Irelaud Weneu
Sewese me Pwulopwul Men en Pweida
1, 2. Soangen kahpwal oh peren dah me ahnsoun pwulopwul kin wahdo?
NAINEKI me pwulopwul men me mahki sounpar 13 lel 19 kin weksang naineki emen me sounpar 5 de sounpar 10. E kin mie kahpwal akan erein sounpar 13 lel 19, ahpw e pil kin mie peren oh kapai kan. Karasepe, Sosep, Depit, Sosaia oh Timoty kin kasalehda me me pwulopwul kan kak kapwaiada arail pwukoa oh ahneki nanpwungmwahu rehn Siohwa. (Senesis 37:2-11; 1 Samuel 16:11-13; 2 Nanmwarki 22:3-7; Wiewia 16:1, 2) Rahnwet, me pwulopwul tohto pil kin kasalehda met. Mwein mie me ke kin ese.
2 Ahpw ekei me pwolupwul kin ahneki kahpwal erein ahnsowo. Me pwulopwul kan kin ahneki pepehm en nsensuwed oh nsenamwahu. Pwutak oh serepein pwulopwul kan ele kin men uhtohrda oh lingeringerki arail pahpa nohno ar kin ireiraildi sang wia soahng kei. Ahpw me pwulopwul pwukat me soakoahiek oh re kin anahne arail pahpa oh nohno en sewese irail ni limpoak oh kanengamah. Ei, ahnsoun pwulopwul kak kaperen, ahpw pil kak mie kahpwal ong pahpa nohno kan oh me pwulopwul kan. Ia duwen me pwulopwul ar kak ale sawas erein soangen ahnsowo?
3. Ia duwen pahpa nohno ara kak sewese neira me pwulopwul kan ren kekeirda?
3 Pahpa nohno me kin peikiong kaweid en Paipel kin wia uwen ara kak koaros pwe ira en sewese neira me pwulopwul kan pwe ren kak kekeirda mwahu erein ahnsou apwalo oh wiahla aramas likilik. Sohte lipilipil wasa oh ahnsou, pahpa nohno oh me pwulopwul kan me kin doadoahngki kaweid en Paipel kin pweida.—Melkahka 119:1.
KOASOI NI MEHLEL OH SALEDEK
4. Dahme kahrehda koasoipene ni mehlel oh saledek kin uhdahn kesempwal ni ahnsou me seri kan sounpar 13 lel 19?
4 Paipel mahsanih: “Ale kaweid koaros uwen me ke kak, ke ahpw pahn pweida, pwe ma soh, ke pahn pwupwudi.” (Lepin Padahk 15:22) Ma pahpa nohno oh seri kan kin anahne koasoipene ni mehlel oh saledek ni seri kan ar tikitik, koasoakoasoipene wet uhdahn kesempwal ahnsou me seri kan sounpar 13 lel 19, pwehki iei ahnsou me re sohte kin kalapw mi nan imwarail ahpw re kin kalapw mi rehn iengerail tohnsukuhl de kompoakparail kan. Ma pahpa nohno oh seri kan sohte kin koasoipene ni mehlel oh saledek, me pwulopwul kan pahn kakete sohla karanih peneinei. Eri ia duwen soangen koasoakoasoipene wet eh kak popouslahte?
5. Ia duwen me pwulopwul kan ar pahn kilangwohng koasoakoasoipene rehn arail pahpa nohno?
5 Me pwulopwul kan oh pahpa nohno kin anahne sawaspene. Mehlel, me pwulopwul kan ele kin apwalki koasoiong arail pahpa nohno kan sang ni ahnsou me re tikitik. Ahpw tamataman me “wehi ehu pahn pwupwudi ma sohte me kaweid. Sounkaweid tohto kin kahrehda onepek mwahu.” (Lepin Padahk 11:14) Mahsen pwukat kin doadoahk ong koaros, me pwulopwul oh pil me mah kan. Me pwulopwul kan me pohnese met kin wehwehki me re anahnehte ale kaweid mwahu pwehki re pahn lelohng irair kan me pahn apwal sang mahs. Re anahne pohnese me arail pahpa oh nohno me iang padahk mehlel kak kaweid irail pwehki re lelohngehr soahng tohto nan arail mour oh kasaledahr arail nsenoh ni limpoak erein sounpar tohto. Ihme kahrehda, me pwulopwul loalokong men sohte pahn sohpeisang eh pahpa oh nohno erein soangen ahnsowo.
