Nantihong Kalohk
1 Ahnsou apwal akan leledohr. Kahpwal nanpwungen aramas, mahwen nanpwungen wehi kan oh keinek kan, melimel, lapake, rerrer en sahpw, oh wiewia kapwuriamwei kan kin ahnsou koaros wiwiawi. Ahnsou wet anahnpen rong soahng mwahu kan laud sang mahs. Ahpw, pali moron en aramas sohte kin nsenohki soahng ngenin kan. Nan ekei wasa, e kin apwal en diar aramas nan imwarail oh pil kin apwal en diar aramas me mwahuki rong de onop Paipel. Mendahki met, e kin kesempwal kitail en kin nantihong kalohki Rongamwahu en Wehin Koht me kaundahr nanleng.—Madiu 24:14.
2 Limpoak ong Aramas akan: Doadoahk en kalohk kin kasalehda sapwellimen Siohwa limpoak ong aramas akan. “E sohte kin ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” (2 Piter 3:9; Esekiel 33:11) Kahrehda, e kupwurki doadoahko me Sises kasalehda ni e mahsanih, “Rongamwahu uhdahn pahn lohkseli mahs nan wehi koaros.” (Mark 13:10) Koht kupwurki aramas en sohpeiong Ih met pwehn pitsang kadeik me pahn kohwong en Sehdan sampah. (Soel 2:28, 29, 32; Sepanaia 2:2, 3) Kitail soh kin kalahnganki me Siohwa ketin luhke kitail en kakaranih kitail lahng Ih pwehn pitsang kadeik?—1 Tim. 1:12, 13.
3 Ripoht en kalohk nan sampah pwon kin kasalehda me nan pahr en kalohk en 2004, Paipel Study 6,085,387 (average) kin wiawi nan sounpwong koaros, oh aramas 5,000 (average) kin papidaisla nan wihk koaros! Irail me ahpwtehn papidaisla kan kin wia kasalepen Siohwa a ketin kapaia irail akan me kin nannanti en koasoiong aramas koaros me irail kin tuhwong. Soangen kapai pwukat kin kahrehong tohnmwomwohdiso kan en peren, oh kitail en tamataman me kitail ahneki pwais kaselel en iang Koht nan doadoahk kesempwal wet me kin sewese aramas en ale komourparail!—1 Kor. 3:5, 6, 9.
4 Kapinga Mwaren Koht: Kitail kin nantihong kalohk pwehki kitail men kapinga Siohwa oh pil kasarawihala mware mwohn aramas koaros. (Ipru 13:15) Sehdan kin pitipitih “sampah pwon” en kamehlele me Koht luwet kahrehda e sohte kak kamwahuwihala kahpwal kan en tohnsampah oh Koht sohte nsenohki lokolok me aramas kin lelohng, oh Sehdan pil men aramas en kamehlele me sohte Koht. (Kaudial 12:9) Ahnsou me kitail kin kalohk, kitail kin kadehde ong koaros duwen dahme mehlel me pid Samatail nanleng, Siohwa. Kitail en nantihongete kalohk oh kapinga mware—ahnsou wet oh pil ahnsou kohkohlahte.—Melkahka 145:1, 2.