Irelaud Eisek Weneu
Wiahiong Omw Peneinei en Mour Kohkohlahte
1. Dahme Siohwa kin ketin kupwurki ong koasoandi en peneinei?
NI AHNSOU me Siohwa ketin kapwopwoudihada Adam oh Ihp, Adam kasalehda eh peren ni eh ndahla tepin mahsen lingan me kileldi ni lokaiahn Ipru. (Senesis 2:22, 23) Ahpw, Sounkapidao ketin kupwurki laudsang kaperendahte sapwellime aramas akan. E ketin kupwurki pwopwoud oh peneinei kan ren kin wia kupwure. E ketin mahsanihong tepin pwopwoudo: “Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros. I kihong kumwa manaman en kaunda mwahmw akan, menpihr kan oh mahn lawalo kan koaros.” (Senesis 1:28) Pwukoa wet inenen kaselel oh katapan! Adam oh Ihp oh neira seri kan pahn uhdahn peren laud ma ira peik oh wia kupwuren Siohwa ni unsek!
2, 3. Ia duwen peneinei kan ar kak diar peren me keieu laud rahnpwukat?
2 Pil rahnpwukat, peneinei kan kin uhdahn peren ni ahnsou me irail kin ehupene wia kupwuren Koht. Wahnpoaron Pohl ntingihedi: “Poadidi ong Koht kin katapan ong mehkoaros, pwe e kin kolokol inou en mour ahnsou wet oh pil ahnsou kohkohdo.” (1 Timoty 4:8, NW) Peneinei me kin poadidi ong Koht oh idawehn sapwellimen Siohwa kaweid me mi nan Paipel pahn kin peren nan “mour ahnsou wet.” (Melkahka 1:1-3; 119:105; 2 Timoty 3:16) Mehnda ma pil emente tohnpeneinei me kin doadoahngki kaweid pwukat, e mwahusang ma sohte emen kin wia.
3 Pwuhk wet kasalehdahr kaweid en Paipel tohto me kin wiahda nsenamwahu en peneinei. Mwein ke kin kilang me ekei kaweid pwukat kin pwurepwurehng pwarada nan pwuhk wet. Dahme kahrehda? Pwehki kaweid pwukat kin kasalehda padahk mehlel me kin wia kamwahu ong soangen irair koaros nan mouren peneinei. Peneinei me kin nantihong doadoahngki kaweid pwukat kin diarada me poadidi ong Koht uhdahn kin “kolokol inou en mour ahnsou wet.” Kitail pahn pwurehng tehkpene kaweid kesempwal pahieu sang nanpwungen kaweid pwukat.
KESEMPWALPEN KAUNDA PEIN KITAIL
4. Dahme kahrehda kanengamah de kaunda pein kitail kin kesempwal nan pwopwoud?
4 Nanmwarki Solomon koasoia: “Ma ke sohte kak kanengamahiong omw lingeringer, eri, ke me luwet duwehte kahnimw ehu me sohte keledi, me mengeiong aramas en mahweniong.” (Lepin Padahk 25:28; 29:11) ‘Kanengamah’ oh kaunda pein kitail kin kesempwal ong irail me men arail mouren pwopwoud en peren. Lohdiong pepehm suwed me duwehte lingeringer de ineng suwed pahn wiahda kahpwal. E pahn anahne ahnsou reirei pwe en mwahula ma kak.
5. Ia duwen aramas soh unsek men eh kak esehla kaunda pein ih oh ia kamwahupe kan?
5 Mehlel me sohte emen kadaudok en Adam me kak uhdahn powehdi eh soh unsek. (Rom 7:21, 22) Ahpw “kaunda pein kitail” iei kisehn wahn sapwellimen Koht manaman. (Kalesia 5:22, 23, NW) Ihme kahrehda sapwellimen Koht manaman kin sewese kitail en kaunda pein kitail, ma kitail kin kapakapki met, ma kitail kin kapwaiada kaweid mwahu me mi nan Paipel, ma kitail kin werekiong irail kan me kin kasalehda irair wet oh dehr kin iang irail me sohte kin kasalehda irair wet. (Melkahka 119:100, 101, 130; Lepin Padahk 13:20; 1 Piter 4:7) Atail kin nantihong kaunda pein kitail pahn sewese kitail en kak ‘kadohwaneweisang kitail tiahk en nenek,’ mehnda ma kitail pil lelohng kasongosong. (1 Korint 6:18) Kitail sohte pahn wia tiahk lemei. Kitail sohte pahn kamamsakau de kitail pahn uhdihsang kamamsakau. Kitail pahn pil kak meleileiong kapailok oh pil ahnsou apwal akan. Kitail koaros iangahki seri kan en esehla kasalehda irair kesempwal wet en wahn sapwellimen Koht manaman.—Melkahka 119:1, 2.