6. Soangen madamadau dah pahpa nohno me limpoak oh erpit pahn ahneki me pid koasoakoasoiong neirail me pwulopwul kan?
6 Koasoakoasoipene ni saledek kin wehwehki me pahpa de nohno pahn nantihong wiahda ahnsou ni ahnsou me me pwulopwul men anahne koasoi. Ma kowe pahpa de nohno, ke pahn anahne mihmi rehn serio oh pil men koasoiong. Met sohte pahn mengei. Paipel kin mahsanih me mie “ahnsoun nennenla oh ahnsoun mwoarongada,” de koasoi. (Eklesiasdes 3:7) Ni ahnsou me me pwulopwul men kin pehm me iei ahnsou mwahu en koasoi, ahpw mwein ong kowe soh. Mwein iei ahnsou me ke koasoanehdier ken onop, kommoal, de wia kisin doadoahk en nan ihmw. Ahpw ma e men koasoiong uhk, song ken wekidala omw koasoandi oh rong ih. Pwe ma soh, ele e solahr pahn men wia met. Tamataman sapwellimen Sises mehn kahlemeng. Ehu pak, e ketin wiahda sapwellime ahnsoun kommoal. Ahpw ni ahnsou me aramas ako pokondo reh pwe ren rong ih, e sohte ketin kommoal ahpw e ketin tapihada padapadahk ong irail. (Mark 6:30-34) Pali laud en me pwulopwul kan ese me arail pahpa nohno me kedirepw, ahpw re anahne arail pahpa nohno en kin kasalehiong irail me re pahn sewese irail ma re anahne. Ihme kahrehda, pahpa nohno anahne mi rehrail oh nantihong wehwehkihla arail anahn.
7. Dahme pahpa nohno en dehr wia?
7 Tamanda ahnsou me ke pwulopwul oh kin mwahuki kamwan. Pahpa nohno kan anahne perenki mi rehn neirail seri kan. Ma pahpa nohno kin pisek, dahme ira kin wia? Ma ahnsou koaros irahte me kin wiapene soahng kan ni ara kin pisek, neira seri pwulopwul kan pahn kak mwadang kasawihda. Ma me pwulopwul kan kin medewe me kompoakparail kan nan sukuhl kin nsenohki irail laudsang pahpa nohno, re pahn kak lelohng kahpwal.
DAHME RE PAHN KOASOIA
8. Ia duwen pahpa nohno ara kak padahkihong seri kan ren kesempwalki ren kin mehlel, doadoahk laud oh mourki tiahk mwakelekel?
8 Ma pahpa nohno saikinte padahkihong neira seri kan ren kesempwalki ren kin mehlel oh doadoahk laud, ira uhdahn anahne wia met ahnsou me seri ko sounpar 13 lel 19. (1 Deselonika 4:11; 2 Deselonika 3:10) E pil kesempwal ong ira en tehk mwahu ma neira seri ko kin uhdahn kamehlele kesempwalpen arail pahn mour mwakelekel. (Lepin Padahk 20:11) Mehn kahlemeng en pahpa de nohno kin kasalehda laud irair pwukat. Duwehte ohl pwopwoud kan me sohte iang padahk mehlel ar kak “alehkihla pwoson [ahn arail pwoud] mouren wiewia mwahu,” me pwulopwul kan pil kak esehla kaweid pwung kan sang wiewia en arail pahpa oh nohno. (1 Piter 3:1) Ahpw mehn kahlemeng kelehpw sohte kin itar pwehki seri kan pil kin kilang mehn kahlemeng suwed tohto oh kasongosong tohto likin arail peneinei. Ihme kahrehda, pahpa nohno me kin nsenohki seri kan kin anahne ese dahme seri kan kin medewehki dahme re kin kilang oh rong oh re kin anahne koasoipene mwahu.—Lepin Padahk 20:5.
9, 10. Dahme kahrehda pahpa nohno anahne padahkihong neirail seri kan ire kan me pid wia nsenen pwopwoud? Ia duwen ara kak wia met?
