Kitail Soh Rongehr Ire Pwukat Rahn Teio?

¹ Ei! Siohwa kin pwurehng mahsanih duwen ekei ire kesempwal kan nan sapwellime Mahsen pwe sapwellime aramas en pwurehng wadek oh paiekihda. Sises pil kin kapwukapwureong sapwellime padahk kan me pid Wehio. Sapwellimen Sises wahnpoaron ko pil kin kapwukapwureong ire ngehnin kan ong irail me kehlail ni pali ngehn.​—Rom 15:15; 2 Pit. 1:12, 13; 3:1, 2.

² Nan atail ahnsou, sapwellimen Siohwa pwihn kin koasoanehdi me ekei ire kesempwal kan en pwupwurehng pwarada nan mihding kan en mwomwohdiso. Ekei pwuhk kan kitail kin pwupwurehng onop. Ei, e kesempwal en pwurpwurehng rong ire kan me kitail rongehr rahn teiko!

³ En Kalapw Rong Ire Kesempwal kan kin Kaitarala Anahn ehu: Sapwellimen Siohwa kataman kan kin kaloalehla atail wehwehki padahk mehlel, oh kalaudehla atail medemedewe ire kesempwal kan, oh kakehlail atail ineng en men papah Siohwa rahn koaros. (Melkahka 119:129) Ni ahnsou me kitail kin kalapw kousapahlih sapwellimen Koht kosonned akan, e kin duwehte ahnsou me kitail kilang nan kilahs. E kin sewese kitail en kasawihada pein kitail oh pil sewese kitail en dehr “rongete oh manokehla.”​—Seims 1:22-25.

⁴ Ma kitail sohte pahn rong mehn kataman kan me pid padahk mehlel, soahng teikan kak kamwekid mohngiongatail. Sapwellimen Koht mehn kataman kan kin kakehlail kitail en dehr lohdi pahn kasongosong kan me kin kohsang ahn Sehdan sampah. (Mel. 119:2, 3, 99, 133; Pilipai 3:1) Atail kaukaule wadek oh rong mehn kataman kan me kin pid sapwellimen Koht kupwur kan me kin wie pweipweida kin sewese kitail en “pepehd oh mwasamwasahn.” (Mark 13:32-37) Oh pil, atail kaukaule rong padahk mehlel kin sewese kitail en kekeidte nan ahlo me kin kahluwalahng mour soutuk.​—Melkahka 119:144.

⁵ Iaduwen Kitail Kak Paiekihda: Kitail men ahneki ‘ineng en kapwaiada sapwellime Koht kosonned akan.’ (Mel. 119:36) Ma kitail wehwehki me ire ehu pahn pwarada nan atail mihding en mwomwohdiso, kitail en kaunopada mwowe, tehk iren Paipel kan oh medemedewe iaduwen kitail pahn doadoahngki ireo nan atail mour. Oh pil, kitail en kaunopada Kousapahl en Theocratic Ministry School, oh kitail en dehr lemeleme me kitail sohte anahne kaunopada ong Kousapahlo. (Luk 8:18) Kitail en dehr medemedewe me kitail sohte anahne rong kanaieng ire kan pwe kitail rongehr ire pwukat rahn teio.​—Ipru 5:11.

⁶ Kitail en duwehte sounmelkahkao me mahsanih: “I kin perenki idawehn sapwellimomwi kosonned kan sang ei pahn ahneki dipwisou tohto.” (Mel. 119:14) Ei, kitail rongehr duwen ire kesempwal kan rahn teio, oh kitail pahn pwurpwurehng rong ire pwukat ehu rahn. Pwekida? Pwe Siohwa kin ketin mwahngih me kitail anahne kalapw rong ire kesempwal pwukat!