Doadoahngki “Dahme Kitail Kak Sukuhlkihsang Mahsen en Koht”—En Tapiada Koasoakoasoipene
1. Soangen mehn doadoahk kapw dah me kitail alehdi ong doadoahk en kalohk?
1 Pwihn me Kin Apwalih Mwomwohdiso nan Sampah Pwon kihpesengehr kisin pwuhk me oaralape koasoia “Dahme Kitail Kak Sukuhlkihsang Mahsen en Koht” ni lokaia tohto. Ia duwen atail kak doadoahngki mehn doadoahk kapw wet ni ahnsou me kitail pahn kaunopada atail padahk kan ong doadoahk en kalohk? Pwehki mie iren Paipel kan me mi pahnangin ehuehu oaralap en Paipel kan, duwehte pwuhken Reasoning, e uhdahn kak sawas laud en tapiada koasoakoasoi.
2. Ia duwen atail kak doadoahngki kisin pwuhk “Dahme Kitail Kak Sukuhlkihsang Mahsen en Koht” nan kalohk?
2 Ele ke pahn doadoahngki peidek 8 oh nda: “Se kin pwarado ni mwotomwot pwehki aramas tohto kin medemedewe, ‘Ia duwe, Koht me pwukoahki lokolok en aramas?’ [Nan ekei wasahn kalohk kan, e pahn keieu pweida mwahu en kasalehiong tohnihmwo peideko.] Ia omw madamadau? [Mweidohng tohnihmw en sapeng.] Paipel kihda pasapeng mwahu ong peidek wet.” Wadek oh koasoiapene ehu iren Paipel me kileldi wasao de tohtohsang. Ma tohnihmwo kasalehda me e perenki rong, ke kak kasalehiong ih peidek 20 ko me kileldi ni tepin pwuhko oh peki reh en pilada ehu me ke pahn pwurodo kumwa koasoiapene. De ke kak kihla ehu neitail pwuhken onop kan me mie iren sawas tohto me pid oaralap me ke koasoia.
3. Ia duwen atail kak doadoahngki kisin pwuhk “Dahme Kitail Kak Sukuhlkihsang Mahsen en Koht” en tapiada koasoakoasoi nan wasahn kalohk kan me aramas akan iang pelien lamalam ehu me kaidehn Kristian?
3 Peidek 4 oh 13 lel 17 ele pahn kak keieu sawas laud nan wasahn kalohk kan me aramas akan iang pelien lamalam ehu me kaidehn Kristian. Karasepe, ele ke pahn kak doadoahngki ire kan sang peidek 17 oh nda: “Se kin pwarodo ni mwotomwot pwehn kihda sawas ong peneinei kan. Ke pahn pwungki me peneinei kan kin lelohng kahpwal tohto rahnpwukat? [Mweidohng tohnihmw en sapeng.] Pwopwoud tohto diarada me lepin mahsen erpit pwukat kin sewesei irail: “Emenemen lih pwopwoud en wauneki eh pwoud.” [Ke sohte anahne koasoia me met kohsang Episos 5:33. Ma ke koasoakoasoiong lih emen, ele ke pahn men doadoahngki mahsen kan nan Episos 5:28.] Ke medewe ma emen kapwaiada kaweid wet e pahn wia kamwahu ehu ong mouren pwopwoud ehu?”
4. Dahme ke kak wia ni kaimwiseklahn omw koasoiong emen me iang pelien lamalam ehu me kaidehn Kristian?
4 Ni kaimwiseklahn omw koasoakoasoi, wiahda koasoandi pwehn pousehla amwa koasoakoasoipeneo ehu ahnsou. Mwein ke kak koasoanehdi en koasoiapene ehu iren Paipel teikan me mi pahn peidek me ke doadoahngkio. Ni ahnsou me konehng, ke kak kasalehiong tohnihmwo me lepin mahsen erpit ko me ke ehukihong ih kohsang nan Paipel. Me pid dahme kumwa koasoaiapeneo oh en aramaso madamadau duwen Paipel, kihong ih pwuhk ehu me ke leme me e pahn perenki.—Kilang pali 3-6 en Atail Doadoahk ong Wehio en December 2013.