“Eimah ni Padapadahngkiseli Mahseno”
1 Ekei pak ke kin saloh en saledek en koasoia duwen ahmw pwoson ni ahnsou me konehng nan sukuhl oh wasahn doadoahk? Ke apwaliki en kalohk ahnsou sohte lipilipil ong ahmw peneinei kan oh mehn mpomw kan de mweinele ong aramas akan me ke sehse? Dahme pahn kak sewese kitail koaros en isaneki ahnsou konehng kan en “eimah . . . ni [atail] kin padapadahngkiseli mahseno”?—Pilipai 1:14.
2 Dehr Pweiek: Ke kak pweiek en perehsang karaunlikamw me wiawihong kompoakepahmw keren men de emen ahmw peneinei? Erein nan pahr akan en poadopoad en aramas, karaun laud wiawihong Siohwa, kompoakpatail me keieu keren. Kitail ahneki kapai tohrohr en kihda kadehde ni mwaren atail Koht lapalap! (Aiseia 43:10-12) Limpoak loal ong Siohwa kak sewese kitail en powehdi atail pepehm en namenek de masepwehk oh kamwekid kitail en koasoi, oh sohte pweiek sang en eimah kadehde me mehlel.—Wiewia 4:26, 29, 31.
3 Tamataman me atail mehn kair iei rongamwahu. E pahn wahdo kamwahu soutuk ong irail kan me kin kapwaiada. Kilangwohngete kesempwal en doadoahk en kalohko ah kaidehn pein kitail de irail me uhwong kan pahn sewese kitail en kalohk ni eimah.
4 Mehn kahlemeng en meteikan: Kitail kak ahneki kehl sang pwoson en meteikan me kin koasoia mahsen en Koht ni soh masak. Karasepe, Enok ni ngoang pakairki sapwellimen Siohwa kadeik ong aramas dipan akan. (Sud 14, 15) Noha ni pwoson kalohk ong aramas me sohte men rong kan. (Madiu 24:37-39) Kristian kan nan keieun senturi me “sohte wad oh pil sohte iang sukuhl” doulahte kalohk mendahki uhwong laud. (Wiewia 4:13, 18-20) Watchtower oh Awake! kan kin ahnsou koaros koasoia poadopoad en mour en irail akan nan atail ahnsou me kin kasalehda pwoson Siohwa oh kin powehdi masak aramas oh wiahla sounkalohk ngoang.
5 Kitail kak ale kangoang sang ni atail medemedewe mour en soun papah pwoson en mahs me kin lelong irair apwal akan. (1 Nanmwarki 19:2, 3; Mark 14:66-71) “Koht ketin [kakehlairailda]” oh re kin koasoi ni soh masak. Eri kitail kak!—1 Deselonika 2:2.