9 Met kin mehlel ong ire kan me pid wia nsenen pwopwoud. Pahpa oh nohno, kumwa kin namenengki koasoia ire wet ong noumwa seri kan? Mehnda ma e kanamenek, kumwa nantihong koasoiaiong irail pwehki noumwa seri kan uhdahn pahn rong sang rehn emen tohrohr. Ma kumwa sohte kin padahkihong irail duwen met, re pahn kakete alehdi ire sapwung kan. Nan Paipel, Siohwa sohte ketin suwedki mahsanih duwen ire pwukat, kahrehda pahpa nohno en dehr pil suwedki koasoia ire pwukat.—Lepin Padahk 4:1-4; 5:1-21.
10 Kitail kin kalahnganki Paipel eh audaudki kaweid sansal me pid wia nsenen pwopwoud oh Sounkadehdehn Siohwa kan kin wiadahr pwuhk tohto me audaudki iren sawas tohto. Iren sawas pwukat kin kasalehda me kaweid en Paipel pil kin mwahu ong atail ahnsou. Ke sou doadoahngki mehn sawas pwukat? Karasepe, ke sou koasoiaiong noumw pwutak de serepein iren onop me oaralape “Pahpa oh Nohno kan Anahne Padahkihong Neirail Seri kan Duwen Wia Nsenen Pwopwoud?” nan Kahn Iroir en December 1, 2011, pali 29 oh “Koasoiaiong Noumw Seri kan Duwen Wia Nsenen Pwopwoud,” nan Kahn Iroir en December 1, 2010, pali 18-20?a Ele ke pahn pwuriamweikihla kamwahu me pahn kohsang met.
11. Dahme keieu mwahu pahpa nohno en wia me pahn padahkihong neirail seri kan duwen arail pahn papah Siohwa?
11 Ire dahieu me keieu kesempwal pahpa, nohno oh seri kan anahne koasoiapene? Wahnpoaron Pohl kasalehda duwen met ni eh ntingihedi: “Kumwail kakairada [noumwail seri kan] ni kaiahn oh madamadau en Siohwa.” (Episos 6:4, NW) Seri kan kin anahne sukusukuhlki duwen Siohwa. Ahpw keieu, re anahne sukuhlki ren poakohng ih oh re anahne men papah ih. Mehn kahlemeng kan pil kak uhdahn sewese irail. Ma me pwulopwul kan kin kilang me arail pahpa nohno kan kin poakohng Koht ‘sang nan kapehdarail unsek, sang ni mourarail unsek, sang ni arail lamalam koaros unsek,’ oh me met kin imwila mwahu nan arail mour, ele re pahn pil men wia duwehte. (Madiu 22:37) Pil ni ahlohte, ma me pwulopwul kan kin kilang me arail pahpa nohno kan kin ahneki madamadau toupahrek me pid ahneki kepwe kan oh mwohneki Wehin Koht nan arail mour, met pahn sewese irail en pil kakairada soangen madamadauohte.—Eklesiasdes 7:12; Madiu 6:31-33.
12, 13. Dahme kitail anahne tamataman pwe onop en peneinei en kak pweida?
12 Ahn peneinei onop en Paipel ehuehu wihk iei ehu sawas laud ong padahkihong me pwulopwul kan sapwellimen Koht padahk oh koasoandi kan. (Melkahka 119:33, 34; Lepin Padahk 4:20-23) Arail kaukaule wia soangen onop wet kin kesempwal. (Melkahka 1:1-3) Pahpa nohno oh neira seri kan anahne pohnese me onop en peneinei kin kesempwal sang koasoandi teikan me re kin wia. Patehng met, arail kin ahneki madamadau pwung kin kesempwal pwe onop en peneinei en pweida. Emen pahpa nda: “Dahme kin keieu sawas iei aramas me kin wia onopo en wiahda ahnsoun onop en peneinei en soanamwahu ong koaros oh wahun. Mwein e sohte pahn kin mengei en toupahrek ahnsou koaros oh pil ahn me pwulopwul kan madamadau pahn kin anahne kapwungpwungla. Ma e sohte kin pweida pak ehu de riau, nantihong oh koapworopworki me e pahn pweida ahnsou kohkohdo.” Pahpa menet nda me nan eh kapakap mwohn ehuehu onop, e kin peki sawas sang rehn Siohwa pwe koaros me iang onopo en ahneki madamadau pwung.—Melkahka 119:66.
