Limpoak—Ire Kesempwal ong Pweidahn Kalohk
1 “Kumwail kohdo rehi, . . . I ahpw pahn kommoaleikumwailla.” (Madiu 11:28) Soangen lokaia kansenamwahu pwukat kin kasalehda sapwellimen Sises limpoak loal ong aramas akan. Nin duwen Kristian sounpapah kan, kitail men kahlemengih Sises sang ni atail kin kasalehda limpoak ong aramas akan me kin tihwohkilahr sampah soh-limpoak ieu. Iaduwen kitail kak wia met ni atail kin ehukihong aramas akan rongamwahu?
2 Sang ni Lokaia kan: Limpoak ong aramas akan kin kamwekid Sises en isaneki ahnsou mwahu kan koaros en ehukihong irail rongamwahu. (Sohn 4:7-14) Limpoak pahn sewese kitail en powehdi atail kin pweieksang kalohk ni ahnsou soh lipilipil. Emen serepein me sounpahr weneu wia padahk mwahu ong lih emen me mwomwohd limwah nan wasahn awiawih nan imwen wini. Dahme kamwekidada ih en wia met? E kawehwehda, “Liho mwomwen anahne ese duwen Siohwa.”
3 Kitail kak kasalehda atail nsenohki aramas akan sang ni mwomwen ngilatail oh mas pohkomwokomw me uhdahn kohsang nan mohngiongatail. Rong kanahieng dahme meteikan nda, pohnese dahme irail nsenohki, oh kasalehda atail nsenoh mehlel pil pahn kasalehda limpoak. (Lepin Padahk 15:23) Ni atail kin kahlemengih Sises, kitail anahne kasansalehda padahk kangoang kan en Wehio oh sapwellimen Siohwa pepehm en limpoak ong aramas akan.—Madiu 24:14; Luk 4:18.
4 Sang ni Wiewia kan: Sises kin pehmitikiong anahn en aramas akan ni ahl akan me sansal ong irail oh me uhdahn kin sewese irail. (Madiu 15:32) Kitail pil mwein ele pahn ahneki ahnsou mwahu kan en kasalehda wiewiahn limpoak-kadek ni ahnsoun kalohk. Emen sister kilangada lih emen me apwaliki wehwehki dahme aramas nan telephone koasoakoasoia ahpw met kesempwal liho en wehwehki. Riatail sistero toukihda pein ih pwehn sewese liho ni ah kawehwehda lokaiahn aramaso me lokaiahdo nan telephono. Wiewiahn limpoak wet elehda ara koasoipene duwen Pwuhk Sarawi oh met sewese liho en tepida onop en Paipel. Pil ehu ahnsou, emen brother wia return visit ehu oh diarada emen tohnihmw me tihwohkilahr, kolokol mehn mwomwohd toutou ieu me tengala ni wenihmw. Mwurin eh sewese ohlo, brother menet mwohndiong pohn mehn mwomwohd wet me e sewese kamwekid, oh tepida Paipel study rehn ohlo me uhdahn kalahnganki ah sawas.
5 Ni atail kin iang kalohk, kitail kin kasalehda atail limpoak ong Koht oh atail limpoak ong mehn mpatail. (Madiu 22:36-40) Soangen kasalepen limpoak sang ni lokaia kan oh wiewia kan kin sewese aramas akan me ahneki mohngiong mehlel en wehwehki me kitail ahneki padahk mehlel.