Doadoahngki Kisin Doaropwe Pwehn Lohkiseli Rongamwahu
1. Ia duwen sapwellimen Koht aramas akan ar kin doadoahngki kisin doaropwe kan?
1 Ahnsou reirei, sapwellimen Siohwa aramas akan kin doadoahngki kisin doaropwe me audaudki padahk en Paipel pwehn lohkiseli rongamwahu. Nan pahr 1880, C. T. Russell oh ienge ko tepida wiahda kisin doaropwe ehu (Bible Students’ Tracts) oh doaropwe pwukat kohda ong me kin wadek Kahn Iroir pwe ren kihong wehipokon. Uwen arail kesempwalki kisin doaropwe kan me kahrehda nan pahr 1884 ni C. T. Russell eh registerihla corporation ehu pwehn kalaudehla doadoahk en Wehio, lepin lokaia “tract” (kisin doaropwe) iang mi nan ahdo, Zion’s Watch Tower Tract Society me met adaneki Watch Tower Bible and Tract Society of Pennsylvania. Mwohn pahr 1918, Tohn Sukuhl en Paipel kan kihpeseng kisin doaropwe kan me tohtohsang silisapw (300 million). Kisin doaropwe kan pousehlahte wia mehn doadoahk mwahu ong kalohk.
2. Dahme kahrehda kisin doaropwe kan mwahu?
2 Dahme Kahrehda Kisin Doaropwe kan Mwahu?: Kisin doaropwe kan me lingan oh aramas pahn men kilang. Audepe kan mwotomwot ahpw kaperen en wadek oh kihda kasukuhl mwahu. Tohnihmw kan me kin apwalki wadek makasihn de pwuhk pahn perenki kisin doaropwe pwukat. Kisin doaropwe kan kin mengei en kihla. Sounkalohk kapw kan oh seri kan pahn pil mengeiki kihla. Kisin doaropwe kan kin tikitik oh mengei en weuwa.
3. Kasalehda dahme wiawihong uhk de meteikan me kasalehda kamwahupen kisin doaropwe kan.
3 Me tohto tepin esehkihla padahk mehlel kisin doaropwe. Karasepe, lih emen nan Haiti kilangada ehu neitail kisin doaropwe nanialo. E pwekida, wadek oh nda “I diarada padahk mehlel!” Kedekedeo e kohla ni Wasahn Kaudok, tepida onop Paipel oh papidaisla. Met pweida pwehki manaman en Mahsen en Koht me dierek nan kisin doaropwe ehu.
4. Ia atail mehn akadei ni atail pahn kihla kisin doaropwe kan nan sounpwongo?
4 Kalohk Ihmw Lel Ihmw: Pwehki kisin doaropwe kan kin wia mehn doadoahk mwahu ong kalohk, tepida sang November, kitail pahn kin kihla nan ekei sounpwong. Atail mehn akadei kaidehn en kihlahte kisin doaropwe kan, ahpw en doadoahngki pwehn tapihada koasoi. Ma emen perenki rong ni atail tepin tuhwong de ni atail pwurehng pwurala reh, kitail kak kasalehda ia mwomwen atail pahn wia onop en Paipel ni atail pahn doadoahngki pwuhken Paipel Padahngki de pwuhk teikan. Ia duwen atail kak kihla kisin doaropwe kan ni atail kalohk ihmw lel ihmw? Kisin doaropwe kan wekpeseng, kahrehda kitail anahne esehla audepen me kitail pahn kihla.
