Iaduwen Kitail Kak Ale Peren Laud Sang Atail Mihding kan
1 Mihding kan kin kesempwal pwe e kin sewese kitail ni pali ngehn. Ia uwen laud atail peren me pahn kohsang mihding pwukat pahn pid dahme kitail pahn pein wia mwohn mihding kan, ni ahnsoun mihding kan kin wiawi, oh mwuring mihding kan. Iaduwen kitail kak sewese pein kitail oh meteikan en kolokolte atail peren en iang towehda mihding kan?
2 Mwohn Mihding kan: Kaunopada iei ehu ahl kitail kak perenki mihding kan. Ni ahnsou me kitail kin kaunopada mwahu, kitail kin perenki rong kanahieng oh pil iang pasepeng kan. Oh kapataiong met, kitail anahne kaunopada mwahu padahk kan me kohwong kitail, oh akadeiong en wia padahk pwehn kawehwehda ire kesempwal kan ni pwung nin duwen kaweid kan me kin kohwong kitail oh wia padahk me pahn kahrehong sounrongorong kan en perenki rong atail padahk. Kitail pil anahne praktis pak tohto. Pein atail kekeirada oh peren pahn sansalda ma kitail pahn song en wiahda atail pwais en kaperenih irairen mihding kan.—1 Tim. 4:15, 16.
3 Nan Mihding kan: Iang pasepeng nan mihding kan pahn kak sewese kitail en perenkihda mihding kan. Kitail koaros pahn anahne kilangwong padahk kan me kin mweidong tohnmwomwohdiso kan en iang pasepeng nin duwen pein arail pwais kan. Pasepeng kan me kin mwotomwot ahpw koasoia duwen mouren padahko me keieu mwahu. Kitail anahne en tehk ni ahnsou me konehng nan prokram kan en kapataiong ekspiriens kan me kin kangoange kitail. (Lepin Padahk 15:23; Wiewia 15:3) Ni ahnsou me kitail kin wia atail pwais nan mihding kan, kitail anahne koasoi ni ngoang oh kamehlele dahme kitail kin koasoia, wiahda padahk me pahn kahrehong tohnmwomwohdiso kan en perenki rong, oh ni ahl me tohnmwomwohdiso kan pahn kak paiekihda.
4 Mwurin Mihding kan: Koasoiong meteikan ni kadek, rahnamwahu, oh ehukihong meteikan ekei ire kesempwal kan me kitail sukuhliki sang mihding me kitail koaros pahn kak paiekihda. Kasalehda atail perenki kilang me pwulopwul kan, mah kan, oh aramas kapw kan me kin iang pasepeng kan pahn kaminiminpene pirien ni pali ngehnitail. E sohte konehng kitail en kauwe irail akan me kin katiasang mihding kan, ahpw kitail en ehukihong irail atail peren sang mihding kan, oh met pahn kak kangoange irail en iang towehda mihding kan.—Ipru 10:24, 25.
5 Kitail en dehr kihsang pein rehtail sawas laud wet en sewese riatail brother kan. (Rom 1:11, 12) Kitail koaros kak kolokolte atail peren en iang towehda mihding kan en Kristian sang ni atail pahn nantiong song en wia uwen me kitail kak en pein ngoangki en kapwaiada sawas pwukat.