Pahpa oh Nohno kan—Noumwail Seri kan Kin Sukuhlki en Madamadau Duwehte Koht?
1. Dahme kin kaperenda pahpa oh nohno Kristian akan?
1 Ia uwen eh wia kapai ehu en naineki seri kan me kin perenki papah Siohwa! Ia uwen eh kin kaperenda pahpa oh nohno kan. Wahnpoaron Sohn kasalehda pepehm wet ong Kristian akan me duwehte nah seri kan ni eh ntingihdi, “Sohte me I perenki sang ei rong me nei kompoakepahi kan [“seri kan,” NW] kin momourki mour mehlel.”—3 Sohn 4.
2. (a) Peidek dahieu me pahpa oh nohno tohto kin idek? (b) Ia duwen emen pahpa eh sapengla peidek wet?
2 Pahpa oh nohno tohto kin idek, “Ia duwen omw pahn sewese noumw seri kan en madamadau duwehte Koht?” Kitail wehwehki dahme kahrehda peidek wet kin kohda, pwehki kasongosong kan sang rehn Sehdan me e kin wiahiong seri kan. Pasapeng kan sang rehn pahpa oh nohno me pweida kin wia sawas laud. Emen pahpa koasoia, “Dahme keieu anahn iei wiahda mehn kahlemeng mwahu ni omw ahneki madamadau me duwehte sapwellimen Koht madamadau.” Pahpa menet wia elder men oh e kin apwalih seri pahmen. E kin wiahda ahnsou pwehn mi rehn nah seri kan. Re kin keieu kesempwalki wiewia kan en doadoahk en Wehio nan arail mour. Re kin koasoia duwen arail kak papah Koht nin duwen peneinei ehu. Ni arail mwemweitla wasakis, re kin wia met nin duwen peneinei ehu oh pahpao kin tehk me re iang towehda mihting kan nan Wasahn Kaudok me mi wasao.
3. Ia duwen emen nohno eh sewese nah seri kan en perenki kalohk?
3 Pil ehu ire iei en wiahki ahnsoun kalohk ahnsou kaperen ehu. Emen nohno koasoia me e kin wahda nah seri kan en iang ih kalohk sangete ni ahnsou me re pwelel. Re kin ahnsou koaros perenki kalohk, ahpw re sohte kin kalohk pwehki re anahnehte.
4. Dahme pahn kak sewese pahpa oh nohno kan en kapehse mwahu ong neirail seri kan?
4 Kapehse Mwahu: Ia duwen omw pahn ese ma noumw seri kan kin sukuhlki en madamadau duwehte Koht ma ke sohte kin kapehse mwahu rehrail? E pahn uhdahn apwal. Ihme kahrehda pahpa oh nohno tohto me kin pweida kin kilang me e wia elen loalokong en kapehse mwahu rehn neirail seri kan. Irail kin wiahda ahnsou pwehn mihpene. Irail kin diar me e keieu mwahu neirail seri kan en iang irail werekiong meteikan. Met pahn sewese seri kan en kak werekiong me mah de pwulopwul. Pahpa oh nohno loalokong kan pil kin nsenohki mehlel dahme neirail seri kan kin wia nan sukuhl de wasa teikan. Soangen nsenoh wet pahn kahrehiong en mengei ong seri kan en koasoiong pahpa oh nohno kan ma kahpwal pwarada pwehki re pahn ese me arail pahpa oh nohno pahn wehwehki irail mehnda ma re wiahda mehkot sapwung.—Lep. Pad. 15:14.
5. (a) Dahme kahrehda e kesempwal ong pahpa oh nohno kan en rong neirail seri kan? (b) Dahme pahpa oh nohn kan pahn wia ma neirail seri kan kin kasalehda madamadau sapwung?
5 Ekei pahpa oh nohno kin diar me e kesempwal en rong kanahieng dahme neirail seri kan kin koasoia. Irail kin diarada dahme neirail seri kan kin sukuhlki nan ihmw oh likin imwarail, oh mwadang kapwungala ma mie madamadau sapwung mwohn e tengala nan arail madamadau oh mohngiong. Pahpa oh nohn loalokong kan sohte kin mwamwahliki dahme seri kan kin nda. Ahpw, re kin nantihong en kakehla oh kangoange neirail seri kan en nantihong madamadau duwehte Siohwa nan sampah wet me direkihla noahrok kepwe. (Ep. 6:10-13) Soangen nsenoh wet kin kahrehiong pahpa oh nohno oh seri kan en karanihala emenemen.—Lep. Pad. 24:5.
6. (a) Ia duwen seri kan arail kin paiekihda onop en Paipel nan peneinei kaukaule? (b) Dahme kak sewese onop en peneinei en pweida mwahu?
6 Onopkihpene Mahsen en Koht: Kaukaule onopki Paipel nin duwen peneinei ehu iei pil ehu ire kesempwal pwehn sewese seri kan en madamadau duwehte Koht. Ma seri kan kin kilang me arail pahpa oh nohno kin nsenohki sukuhlki duwen Paipel oh koasoanehdi en onop nan ehuehu wihk, irail pahn pil wia soahngohte. Patehng ahnsoun onopki pwuhk kan de makasihn nan ehuehu wihk, pahpa oh nohno me kin tehk anahn en seri kan kin kihda kaweid de kangoang me konehng neirail seri kan. Soahng kan me wiawi nan sukuhl de nan wasahn kousoan ele kak kasalehda dahme re anahne onopki pwe ren kak powehdi kahpwal me wiawio. Met kin wia kisehn esehla madamadau duwehte Siohwa.
7, 8. (a) Sawas dah me keieu mwahu me pahpa oh nohno kak wiahiong neira seri kan? (b) Ia duwen pahpa oh nohno kan arail kak sewese neirail seri kan en karanihala Siohwa?
7 Kihda Sawas me Keieu Mwahu: Ekei pahpa oh nohno kin ahneki madamadau sapwung me sawas me keieu mwahu me re kak wia ong neirail seri kan iei kihong irail dipwisou tohto. Dahme kin wiawihong ekei peneinei kin kasalehda me ni pahpa oh nohno kin kesempwalki mehkan me pid dipwisou, met kin kalapw kahrehiong ira en solahr madamadau duwehte Siohwa oh pil solahr nsenohki en seri kan arail nanpwungmwahu rehn Siohwa. (Mark 8:36) Mendahki re kin nsenamwahuki dipwisou tohto, mie katepen arail pahn tounmeteikihla arail nanpwungmwahu rehn Siohwa? Peneinei teikan kin pilada en katikihala arail doadoahngki dipwisou kan pwe ren dehr katihasang arail kesempwalki mehn akadei me keieu kesempwal. (Sohn 6:27) Irail sukuhlki en itarki dahme re ahneki oh met imwikihla arail karanihala Siohwa. Met wia kapai ehu ong irail oh neirail seri kan.
8 Ke kin kesempwalki nanpwungmwahu en omw peneinei rehn Siohwa? Ke sou sewese kakehlailihala nanpwungmwahu en omw peneinei reh? (Madiu 6:19-21) Sewese noumw seri kan en karanihala Siohwa oh ke pahn kalahnganki me noumw seri kan “kin momourki mour mehlel.”