13 Wia onop en peneinei iei pwukoahn pahpa oh nohno me iang padahk mehlel. Ekei pahpa nohno ele sohte koahiek en wia sounpadahk oh mwein e apwal ong irail en wiahda arail onop en peneinei en kaperen. Mendahki met, ma kumwa kin poakohng noumwa seri kan ni mehlel sang ni amwa wiewia kan, kumwa pahn men sewese irail ni aktikitik oh mehlel pwe ren kekeirda nan padahk mehlel. (1 Sohn 3:18) Mwein irail pahn kin kaulim ekei pak, ahpw re pahn kak pehmada amwa kin uhdahn nsenohkin irail.
14. Ia duwen Deuderonomi 11:18, 19 eh kak doadoahk ahnsoun koasoiaiong seri kan sapwellimen Koht kaweid oh koasoandi kan?
14 Kaidehkin ihte ahnsoun onop en peneinei me pahpa nohno kak padahkihong seri kan duwen sapwellimen Koht kaweid oh koasoandi kan. Ke tamataman sapwellimen Siohwa kehkehlik ong pahpa nohno kan? E ketin mahsanih: “Kumwail tamataman kosonned pwukat oh kesempwalki mehlel. Pirehiong ni pehmwail kan oh ni temwamwail kan pwehn wia kilel en mehn kataman ong kumwail. Kumwail padahkihong noumwail seri kan. Koasoia nan imwamwail oh wasa teikan, ni ahnsoun kommoal oh ni ahnsoun doadoahk.” (Deuderonomi 11:18, 19; pil kilang Deuderonomi 6:6, 7.) Met sohte wehwehki me pahpa nohno kan pahn kin padahk ong neirail seri kan ahnsou koaros. Ahpw moangen peneinei limpoak men anahne kin tetehk ahnsou mwahu pwe en kak kakairada sapwellimen Koht madamadau nan eh peneinei.
PENEU OH WAHU
15, 16. (a) Dahkot peneu? (b) Ihs me pwukoahki kihda peneu oh ihs me pwukoahki rong oh kapwaiada?
15 Peneu iei kasukuhl me kin kapwungala seri kan oh met kin iangahki koasoakoasoipene. Peneu kin pid kapwungala serio laudsang en kaloke, mehnda ma kalokolok pil kin anahn ekei pak. Ahnsou me noumw seri kan tikitik re kin anahne peneu, a ni arail wiahlahr me pwulopwul men, irail pil kin anahnehte soangen peneu teikan, de pil laudsang. Me pwulopwul men me loalokong kin ese me met mehlel.
16 Paipel mahsanih: “Tiahk en pweipwei ma ke mwamwahliki padahk en omw pahpa; ahpw tiahk en loalokong ma ke ale eh kapwung.” (Lepin Padahk 15:5) Soahng tohto me kitail sukuhlki sang iren Paipel wet. E kasalehda me peneu kin anahn. Me pwulopwul men sohte kak ‘ale ahn eh pahpa kapwung’ ma sohte kopwung kohwong ih. Siohwa ketikihong pahpa oh nohno pwukoahn kihda peneu, ahpw mehlel pahpa men. Me pwulopwul men pwukoahki rong kaweid. E pahn sukuhlki soahng tohto oh eh sapwung kan pahn malaulaula ma e kin rong oh kapwaiada kaweid mwahu en eh pahpa oh nohno. (Lepin Padahk 1:8) Paipel mahsanih: “Mehmen me sohte pahn padahngki mehkot uhdahn pahn semwehmwe oh sohte pahn wauwi. Ahpw mehmen me kin rong peneu kan, wauwi pahn mie.”—Lepin Padahk 13:18.
17. Ia duwen pahpa nohno ara pahn toupahrek ni ara kin kihda peneu?
17 Pahpa nohno anahne toupahrek ni ara kin panawih me pwulopwul kan. Ira sohte pahn nohn kakos pwe en dehr kamwakara mwahl neira seri kan oh kahrehda ren medewe me sohte kateparail. (Kolose 3:21) Ahpw pahpa nohno en dehr nohn mweidohng nsenen neira seri kan pwe met pahn irehdi neira kan en ale kaiahn mwahu. Oh met kak kahrehda kahpwal laud. Lepin Padahk 29:17 mahsanih: “Kaiahn mwahwih noumw pwutak, eri, ke ahpw pahn pohnmwahsohki ahnsou koaros. E sohte pahn kanamenekihiukala.” Ahpw iretikitik 15 mahsanih: “Ma seri men pahn mweimweiong pein nsene, e pahn kanamenekihala ine.”