MADAMADAU PWUNG ONG TAPWI
6. (a) Ia koasoandi en tapwi me Koht ketikihda? (b) Dahme ohl emen en tamataman pwe eh kin wia tapwi en wadohng eh peneinei peren?
6 Keriaun kaweid kesempwal iei pohnese koasoandi en tapwi. Pohl kawehwehda irekidi en koasoandi pwung kan ni eh nda: “I men kumwail en dehdehkihla mwahu padahk wet: duwen Krais eh tapwin aramas koaros, duwen ohl pwopwoud eh moangen eh pwoud, oh duwen Koht eh tapwin Krais.” (1 Korint 11:3) Met kin wehwehki me ohl emen kin kaweid eh peneinei, eh pwoud kin uhpahiong ni loalopwoat oh seri kan kin peikiong arail pahpa nohno. (Episos 5:22-25, 28-33; 6:1-4) Ahpw tehk me koasoandi en tapwi kin kahrehda peneinei en nsenamwahu ma e kin wiawi ni pwung. Ohl pwopwoud me kin poadidiong Koht kin ese me koasoandi en tapwi sohte kin limeidihd. Re kin alasang arail tapwi Sises. Mendahki Sises iei “Kaunen mehkoaros,” e “ketido, kaidehn pwe aramas akan en papah, a pwe en papah aramas akan.” (Episos 1:22; Madiu 20:28) Eri pil duwehte, ohl Kristian men me kin wia tapwi sohte kin wia met ong kamwahupe, ahpw en apwalih anahn en eh pwoud oh nah seri kan.—1 Korint 13:4, 5.
7. Mehnia kaweid en Paipel me pahn kin sewese lih pwopwoud men en kapwaiada eh pwukoa sang rehn Koht nan peneinei?
7 Lih pwopwoud men me kin poadidiong Koht sohte kin siaiong de kaunda eh pwoud. E kin perenki utung oh sewese ih. Paipel kin mahsanih ni sansal me “ohl pwopwoud ih me moangen eh pwoud.” (Episos 5:23) Ni liho eh pwopwoudida, e mihmi pahn manaman en eh pwoudo. (Rom 7:2) Ni ahnsowohte Paipel kin ekerki liho “eh werek mehn sewese.” (Senesis 2:20) E kin sawaski irair oh koahiek me eh pwoud sohte ahneki oh kin utung. (Lepin Padahk 31:10-31) Kaweid en Paipel pwukat kin sewese ohl oh lih pwopwoud en kin wehwehki pwukoahn emenemen oh pil wauneki oh kesempwalki emenemen.
“NAN KAPEHD MWADANG ONG RONG”
8, 9. Kasalehda ekei kaweid me pahn kin sewese koaros tohnpeneinei en kamwahwihala arail koahiek en koasoakoasoipene.
8 Nan pwuhk wet, anahnepen koasoakoasoipene kin kalapw pwarada. Dahme kahrehda? Pwehki e kin mengei en kamwahwihala kahpwal ahnsou me aramas kin koasoipene oh rong kanahieng emenemen. E kin pwurepwurehng kasalehda me soahng riau mie nan koasoakoasoipene. Tohnpadahk Seims kasalehda duwen met: “Emenemen kumwail koaros en nan kapehd mwadang ong rong, ahpw dehr nan kapehd karuaru en lokaia.”—Seims 1:19.
