Wia me Mwahu oh Ehuiong Meteikan
1 Dorkas kin “wiewia mwahu oh kin sewese me semwehmwe kan.” (Wiewia 9:36, 39) Pwehki ngenen kadek me Dorkas kin kasalehda, aramas me ese ih oh pil Siohwa Koht kin ketin poakohng ih. Ipru 13:16 kin kihda kaweid mwahu: “Kumwail dehr manokehla wiewia mwahu kan oh amwail sawaspene, pwe ih soangen meirong pwukat me Koht kin ketin kupwurperenki.” Iaduwen atail kak wia dahme mwahu oh ehuiong meteikan rahnwet?
2 Ehu ahl me kitail kak sewesehki meteikan iei ni atail pahn kin ehukihong irail “neitail mwohni oh atail dipwisou kan.” (Lepin Padahk 3:9) Atail sawas me kitail kin wia ong doadoahk me kin wiawi nan sampah pwon kin pil sewese brother kan en kak wiahda Kingdom Hall kapw kan, wasahn kapokon kapw kan, oh Branch Ohpis kapw kan wasa koaros nan sampah. Sawas en mwohni me kitail kihda kin kak sewese aramas rar rar kei en paiekihda kasukuhl en pali ngehn oh werek me mwahu oh ngenin kan.
3 Ehukihong Meteikan Mehn Kamweit: Ni ahnsou me kahpwal laud kin pwarada, sapwellimen Siohwa aramas akan kin onopada en “wia dahme mwahu” ong riarail kan ni pali ngehn oh pil aramas teikan me sohte iang kisehn arail pwoson. (Kalesia 6:10) Mwurin wasahn wia wini (kemikel) pospeseng nan France, pwopwoud ehu me mihmi limwahn wasao koasoia: “Riat Kristian akan mwadang kohdo sewese kiht kamwakelehda aht apartment oh pil ahn meteikan apartment kan me mihmi limwaht. Mehn mpaht kan uhdahn pwuriamweikihla soangen tohto en irail akan me kohdohn sawas.” Pil emen sister kapataiong: “Elder kan kohpene reht pwehn sewese kiht. Irail kohdo oh kangoange kiht. Ni mehlel, ih me se anahne, laud sang sawas en mwohni oh kepwe.”
4 Mehlel, mie soahng tohto me kitail kak wia pwehn sewese mehn mpatail kan, ahpw dahme pahn keieu sewese irail iei en ehukihong irail loalokong pwung en padahk mehlel, oh pil “koapworopwor en mour soutuk” me pein Siohwa ketin inoukihda. (Taitus 1:1, 2) Mahsen en Koht kin wahdo mehn kamweit mehlel ong irail me kin mwahiei pwehki irair en sampah wie susuwedla oh irail pil nsensuwedki pein arail irair en soh-unsek kan. (Madiu 5:4) Eri, kitail en wia dahme mwahu oh pil ehukihong meteikan dahme mwahu ahnsou koaros me kitail kak.—Lepin Padahk 3:27.