18. Dahme peneu kin kadehde oh dahme pahpa nohno sohte pahn wia ni ara kin kihda peneu?
18 Ni mehlel, peneu me konehng iei kadehdepen ahn pahpa nohno limpoak ong neira seri. (Ipru 12:6, 11) Ma kowe me pahpa de nohno, ke kin ese me e kin apwal en kihda peneu me toupahrek oh sohte kin wekwekseli. E kin mengei en mweidohng me pwulopwul keptakai men en wia nsene pwe en mie popohl. Ahpw ma ih me pahpa nohno kin wia en met, eri mwuhr ira sohte pahn kak koasoanehdi ara peneinei.—Lepin Padahk 29:15; Kalesia 6:9.
DOADOAHK OH MWADONG
19, 20. Ia duwen pahpa nohno ara kak sewese neira seri kan ni loalokong ong me pid mwadong de kamweit?
19 Mahso, aramas kin kasik seri kan ren kin iang wia doadoahk en nan ihmw de nansapw. Rahnwet me pwulopwul tohto kin ahneki ahnsou laud en wia dahme re men wia. Palien pesines kin wiahda soahng tohto me me pwulopwul kan kin doadoahngki ong arail ahnsou. Patehng met, sampah sohte kin kesempwalki koasoandi en Paipel me pid tiahk oh met kak kahrehda kahpwal laud.
20 Ihme kahrehda pahpa nohno koahiek kan kin kolokolete ara pwuhng en wiahda pilipil me pid mwadong de kamweit. Ahpw dehr manokehla me irail me pwulopwul kan wie lalaudla. Ehuehu pahr, irail kin kasikasik aramas en wiahkin irail aramas laud. Ihme kahrehda e konehng pahpa nohno en ekisekis kalaudehla ahn seri ko saledek en pilada mehn kamweit kan ni arail lalaudla, ma arail pilipil kin kasalehda me irail wiahlahr Kristian koahiek kei. Ekei pak, mwein me pwulopwul men kin wiahda pilipil sapwung me pid koul, werek de soahng teikan. Ma met pahn wiawi, pahpa nohno anahne koasoiong me pwulopwulo pwe en kak wiahda pilipil mwahu mwuhr.
21. Ia duwen madamadau pwung ong ahnsoun mwadong de kamweit eh pahn pere me pwulopwul men?
21 Ia uwen ahnsou me pahn kohwong mwadong de kamweit? Nan ekei sahpw, me pwulopwul kan kamehlele me mie arail pwuhng en kin ahneki ahnsoun peren ahnsou koaros. Ihme kahrehda, me pwulopwul men ele pahn wiahda eh koasoandi pwe en kin pereperen. Pahpa nohno me pahn kin padahkihong seri kan me ahnsou pil kin anahn ong soahng teikan me duwehte ahnsou ong peneinei, pein onop, werekiong Kristian koahiek kan, mihting en Kristian kan oh doadoahk en nan ihmw. Met pahn irehdi “peren kan en sampah wet” en dehr kasokehla Mahsen en Koht.—Luk 8:11-15.
22. Dahme anahne patehng mwadong pwe mouren me pwulopwul men en toupahrek?
22 Nanmwarki Solomon koasoia: “Eri, I eseier me ihte me aramas emen kak wia: en peren oh wia uwen eh kak ni ahnsou me e momour. Kitail koaros eri en kin mwenge oh nim, oh nsenamwahuki wahn atail doadoahk, pwe met sang ni kalahngan en Koht.” (Eklesiasdes 3:12, 13) Ei, peren iei kisehn mour. Ahpw doadoahk laud pil kisehn mour. Rahnpwukat, me pwulopwul tohto sohte kin wehwehki nsenamwahu me kin kohsang doadoahk laud de pepehm en wahu me kohsang omw kin nannanti oh kamwahwihala kahpwal ehu. Ekei sohte alehdi ahnsou mwahu en sukuhlkihdi doadoahk ehu pwe ren kak apwalih pein irail. Met kin wia kahpwal ehu ong pahpa nohno. Ke pahn sewese me pwulopwul men en sukuhlkihdi mehkot me pahn sewese ih? Ma ke kak pweida ni omw kin padahkihong me pwulopwul men en kesempwalki oh perenki doadoahk laud, e pahn ahneki madamadau pwung me pahn wia kamwahu ehu erein eh mour.
