Iaduwen Atail Pahn Kolokolete Atail Ngoang
1 Soangen ngoang me Apolos kin ahneki nan kalohk kin katamandohng kitail riatail Kristian akan rahnwet, mehlel irail me kin ngoangki kalohk. (Wiewia 18:24-28) Kaweid kohwong kitail koaros en “pwerisekiong atail doadoahk en kalohk, oh dehr pohnkahke.” (Rom 12:11) Dahme kak sewese kitail en alehda oh kolokolete ngenin ngoang nan atail doadoahk en kalohk?
2 Mwekidkihda Loalokong: Mwurin Sises pwarehng sapwellime wahnpoaron riemen oh “kawehwehiong ira wasa kan me Pwuhk Sarawi mahsanih duwen pein ih,” ira ndapene: “Nan kapehdita kat soh kin mwekimwekidki peren, rasehng kisiniei, ni eh kin mahmahsen oh kawehwehiong kita Pwuhk Sarawi?” (Luk 24:27, 32) Atail mohngiong soh pil kin mwekidki peren ni atail kin kalaudehla atail wehwehki Mahsen en Koht ahnsou wet? Ei, pwoson me kin mwekidki loalokong. Rom 10:17 mahsanih: “Pwoson kin pwilisang ni rong mahsen en Koht.” Ni atail mohngiong kin dirkihla koapworopwor ong sapwellimen Siohwa inou kan, kitail sohte kin kak uhdihsang koasoiahda mehkan me kitail sukuhlikihier!—Melkahka 145:7; Wiewia 4:20.
3 Kitail sohte kak en koapworopworkihte loalokong me kitail ale sang atail onop en mahso oh medewe me met pahn wiahiong atail limpoak ong Koht en kehlailla oh ngoangki doadoahk en kalohk. Kitail anahne en doula oh kalaudehla atail wehwehkihla duwen me mehlelo oh pil kaloalehla atail limpoak ong Siohwa. Ma soh, atail doadoahk en papah Ih pahn ekis ekis wiahla mehn wia mwohmwte. (Kaudiahl 2:4) Mahsen en Koht kin kangoange kitail en “doulahte kekeirada ni atail marainkihla Koht.”—Kolose 1:9, 10.
4 Mwomwen Atail Kin Onop: Kitail anahne tehk mwomwen atail kin onop. Karasepe, ele mwein kitail kin lainihala pasapeng kan nan Kahn Iroir oh wia pasapeng pwung kan. Ahpw, iaduwen—kitail kin tehk iren Paipel kan me mih nan artikelo oh medemedewe iaduwen kitail kak doadoahngki ire kesempwal pwukat nan atail mour? Ni ahnsou me kitail wia atail wadawad en Paipel erein wihk, kitail kin song en wia research kan ma kitail kak oh doudouloale duwen iren mehn kasukuhl kan sang nan iren mehn wadawado? (Melkahka 77:11, 12; Lepin Padahk 2:1-5) Ia uwen kesempwal en kin medemedewe oh doudouloale Mahsen en Koht! (1 Timoty 4:15, 16) Soangen onop katapan pwukat pahn kakehlailihala atail pali ngehn oh kamwekid kitail en “ngoangki doadoahk mwahu kan.”—Taitus 2:14.