Me Pwulopwul kan—Wiahda Ehu Poahsoan Kehlail ong Ahnsou Kohkohdo
1. Dahme kahrehda Kristian pwulopwul kan anahne kakairada pwoson kehlail?
1 Dahme kin keieu kesempwal nan omw madamadau? Dahme ke kin medemedewe? Ia duwe, soahng kan me ke kin medemedewe laud kin pid mehkan en ahnsou wet de mehkan en ahnsou kohkohdo duwen sapwellimen Koht inou kan? (Mad. 6:24, 31-33; Luk 8:14) Ke anahne pwoson laud pwe ken kak mwekidki sapwellimen Koht inou kan, nin duwen me kitail kilang sang mehn kahlemeng en Eipraam oh Moses. (Ipru 11:8-10, 24-26) Ia duwen omw kak kakairada soangen pwoson wet oh wiahda “ehu poahsoan kehlail ong ni ahnsou kohkohdo”?—1 Tim. 6:19.
2. Dahme kitail sukuhlki sang mehn kahlemeng en Nanmwarki Sosaia?
2 Rapahki Siohwa: E inenen mwahu ma ke kin iang omw peneinei wia amwail koasoandi en papah Siohwa. Ahpw met sohte itar en kakehlailihala pein omw pwoson. Pwe ken “padahngki duwen Koht,” pein kowe anahne rapahki Siohwa. (Lep. Pad. 2:3-5; 1 Kron. 28:9) Iei met me Nanmwarki pwulopwul Sosaia wiadahr. Mendahki e kekeirda nan wasa ehu me sohte kin kakehlaka eh nanpwungmwahu rehn Siohwa, ahpw “e tapihada kaudokiong [“rapahki,” NW] Koht en eh pahpa kahlap Nanmwarki Depit” ni ahnsou me e sounpar 15.—2 Kron. 34:3.
3. Ia duwen me pwulopwul kan rahnwet ar kak rapahki Siohwa?
3 Ia duwen omw kak rapahki Siohwa? Sang ni omw pahn tehk kanahieng dahme ke kamehlele oh “esehda” de kadehde ong pein uhk me e uhdahn mehlel. (Rom 12:2) Karasepe, ke kak kawehwe dahme Paipel mahsanih duwen nta de kadehde me Wehin Koht tepidahr kakaun nanleng nan pahr 1914? En “marainkihla me mehlel” kin kesempwal ong omw pahn wiahda ehu poahsoan kehlail ong ahnsou kohkohdo.—1 Tim. 2:3, 4.
4. Ia duwen sounkalohk me saikinte papidaisla ar kak kasalehda arail kin kekeirda?
4 En Sosaia eh kin rapahki Koht kin imwihla mwahu. Mwohn eh lel sounpar 20, e kin eimah oh kasorehla kaudok likamw kan nan sahpwo. (2 Kron. 34:3-7) Pil duwehte met, omw kakairada omw loalokongkihla duwen Koht pahn sansalda sang ni omw wiewia. (1 Tim. 4:15) Ma kowe emen sounkalohk me saikinte papidaisla, nantihong kamwahwihala omw doadoahk en kalohk. Ke dehr kin itarkihte omw kin kihla pwuhk de kisin doaropwe kan. Wiahki omw mehn akadei ken kin doadoahngki Paipel, kawehwe ire kan, oh kakairada en tohn ihmwo arail peren en onopki Paipel. (Rom 12:7) Met pahn seweseiuk ken kakairada mwahu omw esehla duwen Koht oh wiahda ehu poahsoan kehlail ong ahnsou kohkohdo.