Kitail Kin Kauwehla Mahsen en Widing kan me Aramas Kin Kamehlele
1 Erein sounpar tohto Sehdan kin doadoahngki padahk likamw kan me karotongehla madamadau oh mohngiong en aramas tohto. E kin kihda soangen padahk likamw akan duwehte Trinity, mour me sohte pahn mehla, oh kalokolok nan kisiniei. E kin kangoange soangen peikasal kan ma uhdahn mie Koht oh ma Paipel uhdahn pwilisang rehn Koht. Lipilipilki aramas oh uhki wehi pil kin kahrehiong aramas en sohpeisang padahk mehlel. (2 Kor. 4:4) Iaduwen kitail kak kauwehla mahsen en widing kan me aramas kin kamehlele?—2 Kor. 10:4, 5.
2 Pepehm Kin Iang Pidada: Padahk kan me aramas kin kamehlele kin tengala nan arail lamalam. Ekei kin kolokolete padahk sapwung sangete ni ar seri. Pwehn sewese soangen aramas pwukat, kitail anahne koasoi ni ahl ehu me kasalehda atail wauneki arail madamadau.—1 Pit. 3:15, 16.
3 Kitail kak wauneki aramas pwukat sang ni atail mweidohng irail en kawehwehda dahme re kamehlele oh pwekida. (Seims 1:19) Mwein re kolokolete padahk me mour me sohte pahn mehla pwehki mie kompoakparail me mehla oh re men pwurehng kilang. De re kasarawi holiday kan pwehki ih ahnsou mwahu me re kak ehupene rehn arail peneinei. Rongorong kanahieng dahme re koasoia pahn sewese kitail en wehwehki arail pepehm oh sewese kitail en kawehwe mwahu.—Lep. Pad. 16:23.
4 Kahlemengih Sises: Sises ketikihda mehn kahlemeng mwahu ong kitail ni eh sapengla peidek kan sang emen sounpadahk en Kosonned. Sises sohte mahsanihong ih dahme en wia, pwe ohlo kakete soikala dahme Sises mahsanih pwehki e kesempwalki dahme e kamehlelehier. Ahpw Sises kin doadoahngki iren Paipel kan, luke ih en kasalehda eh madamadau, oh doadoahngki karasaras pwehn sewese ih en pein wia eh pilipil pwung.—Luk 10:25-37.
5 Mahsen en Koht kak kauhdihsang aramas en kamehlele padahk likamw kan. (Ipru 4:12) Sang ni atail kanengamah nantihong lel mohngiong en aramas, kitail kak sewese aramas en kesehla padahk likamw oh ale padahk mehlel me kak kasaledekirailla.—Sohn 8:32.