Karanih Koht

“Komwi Uhdahn Pahn Ketin Pengidi Pohi”

AKTIKITIK kin wia irair kaselel ehu. Kitail kin kalapw men karanih irail me kin aktikitik. Ahpw nan sampah rahnwet, e kin apwal en diar aramas me uhdahn aktikitik, ahpw mehlel aramas akan me kin ahneki manaman pohn meteikan. Ahpw ia duwen Siohwa Koht, Meno me keieu manaman nanleng oh pil sampah? Ia duwe, e ketin aktikitik? Kitail pahn tehkpene dahme soukohp Seremaia koasoia nan Koulen Kedepwidepw kan 3:20, 21, (NW): “Komwi uhdahn pahn ketin pengidi pohi. Ih met me I pahn katamankihong ei mohngiong. Ihme kahrehda I pahn kasalehda irair en kanengamah oh awiawih.”

Seremaia ntingihedi Koulen Kedepwidepw kan ni ahnsou apwal ehu nan poadopoad en Israel. E ahpwtehn kilang mehkot me inenen kansensuwedihala. E kilang mehn Papilon kan arail kasohrehla Serusalem. Soukohpo ese me kasohrala wet sang rehn Koht oh e konehng mehn Israel kan pwehki diparail kan. Ahpw ia duwen, solahr ahn Seremaia koapworopwor? E kin pehm me Siohwa kin ketin doh kahrehda e sohte ketin mwahngih me koluhla kan oh ketikinrailsang nan irair en sohla koapworopwor? Tehk dahme Seremaia koasoia nin duwen emen me kin wiliandi nah aramas akan.

Mendahki pali laud en aramas ko kin nsensuwedla, ahpw Seremaia ahneki koapworopwor. E patohwan ong Siohwa: “Komwi uhdahn pahn ketin pengidi pohi.” (Iretikitik 20) Seremaia sohte ahneki peikasal. E ese me Siohwa sohte pahn ketin manokehla ih de me koluhla kan nanpwungen sapwellime aramas akan. Dahme Koht wasa lapalahpie pahn ketin wia?​—Kaudiahl 15:3.

Seremaia kamehlele me Siohwa pahn ketin “pengidi” pohn irail me koluhla mehlel. Lepin lokaia wet kin sewese kitail en medewehiong Siohwa nin duwen emen me uhdahn kadek. Siohwa “kaun lapalap en mehkoaros nin sampah” pahn ketin pengidi, ni karasaras, oh pwekasang sapwellime tohnkaudok kan nan irair en wiakau oh ketin kapwurehdo ren kenikenla reh. (Melkahka 83:18) Pwehki koapworopwor wet, e kamweitala mohngiong en Seremaia me diren nsensuwed. Soukohp lelepeko koasoanehdi teng en kanengamah awiawih lao Siohwa ketin pilada ahnsou me e pahn ketin doarehla sapwellime me koluhla kan.​—Iretikitik 21.

Dahme Seremaia ntingihedi uhdahn padahkihong kitail soahng riau duwen Siohwa. Keieu, e ketin aktikitik. Mendahki e ketin sapwellimanki “manaman me lapalahpie,” Siohwa ketin ahnsou koaros kupwurki ehuiong kitail oh sewese kitail ni ahnsou me sohla atail koapworopwor. E kin mwomwen me e kin ketin pengidi pwehn karanih kitail. (Sohp 37:23; Melkahka 113:5-7) Ia duwe, met sou kin kamweitala kitail? Keriau, Siohwa kin ketin kalahngan oh “diren mahk” ong me dipan koaros me koluhlahr oh ketin kupwurki ren pwurehng kenikenla reh. (Melkahka 86:5) Irair pwukat en aktikitik oh diren mahk kin doadoahkpene.

Ia uwen atail kalahnganki Siohwa eh sohte ketin duwehte kaun teikan me kin kahngohdi oh sohte katapanki pepehm en meteikan pwehki arail pohnmwahso. Mwurin omw wadekehr ire mehlel me Siohwa iei Koht aktikitik oh ketin kupwurki “pengidi” pwehn ketikihong sapwellime tohnkaudok kan koapworopwor ni ahnsou me sohla arail koapworopwor, ke sou men kalaudehla omw sukuhlki duwen ih?

[Blurb nan pali 32]

Siohwa ketin ahnsou koaros kupwurki ehuiong kitail oh sewese kitail ni ahnsou me sohla atail koapworopwor. E kin mwomwen me e kin ketin pengidi pwehn karanih kitail