Tohnleng kan Kin Sewese Kitail
1 “Eri, kumwail en ese pwe I pahn ieiang kumwail ahnsou koaros lel ni imwin koasoandi suwed wet.” Ia uwen kangoang mahsen pwukat ong koaros me kin kapwaiada kehkehlik en Sises wet: “Kumwail eri kohwei wasa koaros oh padahkiong tohn wehi kan koaros; pwe re en wiahla nei tohnpadahk”! (Madiu 28:18-20) Ehu ahl kesempwal me kin kasalehda me Sises kin ieiang kitail iei sang sapwellime tohnleng kan. (Madiu 13:36-43) Ia uwen kaperen en iang tohnleng kan lohkiseli “Rongamwahu”!—Kaudiahl 14:6, 7.
2 Nan Kalohk: Paipel kasalehda me Siohwa kin kadarodo tohnleng kan pwehn iang “kalohk ong irail me pahn ale komour.” (Ipru 1:14) Ni keieu senturi, tohnleng kan kin iang sewese sapwellimen Sises tohnpadahk kan pwehn tuhwong oh kalohk ong irail me kin mwekidki padahk mehlel. (Wiewia 8:26) Rahnwet, sapwellimen Koht ladu kan kin pil kilang mehn kadehde kan me tohnleng kan kin sewese irail. Pak tohto, tohnihmw kan kin nda me re kin kapakap peki sawas oh mwurinte mwo, Sounkadehde kan kin lel ni arail wehnimw kan. Ia uwen kitail, oh pil tohnleng kan, kin peren ni atail kilang irail mwekid ki mahsen en Wehio!—Luk 15:10.
3 Ni Ahnsou me Aramas Kin Uhwong Kitail: Siohwa kin doadoahngki tohnleng kan me “kehlail” en pere Daniel, oh iengen Daniel mwahnakapw en Ipru silimen, oh wahnpoaron Piter, oh pil me tohto me lelohng kasongosong laud kan. (Mel. 103:20; Dan. 3:28; 6:21, 22; Wiewia 12:11) Mendahki ekei pak kitail kin pepehm me kitail sohte kakohng uhwong me kin lelohng kitail, kitail kak ale kangoang sang dahme wiawiong sapwellimen Elisa laduwo ni ah esehda me “iangata kan tohtohsang irail.” (2 Nanmwarki 6:15-17) Mehnda ma aramas pahn kihpeseng kitail oh riatail Kristian kan, kitail en dehr mworusala. Mahsen en Koht kin kamehlelehiong kitail met: “Sapwellimen Siohwa tohnleng kin sinsile irail me kin wauneki Ih.”—Melkahka 34:7.
4 Ni ahnsou keren, karis en tohnleng kan pahn kasohrala koaros me kin uhwong kaundahn Krais. (Kaudiahl 19:11, 14, 15) Erein atail awiawih rahno, kitail en nantihong kapinga Siohwa ni eimah, oh pil kamehlele me karis en tohnleng kan pahn kaweid en Sises kin sewese kitail oh utungada doadoahk en kalohk.—1 Pit. 3:22.