Kisinlikou Sang Governing Body
NI ATAIL kerenlahngehr koasoandi kapw, e kesempwal kitail en kin likih Siohwa. (Sepanaia 3:8) Soukohp Daniel mahsanih me “Koht . . . iei Ih me kin ketin kasalehda sapwellime kupwure rir akan, oh e kin ketin kasalehda . . . dahme pahn wiawi ni imwin rahn akan.” (Dan. 2:28, NW) E kin wia mehkot kesempwal ong kitail ni atail memour ni imwin rahn pwukat en wehwehki sapwellimen Siohwa kupwur rir kan pwehki Siohwa kin ketin kasalehiong kitail!
Siohwa kin ketin doadoahngki “ladu lelepek oh loalokong” en ekis ekis kasalehda kupwure ohng kapokonepene “pokon kalaimwun” sang wasa koaros nan sampah pwehn papah Ih ni “imwin rahn akan” me inenen suwed. (Madiu 24:45; Kaudiahl 7:9; 2 Tim. 3:1) Aiseia 2:2, 3 kin kasalehda me wiewia wet pahn wiawi “ni imwin rahn akan.” Ehu ehu sounpahr, kohpenehn “pokon kalaimwun” kin wiwiawi mendahki apwal oh tiahk lemei e rekla nan sampah wet.
Nan pahr 2004, kitail kin ale kangoang en peikiong mahsen en Sises: “Mwasamwasahn . . . Onohnop ahnsou koaros.” (Madiu 24:42, 44) Ni mehlel, dahme wiawi nan sampah ahnsou wet kin wia mehkot kesempwal Kristian kan en kin tehk kanahieng, me wehwehki “kilel en atail ahnsou” oh mwekidki ni ahl me pwung. (Madiu 16:1-3) Siohwa pahn kapwaiada sapwellime Mahsen ni e pahn kaukaulehte ieiang pwihn wet me kin miniminkihpene kehl sang powe mendahki uhwong me kin lelohng irail.
Mendahki ekei ahr kin nannanti pwehn uhwong de kauhdi doadoahk en kalohk, riatail brother oh sister kan kin kalohki padahk mehlel oh pil kin pokonpene. (Wiewia 5:19, 20; Ipru 10:24, 25) Nan June 2004 nan Russia, mwoalen kopwung en Moscow wiahda koasoandi ehu pwehn kauhdi doadoahk en Sounkadehdehn Siohwa kan oh pil kauwehla arail koasoandi kan oh pil kahdsuwedih irail nan Moscow. Ahpw, brother oh sister kan wasao sohte mworusala; irail wehwehki dahme Koht ketin kupwurki irail en wia, oh irail men peikiong Siohwa nin duwen arail Kaun, a kaidehn aramas. (Wiewia 5:29) Se likih me Siohwa pahn kahluwa sapwellime ladu kan mendahki irail me kin uhwong Sounkadehde kan pahn wiahda kosonned en sahpw akan me pahn uhwong sapwellimen Siohwa doadoahk.
Erein sounpahr kei me ahpwtehn neko, nan Republic of Georgia, aramas pirapa ahn brother oh sister kan arail dipwisou kan, oh pil riatail kan lelohng kalokolok sang pwihn kan me kin wia tiahk lemei, oh riatail kan pil kin kilang aramas uhwong oh isikala neirail pwuhk kan. Ahpw, sohte mehkot, iangahki dipwisou en mahwen, kak pweida ong kauhdi irail sang papah Siohwa. (Aiseia 54:17) Nan pahr en kalohk en 2004, Sounkadehdehn Siohwa kan pil pwurehng ale arail pwung nin duwen kosonned en Georgia me kasalehda me irail wiahlahr pelien lamalam ehu (legally recognized). Sounkadehdehn Siohwa kan kak wia arail kapokon kan oh sohte me kin lidere, oh sohte me kin ire irail sang en aledekihla pwuhk, brochure, makisihn oh tract kan me kohkohpeseng wasa koaros nan sahpwo. Met mieier ripoht me kohda me mie kekeiradahn sounkalohk kan oh tohtohlahn irail me kin iang Kataman nan pahr koaros.
Nan sapwen Armenia, Eritrea, Republic of Korea, Rwanda, oh Turkmenistan, brother oh sister kan selidi nan imweteng pwehki arail pwoson. Mendahki irail lelohng apwal, irail wehwehki kahrepen irail lelohng kalokolok pwukat, oh met kin sewese irail en kolokol arail lelepek ni arail kin likih Siohwa en komourirailda.—1 Piter 1:6; 2 Piter 2:9.
Ni ahmw pahn kasawih Ripoht en Kalohk en Pahr en 2004 nan Kahn Iroir en February 1, 2005, ke pahn peren ni ahmw pahn medemedewe duwen kamwahu me Siohwa kin kasalehda. (Melkahka 31:19; 65:11) Se koapworopworki me ripoht wet pahn kangoange iuk en nantihong kekeid ni ahl me pahn kaperenda Koht.—1 Deselonika 4:1.
Se kin wia uwen aht kak en koasoanehdi koasoandi kan me pahn sewese sounkalohk kan en kalohki ong soangsoangen aramas akan duwen padahk mehlel. Karasepe, se wiahda video cassette kan, DVD kan, oh soahng kan me irail me kin lokaiahki peh en kin doadoahngki pwehn sewese aramas salengepon akan oh se pil wiahda pwuhk kan ong irail me maskun (Braille) pwehn sewese irail ong ni pali ngehn. Sounkalohk tohto kin sukuhliki lokaia kapw akan pwehn kak sewese irail me kin doadoahngki lokaia tohrohr me kin kousoan nan arail wasahn kalohk.
Oh se pil wiahda pwihn en sounkalohk kei pwe irail en kalohk nan wasahn kalohk kan me apwal en lel. Met kin wehwehki me pwihn pwukat kakete wiahla mwomwohdiso kapw! Oh pil, sang aramas 16,760,607 me iang towehda Kataman nan pahr me ahpwtehn neko, irail aramas 10,000,000 samwa me saikinte wiahla Sounkadehdehn Siohwa kan. Met kin kasalehda me “dondol en mwaht laud” pahn wiawi.
Se kalahngankihong Siohwa kapai laud kan me E kin ketikihong kitail oh limpoak me E kin ketin kasalehda ni E kin ketin apwalih kitail ehu ehu rahn. (Lepin Padahk 10:22; Malakai 3:10; 1 Piter 5:7) Ni atail kin mwekimwekidwei mwowe ni minimin ni “imwin rahn akan,” kitail en kin likih oh koapworopworki Siohwa. Sohte lipilipil kahpwal dah kan me kitail pahn kin lelohng, kitail en kin mweidohng iren pahr en 2005 en lel mohngiongatail: “Sawaspei pahn pwarodo sang rehn Siohwa.” (Melkahka 121:2) Menlau tamataman me se kin poakohng kumwail oh kumwail kin mihmi nan aht kapakap kan ahnsou koaros.
Riamwail brother kan,
Governing Body en Sounkadehdehn Siohwa kan