Dahme Meteikan Kin Sukuhlki ni Arail Kin Kilang Uhk?
1. Dahme sapwellimen Sises tohnpadahk ko kin sukuhlki ni arail kin kilang ih?
1 Sises mahsanih: “Kapaikada ei mehn wisiket, oh kumwail padahngki sang ie.” (Mad. 11:29) E sansal me e ketin padahki meteikan sang ni eh wiahda mehn kahlemeng mwahu a kaidehn sangete sapwellime mahsen kan. Medewehla duwen dahme tohnpadahk ko sukuhlki ni arail kin kilang Sises. E kin ketin kamantik, kasalehda kadek oh limpoak. (Mad. 8:1-3; Mark 6:30-34) E kin ketin aktikitik ni mehlel. (Sohn 13:2-5) Ni arail kin iang Sises nan kalohk, tohnpadahk ko kin kilang me e kin pwerisek nan sapwellime doadoahk oh e kin koahiek en padahngki me mehlel ong meteikan. (Luk 8:1; 21:37, 38) Ia duwen meteikan kan arail kin mwekidki ni arail kin kilang atail kin kalohk?
2. Ia duwen mwomwatail oh atail wiewia nan kalohk eh kak kamwakid tohnihmw akan?
2 Tohnihmw akan: Atail kin likouda mwahu, atail wiewia mwahu kan oh atail kin uhdahn nsenohki aramas kak kamwakid laud tohnihmw akan. (2 Kor. 6:3; Pil. 1:27) Irail kin kilang me kitail kin kalapw doadoahngki Paipel. Meteikan kin mwekidki ni atail kin rong kanahieng ni arail kin koasoi. Ke dehr mwamwahliki duwen kahlemeng mwahu eh kak kamwakid aramas en rong mahsen en Wehio.
3. Kamwahu dah kan me kitail kak wiahiong riatail kan?
3 Riatail akan: Pil medewehla kamwahu kan me riatail kan kak alehdi. Atail ngoangki doadoahk en kalohk kak kamwakid meteikan en pil ngoangki kalohk. Duwehte mete eh kin edehda mete, atail kaunopada mwahu atail padahk kan kin kamwakid meteikan en pil kamwahwihala arail koahiek nan kalohk. (Lep. Pad. 27:17) Atail kin pwerisekiong ntingihdi soahng kan duwen irail kan me perenki rong oh mwadang pwurala rehrail pil pahn kamwakid meteikan en wia soahngohte. Kitail pahn wia mehn kahlemeng mwahu ong riatail kan ni atail kin wia uwen atail kak koaros nan doadoahk en kalohk.—2 Tim. 4:5.
4. Dahme kahrehda kitail kin anahne kasawih atail mehn kahlemeng kan?
4 Ke sou kin kasawih dahme ke kin wia oh nda oh ia duwen omw mehn kahlemeng eh kin kamwakid meteikan? Atail mehn kahlemeng mwahu pahn kaperenda Siohwa oh kahrehiong kitail en pil kak nda soahngohte me wahnpoaron Pohl nda: “Kumwail kahlemengih ie, duwehte ei kin kahlemengi Krais.”—1 Kor. 11:1.