“Lingaling Duwehte Sounkihwei Marain”
1 Mendahki rotorot ni pali ngehn en koasoandi suwed wet kin kapilirailpene, irail tohnkaudok wenerar samwa me kin kaudok ong Siohwa, Koht Mehlel, kin “lingaling duwehte sounkihwei marain” nan sahpw 234 nin sampah. (Pilipai 2:15) Met kin kahrehong aramas teikan en tehk kitail. Ia mwomwen atail kak lingalingki marain en padahk mehlel me kin kohsang Siohwa?—2 Kor. 3:18.
2 Atail Wiewia kan: Aramas akan kin mwadang en tehk atail wiewia kan. (1 Piter 2:12) Emen lih kasawih me emen Sounkadehde me wia ienge tohndoadoahk kin kadek oh kin men sewese meteikan oh e sohte kin lokaia suwed de kouruhr ma emen pahn kamwan suwed. Ni ahnsou me aramas teikan kin doadoahngki lokaia suwed limwahn brothero, e kin meleilei oh sohte kin lohdi ong wia me suwed. Ia mwomwen liho mwekidki met? E tamanda: “I inenen perenki ah wiewia mwahu kan oh pwehki met, I tepida wia peidek kan me pid duwen Paipel. I tepida onop Mahsen en Koht oh mwuri I papidaisla.” E pil kapataiong: “Ah wiewia mwahu kan kamwekid ie en kasawih dahme Sounkadehdehn Siohwa kan kin kamehlele.”
3 E kin sansal me Sounkadehdehn Siohwa kan kin weksang aramas teikan pwehki irail kin wauneki aramas me kin ahneki manaman, oh liksang wiewiahn sampah kan oh pil doadoahngki lokaia me kin mwakelekel oh mwahu oh mehpwukat kin kasalehda me irail kin mourki kosonned en Pwuhk Sarawi. Wiewia mwahu pwukat kin kalinganahda Siohwa oh kin kamwekid meteikan en men papah Ih.
4 Atail Lokaia: Ahpw, ni mehlel, irail me kin kilang atail wiewia mwahu kan kakete sehse dahme kahrehda kitail weksang meteikan ma kitail sohte pahn koasoia duwen dahme kitail kin kamehlele. Iengomw tohnsukuhl kan de iengomw tohndoadoahk kan kin ese me kowe emen Sounkadehdehn Siohwa? Ke kin rapahki ahnsou mwahu en kawekila ahmw koasoakoasoi ong aramas akan oh uhd kalohk ong irail? Ke kin wia uwen me ke kak en mweidohng “ahmw marain en sansal mwohn aramas akan” oh wia met ni ahnsou mwahu koaros?—Madiu 5:14-16.
5 Ma kitail men kapwaiada atail pwukoa nin duwen sounkihwei marain kei, kitail anahne ahneki ngehnin tohnmetei. Oh pil, ma kitail ahneki madamadau me kitail pahn wia uwen me kitail kak nan doadoahk en kalohk, met pahn kamwekid kitail en soikala soahng kan me sohte nohn kesempwal pwehn kalaudehla atail ahnsou nan doadoahk me kin sewese aramas en ale komourparail iei doadoahk en kalohk oh katohnpadahk.—2 Kor. 12:15.
6 Ma kitail men pousehlahte lingalingki marain en padahk mehlel, e pahn sansal sang atail lokaia oh wiewia mwahu kan. Ma kitail pahn wia met, e pahn kak kamwekid aramas teikan en iang kitail kapinga Siohwa.