Mihting Tohrohr kan—Ahnsoun Kaudok ni Peren
1. Ia duwen kamadipw sarawi en mehn Israel kan kin duwehte atail mihting tohrohr kan?
1 Sosep, Mery, neira seri kan oh meteikan kin kaukaule kohdahla Serusalem pwehn iang towehda kamadipw sarawi kan nan ehuehu pahr. Ni ahnsou pwukat, irail oh tohnkaudok teikan kin pwilikihdi arail kedirepw kan oh medemedewehte mehkan me pid arail kaudok. Mepwukat kesempwal sang arail kedirepw en ehuehu rahn. Kamadipw pwukat kin kihong irail ahnsou en medemedewe oh koasoia duwen sapwellimen Siohwa wiewia mwahu kan oh sapwellime Kosonned kan. Atail mihting tohrohr me pahn kereniong wiawi pahn kihong kitail pil soangen ahnsou mwahu wet pwehn kaudokiong Siohwa ni peren.
2. Dahme kitail anahne wia pwehn kaunopada ong mihting tohrohr?
2 Anahnepen Kaunopada: En Sises peneinei anahne seiloangki mpen mwail 120 pwehn kohla Serusalem oh pwurodo Nasaret. Mendahki kitail sohte ese rien Sises meh depe, kitail kak medewehla doadoahk oh koasoandi laud me Sosep oh Mery anahne wia. Ia duwe, ke koasoanehdier dahme anahn pwe ken kak iang towehda mihting tohrohr me pahn wiawi? Mwein ke pahn anahne kommoal sang doadoahk de koasoiong omw kaun en doadoahk duwen met. Ia duwe, ke kak sewese emen nan mwomwohdiso me anahne sawas pwehn iang towehda mihting tohrohr?—1 Sohn 3:17, 18.
3. Ia duwen atail kak kasalehda me kitail kin kesempwalki atail peneinei en Kristian?
3 Ehu kahrepe me ladu lelepek oh loalokong sohte kin ntingihdi padahk ko nan pwuhk kan ahpw re kin koasoanehdi pwe kitail en pokonpene oh rong padahk pwukat nan mihting tohrohr kan iei pwehki kitail en kak kangoange emenemen. (Ipru 10:24, 25) Kahrehda, wiahda koasoandi ken mwadang lel wasahn mihting tohrohr pwehn ehuiong meteikan mwohn chairman eh pahn pakairki keseng en tep pwe koaros en ese me re anahne mwohndi. Kitail kin ale kangoang en dehr kohsang wasahn mihting pwehn ale kanatail mwenge ahpw kitail en wahdo kanatail kisin mwenge oh mihmihte nan wasahn mihting pwe kitail en kak tuhwong oh koasoiong meteikan. Atail peneinei en Kristian me kin miniminpene iei kisakis ehu sang rehn Siohwa me kitail anahne kesempwalki.—Maika 2:12.
4. Dahme pahn sewese kitail en paiekihda laud mihting tohrohro?
4 Ahnsoun Sukuhl: Sangete ni en Sises eh pwulopwul, e kin ketin isaneki ahnsoun kamadipw sarawi kan pwehn sukuhlki duwen Semeo nanleng. (Luk 2:41-49) Dahme pahn sewese kitail oh atail peneinei en paiekihda laud padahk kan me kin wiawi? Erein mihtingo, nantihong en mwomwohd oh dehr koasoi ma sohte anahnepe. Ke dehr mweidohng noumw cell phone ape en kedirepwe iuk oh meteikan. Song en kilanglahngete me wia padahk oh ntingihdi ire kan. Mwohdpene nin duwen peneinei ehu pwehn tehk ma noumw seri kan pil kin rong. Doadoahngki ekis ahnsou nin soutik pwehn koasoiapene ire kan me kumwail perenki.
