Nantihong Kalohk!
1 Koht kin kupwurki me “aramas koaros en ale komourparail oh marainkihla me mehlel.” (1 Tim. 2:4) Ihme kahrehda, e ketikihong kitail atail doadoahk en kalohki Rongamwahu. (Madiu 24:14) Ma kitail wehwehki oh kalahnganki kahrepe kan kitail anahne nantihong kalohk, sohte mehkot pahn kauwehla atail ngoangki kalohk.
2 Dahme Kahrehda Kitail Pahn Nannanti? Mie soangsoangen irair kan me kin pwarada nan mour en aramas me kin kahrehong irail en manokehla de sohte nohn kesempwaliki dahme kitail kin kalohk ong irail. Eri, kitail anahne katamankin irail duwen rohng en Koht me pid komour. (Madiu 24:38, 39) Oh pil, irair en mour en aramas akan kin wekila ahnsou koaros. Ni mehlel, irair en sampah kakete pil mwadang wekila. (1 Kor. 7:31) Lakapw, wihk kohkohdo de sounpwong kohkohdo, aramas akan me kitail kin kalohk ong kak lelohng kahpwal kapw de kapwunod kan me pahn kak kahrehong irail en medemedewe laud duwen Rongamwahu me re rong sang kitail. Ke soh kin kalahnganki me Sounkadehde men me nantihong wahdohng uhk padahk mehlel?
3 En Kahlemengih Sapwellimen Koht Mahk: Siohwa ketin kasalehda kanengamah pwe e mweidohng ahnsou laud mwohn e pahn kadeikada me suwed akan. Ni eh kin doadoahngki kitail, e kin peki rehn aramas pwung kan en sohpeiong Ih oh ale komourparail. (2 Pit. 3:9) Kitail pahn dipkihda mehlahn aramas ma kitail sohte pahn kalohk ahnsou koaros oh kasalehong aramas akan duwen rohng me pid sapwellimen Koht mahk oh pil kadeik me e pahn wiaiong irail me sohte kin wiliakapwala. (Esekiel 33:1-11) Mendahki aramas koaros sohte kin rong dahme kitail kin kalohkihong irail, kitail en dehr katikitikihala atail ngoangki kalohk oh wia uwen me kitail kak en sewese aramas mohngiong mehlel en kalahnganki sapwellimen Koht mahk.—Wiewia 20:26, 27; Rom 12:11.
4 En Kasalehda Atail Limpoak: Siohwa Koht, ki Sises Krais, wia kehkehlik en kalohki Rongamwahu wasa koaros nin sampah. (Madiu 28:19, 20) Mendahki aramas akan sohte kin rong, kitail kak kasalehda atail limpoak oh lelepek ong Koht ni atail pahn nantihong wia dahme pwung.—1 Sohn 5:3.
5 Eri, kitail en nantihong kalohk! Kitail en ngoangki wia met pwehki sapwellimen Siohwa “rahnen komour” wiwiawihte.—2 Kor. 6:2.