9 E pil kesempwal kitail en kanahieng mwomwen atail kin lokaia. Lokaiahn kapweikeng oh akamai sohte kin wiahda koasoakoasoipene mwahu. (Lepin Padahk 15:1; 21:9; 29:11, 20) Mehnda ma dahme kitail kin nda kin pwung, kasuwed pahn laud sang kamwahu ma kitail kin nda ni ngihl lemei, pohnmwahso de sohte nsenohki pepehm en meteio. Atail koasoi kan en kin “katapan oh kansenamwahu.” (Kolose 4:6) Atail lokaia en kin duwehte “kilel me wiawihkihda kohl oh kapwatkihda silper.” (Lepin Padahk 25:11) Peneinei kan me esehla koasoakoasoipene wiadahr kahk laud ehu ong ahneki peren.
KESEMPWALPEN LIMPOAK
10. Mehnia limpoak me keieu kesempwal nan pwopwoud?
10 Lepin lokaia “limpoak” kin pwurepwurehng pwarada nan pwuhk wet. Ke taman mehnia limpoak me e kin kalapw koasoia? Mehlel me limpoak nanpwungen ohl oh lih (eʹros ni lokaiahn Krihk) kin kesempwal nan pwopwoud. Oh nan pwopwoud kan me kin pweida, soangen limpoak me kin wiawi nanpwungen kompoakepah keren kan (phi·liʹa ni lokaiahn Krihk) kin lalaudla nanpwungen ohl oh lih pwopwoud. Ahpw limpoak me keieu kesempwal iei a·gaʹpe ni lokaiahn Krihk. Iei limpoak me kitail kin kakairada ong Siohwa, Sises oh mehn mpatail. (Madiu 22:37-39) Ih soangen limpoak wet me Siohwa kin ketin kasalehiong aramas. (Sohn 3:16) E uhdahn mwahu atail kin kak kasalehiong atail pwoud oh neitail seri kan soangen limpoak wet!—1 Sohn 4:19.
11. Ia duwen limpoak eh kin wia kamwahu ong pwopwoud ehu?
11 Nan pwopwoud, limpoak sikla wet kin uhdahn “kapatapene oh oarepene mehkoaros pwe en wiahla ehu ni mehlel.” (Kolose 3:14) E kin kolpene pwopwoud ehu oh kin kahrehda ira en men wia dahme kin keieu mwahu ong emenemen oh pil neira seri kan. Ahnsou me peneinei kin lelohng kahpwal, limpoak kin sewese irail en kin ehupene oh kamwahwihala kahpwal kan. Ni pwopwoud ehu ara mahmahla, limpoak kin sewese ira en kin pousehlahte sawaspene oh kesempwalki emenemen. “Limpoak . . . sohte kin mehwo, . . . Limpoak kin sewesei kitail en loalenohng apwal akan koaros, e kin sewese atail pwoson ahnsou koaros, e kin sewesei kitail en liki Koht, oh en pil kanengamah ni mehkoaros. Limpoak me poatopoat.”—1 Korint 13:4-8.
12. Dahme kahrehda limpoak ong Koht me pwopwoud ehu kin ahneki kin kakehlahda ara pwopwoud?
12 Limpoak ong Siohwa me kin keieu katengepene pwopwoud ehu, a kaidehn ihte limpoak nanpwungara. (Eklesiasdes 4:9-12) Dahme kahrehda? Wahnpoaron Sohn ntingihedi: “Iet duwen wehwehn poakohng Koht: kitail en peikiong sapwellime kosonned akan.” (1 Sohn 5:3) Ihme kahrehda pwopwoud ehu kin anahne kaiahne neira seri kan en kin poadidiong Koht pwehki iei sapwellimen Koht kehkehlik, a kaidehn ihte pwehki ara poakohng laud neira seri kan. (Deuderonomi 6:6, 7) Ira sohte pahn kin wia tiahk samin kaidehnte pwehki ara poakohng emenemen ahpw pwehki ira kin poakohng Siohwa me “pahn ketin kadeikada me kin mouren kamwahl oh me kin mouren nenek.” (Ipru 13:4) Mehnda ma emen ira wiahda kahpwal laud kan nan ara pwopwoud, limpoak ong Siohwa pahn kin kamwakid meteio en kin nantihlahte idawehn kaweid en Paipel. Meid pai peneinei kan me arail limpoak ong emenemen kin katengetengkihdi arail limpoak ong Siohwa!