SANG ME PWULOPWUL ONG ME LAUD
23. Ia duwen pahpa nohno ara kak kangoange neira me pwulopwul kan?
23 Mehnda ma ke ahneki kahpwal rehn noumw me pwulopwul men, iren Paipel wet kin mehlel: “Limpoak me poatopoat, sohte imwi.” (1 Korint 13:8) Ke uhdahn poakohng noumw serio. Dehr uhdihsang omw kin kasalehda limpoak wet. Idek rehmw, ‘I kin kapinga emenemen nei seri ni eh kin kamwahwihala de powehdi kahpwal akan? I kin isaneki ahnsou mwahu kan pwe I en kasalehiong nei seri kan limpoak oh kalahngan?’ Mendahki eh kin mie sawehwe kan ekei pak, ma me pwulopwul kan kin pehm omw limpoakohng irail, re pahn pil limpoakohng uhk.
24. Mehnia kaweid en Paipel kin mehlel me pid kakairada seri kan? Ahpw dahme kitail anahne tamataman?
24 Ahpw ni seri kan ar wie lalaudla, re pahn pein wiahda pilipil kesempwal kan ong irail. Mwein ekei pak, pahpa nohno sohte pahn kin mwahuki pilipil pwukat. Ia duwen ma neira serio pilada en sohla papah Siohwa Koht? Met kak wiawi. Ekei sapwellimen Siohwa tohnleng ko soikala sapwellime kaweid oh uhwongada. (Senesis 6:2; Sud 6) Kaidehn computer kei seri kan me kitail kak prokramihong dahme kitail men ren wia. Irail kepikipikda kei me ahneki saledek en pilipil oh re pwukoahki arail pilipil kan mwohn Siohwa. Ahpw, dahme Lepin Padahk 22:6 kasalehda me mehlel: “Padahkihong kisin seri men duwen eh pahn momour, eri, e pahn tamatamante erein eh mour.”
25. Ia ahl me keieu mwahu pahpa nohno en kasalehda ara kalahngankihong Siohwa ara pwais en wia pahpa nohno?
25 Eri kin kasalehiong noumw seri kan limpoak laud. Wia uwen omw kak ken idawehn kaweid en Paipel kan ni omw kin apwalihirailda. Wiahda mehn kahlemeng mwahu nan omw wiewia kan. Eri ke pahn kihong noumw seri kan ahnsou keieu mwahu en kekeirda nin duwen aramas men me likilik oh lemmwin Koht. Met iei ahl me keieu mwahu pahpa nohno en kasalehda ara kalahngankihong Siohwa ara pwais en wia pahpa nohno.
[Nting tikitik me kileldi pah]
a Menlau kilang irelaud kan me konehng nan keieu oh keriau en pwuhk en Questions Young People Ask—Answers That Work (lokaiahn wai).
IA DUWEN IRE MEHLEL EN PAIPEL PWUKAT EH KAK SEWESE . . . PAHPA NOHNO EN APWALIHADA NEIRA ME PWULOPWUL KAN?
Koasoakoasoipene kin anahn.—Lepin Padahk 15:22.
Kitail anahne kaukaule tehkpene Mahsen en Koht.—Melkahka 1:1, 2.
Aramas loalokong men kin ale kopwung.—Lepin Padahk 15:5.
Mie ahnsoun doadoahk oh ahnsoun mwadong.—Eklesiasdes 3:12, 13.
[Kilel nan pali 78]
Wiahda ahnsou ong me pwulopwul kan ma re men koasoi
[Kilel nan pali 81]
Kaukaule onop Paipel kin kesempwal ong peneinei
[Kilel nan pali 82]
Kasalehda limpoak oh kalahngan ong noumw seri kan