5. Ia duwen atail kak kihla kisin doaropwe ni atail kalohk ihmw lel ihmw?
5 Kitail anahne wekidala atail padahk pwe en konehng atail wasahn kalohk oh kisin doaropwe me kitail doadoahngki. Kitail kak tepida koasoi ni atail kihong tohnihmwo ehu kisin doaropwe. Kilel kaselel kan pohn kisin doaropweo kakete kahrehda en men wadek. De kitail kak kasalehda ekei kisin doaropwe kan oh mweidohng tohnihmwo en pilada mehnia me e perenki. Ni atail kin kalohk wasa kan me aramas kin pweiek en ritingada arail wenihmw kan, kitail kak kihda kisin doaropwe wasa me tohnihmwo kak kilang, de kak pekihda ma kitail kak kapwadelong pahn wenihmwo pwe kitail men ese eh madamadau. Ma oaralape kihda peidek ehu, kitail kak idek reh eh madamadau. De kitail kak wia peidek ehu me kak kamwakid ih en iang koasoi. Kitail kak wadek ehu wasa nan kisin doaropweo ong tohnihmwo oh uhdi ni peidek kan oh luke en kasalehda eh madamadau. Kitail kak pahkala oh wadek iren Paipel kesempwal kan. Mwurin atail koasoiapene ekei ire kan, kitail kak kanekehla atail koasoi oh koasoanehdi ni sansal iahd kitail pahn pwurala. Ma mwomwohdiso me kitail iang kin kalapw kihdi pwuhk kan ni ihmw me sohte towe, kitail kak kihdi ehu kisin doaropwe wasa me sohte sansal ong meteikan.
6. Ia duwen atail kak doadoahngki kisin doaropwe kan nanial?
6 Kalohk Nanial: Mie pak ke doadoahngki kisin doaropwe kan ni omw kalohk nanial? Ekei kin karuwaru oh sohte men uhdi pwehn koasoiong kitail. Ele e pahn apwal en ese ma re uhdahn men rong. Kitail sou kihong irail kisin doaropwe kan a kaidehn Kahn Iroir kapw kan ma kitail sehse me re pahn uhdahn wadek. Pwehki pohn kisin doaropwe me kaselel oh audepe mwotomwot, arail men ese duwen doaropweo ele pahn kangoange ren wadek ni ahnsou me re ahneki minit kei. Ahpw, kitail kak koasoiapene ekei ire kan nan doaropweo ma re sohte karuwaru.
7. Kasalehda ia duwen ekei doadoahngki kisin doaropwe kan ni arail kalohk ahnsou sohte lipilipil?
7 Kalohk Ahnsou Sohte Lipilipil: E mengei en doadoahngki kisin doaropwe kan ni atail kin kalohk ni ahnsou sohte lipilipil. Emen brother kin wahda ekei nan eh pwekid ni ahnsou me e kin kohkohsang ni imweo. Ni eh kin tuhwong emen duwehte soun sidohwa men, e kin idek ma e men wadek mehkot oh kihong ehu kisin doaropwe. Ni ehu pwopwoud ara mwemweitla kahnimw en New York, re pohnese me re pahn tuhwong aramas akan sang soangsoangen sahpw kan. Kahrehda re wahda pwuhken Nations oh ekei kisin doaropwe kan ni soangsoangen lokaia kan. Eri, ni ara kin rong emen me netinet ni keilen ahl akan de mwomwohd limwahra nan wasahn mwenge de wasahn kommoal kan oh lokolokaiahki ehu lokaiahn sahpw tohrohr, ira kin kihong ehu doaropwe ni pein eh lokaia.
8. Ni ahl dah me kisin doaropwe kan rasehng werentuhke?
8 “Kamwarak Omw Werentuhke”: Kisin doaropwe kan kak rasehng werentuhke. Soumwet men kin kamwarak werentuhke tohto pwehki e sehse mehnia me pahn wosada. Eklesiasdes 11:6 mahsanih: “Padokedi [“kamwarak omw werentuhke,” NW] nimenseng oh pil nin soutik; pwe ke sehse ma koaros pahn pweida mwahu de soh; oh ke pil sehse ma ehu pahn pweida mwahusang ehu.” Kahrehda, kitail en “kin kaparapeseng loalokong” sang ni atail pahn doadoahngki mehn kalohk inenen mwahu wet.—Lep. Pad. 15:7.
[Blurb nan pali 3]
Pwehki kisin doaropwe kan kin wia mehn doadoahk mwahu ong kalohk, tepida sang November, kitail pahn kin kihla nan ekei sounpwong