5. Dahme kitail anahne tamataman duwen atail likou oh kapwat?
5 Likou oh Kapwat: Sounnetinet kan me kin seiloak kak kasawihda sapwellimen Sises peneinei oh tohnkaudok en mehn Suhs teikan me pil kin wie seiloak lahng oh pwurodo sang kamadipw sarawi kan pwehki pwungipen arail likou ko oh kisin sahl poh mei me mi ni pwungipen arail likou ko. (Nemp. 15:37-41) Mendahki Kristian akan sohte kin likawih ehu soangen likou, aramas kin esehkin kitail atail kin likouda ni ahl me soandi mwahu oh mwakelekel. Kitail anahne tehk mwahu mwomwatail ni atail kin kohlahng oh pwurodo sang wasahn mihting tohrohr, oh doadoahngki neitail badge. Ni ahl wet kitail pahn weksang meteikan me kaidehn Sounkadehdehn Siohwa oh wiahda mehn kahlemeng mwahu ong meteikan.
6. Dahme kahrehda kitail en toukihda atail ahnsou pwehn sawas nan wasahn mihting tohrohr?
6 Anahn en Toukihda Omw Sawas: Mie anahnepen tohndoadoahk tohto pwe mihting tohrohr en kak pweida mwahu. Ke kak sawas? (Mel. 110:3) Doadoahk me kin wiawi nan mihting tohrohr kan kin wia kisehn atail doadoahk sarawi oh kin wia mehn kadehde mwahu. Emen kaunen doadoahk en ehu wasa me mihting tohrohr kin wiawi ie mwekidki irail me toukihda arail sawas pwehn kamwakelehda wasahn mihtingo oh ih eri ntingihdi met: “I men kalahnganki doadoahk me keieu kaselel me I ahpwtehn kilang. I kin kalapw rong me Sounkadehdehn Siohwa kan wia aramas kei me kin kahrehiong wasahn mihting kan en mwakelekel sang mahs. Amwail pwihn kamwahwihala ihmw wet ong at kousapw oh kumwail wia pwihn ehu me uhdahn kadek me se kin perenki tuhwong.”
7. Ahnsou mwahu dah ong kalohk pahn mie ni wasahn mihting tohrohro?
7 Ahnsou Mwahu en Kalohk: Tohto me pahn kilang ma kitail kin likouda mwahu oh doadoahngki badge oh met kak kahrehiong irail en men ese dahme kitail wiewia oh met kak kihong kitail ahnsou mwahu en padahkihong irail duwen mihting tohrohro. Emen pwutak me sounpar 4 wahda nah pwuhk kapw me e ahpwtehn alehdi nan mihting tohrohr nan wasahn mwenge ehu mwurin mihtingo oh kasalehiong emen tohndoadoahk ko. Met kihong ahnsou mwahu ong eh pahpa oh nohno en luke tohndoadoahko en iang mihting tohrohro.
8. Ia duwen atail kak kahlemengih en Sises peneinei arail kin kesempwalki sapwellimen Siohwa koasoandi en kaudok?
8 Kamadipw sarawi kan en mahs kin wia ahnsou kaperen ehu me mehn Suhs akan me men esehla laud duwen Siohwa kin kasikasik. (Deud. 16:15) Sapwellimen Sises peneinei kin tounmeteikihla soahng tohto pwe ren kak iang towehda oh paiekihda laud. Kitail pil kin kalahnganki atail mihting tohrohr kan duwehte kisakis ehu sang rehn Samatail nanleng me diren limpoak. (Seims 1:17) Met iei ahnsou en kaunopadahng ahnsou mwahu wet en kaudokiong Siohwa ni peren nan ehuehu pahr!
[Kaokon nan Pali 6]
Mehn Kataman ong Mihting Tohrohr
◼ Mwengehn Souwas: Menlau wahdo kanamwail mwengehn souwas ni wasahn mihting a kaidehn kohla ekis wasa tohrohr pwehn ale kanamwail mwenge. Ke kak doadoahngki kisin cooler me kak kohdi pahn sehr kan. Cooler lapala kan oh dewen mwenge me kilahs sohte mweimwei en wisiklohng nan wasahn mihting.
◼ Meirong kan: Kitail kak kasalehda atail kalahnganki koasoandi en mihting tohrohr ni atail pahn kihda meirong ong doadoahk en sampah pwon nan atail Wasahn Kaudok de ni wasahn mihting tohrohr. Ma ke pahn doadoahngki check, menlau ntingihdi “Jehovah’s Witnesses.”