihdi wiewia samin kan. Ele Piter kin medemedewe met ni ah ntingihdi ah peneu en kamwurumwur: “Eri, koampoakehpahi ko, ni amwail eseier mepwukat, kumwail kaleke pwe kumwail dehr iangala padahk likamw en aramas suwed pwukat oh pwupwuweisang nan mour teng en amwail pwoson.” Ih eri kaimwsekla nah kisinlikou, kangoangehki: “A kumwail nantihong amwail kalaudehla rehmwail kalahngan en atail Kaun oh Sounkomour Sises Krais oh pil marainkihla ih.”—2 Piter 3:17, 18.
24. Lamalam dahieu ladu kan koaros en Siohwa en ahneki?
24 E sansal me, Piter men kakehle rie Kristian kan. E kupwurki koaros en ahneki lamalamo me Sounkadehde lelepeko me sounpar 82 kasalehda mwowe: “I mourkiehr ahi mour nin duwen me wahnpoarono kangoangehki, ‘en kasikasik en rahn en Siohwa.’ I kin ahnsou koaros kilangwohng inoun sampah kapwo me ‘kamehlele mehkan me kitail sohte kak kilangki masatail.’” Kitail en pil mourki atail mour ni soahngen ahl wette.
Iaduwen Komw Pahn Sapeng?
◻ Ia wehwehn “kasikasik” rahn en Siohwa?
◻ Dahme sounkepit kan kin insenki pohnsowehla, oh pwekida?
◻ Dahme karehda sounkepit kan kin kapailokehki Kristian lelepek kan?
◻ Lamalam dahieu me kitail en kolokolte?
[Kilel nan pali 30]
Kasikasik rahn en Siohwa . . .
[Kilel nan pali 31]
. . . oh sampah kapwo pahn idawendo