PENEINEI ME KIN WIA KUPWUREN KOHT
13. Ia duwen emen eh kin koasoanehdi en wia kupwuren Koht eh pahn kak sewese ih en kin kilanglahngete soahng kan me uhdahn kesempwal?
13 Wia kupwuren Koht iei me keieu kesempwal nan mouren Kristian men. (Melkahka 143:10) Iei met uhdahn wehwehn poadidiong Koht. Ahn peneinei kin wia kupwuren Koht pahn kin sewese irail ren kin kilangwohngete soahng kan me uhdahn kesempwal. (Pilipai 1:9, 10) Karasepe, Sises mahsanih: “I kodohng kamwakidada liaktohrohr nanpwungen sahm akan oh nair pwutak kan, nanpwungen ihn akan oh nair serepein kan, nanpwungen lih pwopwoud pwulopwul kan oh en arail pwoud kan ar nohno kan; en emen eh imwintihti me keieu suwed, iei kiseh kan.” (Madiu 10:35, 36) Met me mehlel pwehki sapwellime tohnpadahk tohto kin ale lokolok sang arail peneinei. E kin kansensuwed oh kamedek. Ahpw atail kin ehuiong peneinei sohte pahn kin kesempwal sang atail limpoak ong Siohwa Koht oh Sises Krais. (Madiu 10:37-39) Ma emen kin kanengamahiong uhwong sang eh peneinei, eh peneinei ele pahn wekila ni arail pahn kin kilang kamwahupen poadidiong Koht. (1 Korint 7:12-16; 1 Piter 3:1, 2) Mehnda ma met sohte wiawi, ke sohte pahn diar kamwahu poatopoat ma ke uhdihsang omw kin papah Koht pwehki uhwong kan.
14. Ia duwen inengieng wia kupwuren Koht eh pahn kin sewese pahpa nohno en mwekid ni ahl me keieu mwahu ong neira seri kan?
14 Ahn pahpa nohno ara wia kupwuren Koht me pahn kin sewese ira en kin wiahda pilipil pwung. Karasepe, nan ekei wasa, pahpa nohno kin kilangwohng neira seri kan nin duwen pai kei. Ira kin kasikasik neira seri kan en apwalih ira ni ara pahn mahla. Mehnda ma e pwung oh konehng seri kan en apwalih arail pahpa nohno me mahla, soangen madamadau wet en dehr kahrehiong pahpa nohno en kangoange seri kan ren nantihong kepwehpwehla. E sohte pahn mwahu ong seri kan ma pahpa nohno kin kakairirailda en kesempwalki dipwisou laudsang arail nanpwungmwahu rehn Koht.—1 Timoty 6:9.
15. Ia duwen Iunis, ahn Timoty nohno eh kin wia mehn kahlemeng kaselel me pid pahpa nohno me kin wia kupwuren Koht?
15 Mehn kahlemeng mwahu en met iei Iunis, me Pohl kompoakepahnki nah pwutak Timoty. (2 Timoty 1:5) Mendahki Iunis pwoudiki emen me sohte pwoson, ih oh ahn Timoty nohno kahlap Lois kaiahnehda Timoty en kin ngoangki poadidiong Koht. (2 Timoty 3:14, 15) Ni ahnsou me Timoty laudla, Iunis mweidohng en kohla iang Pohl kalohki Wehio nin duwen ienge misineri. (Wiewia 16:1-5) Ia uwen eh peren ni ahnsou me nah pwutako wiahla misineri mwahu men! Ahn Timoty poadidiong Koht nin duwen aramas laud men kin kasalehda eh kaiahnda mwahu ni eh tikitik. Mehlel, Iunis peren oh nsenamwahu ni eh rong rongen Timoty eh lelepek nan eh doadoahk en kalohk, mendahki eh kin loaleidki.—Pilipai 2:19, 20.
AHN KOWE OH OMW PENEINEI MOUR AHNSOU KOHKOHDO
16. Dahme Sises kin ketin nsenohki, ahpw dahme e kin ketin keieu kesempwalki?
16 Sises ketin keirda nan peneinei poadidi ehu oh ni eh laudla, e ketin kasalehda me e kin ketin nsenohki eh nohno. (Luk 2:51, 52; Sohn 19:26) Ahpw dahme Sises kin ketin keieu kesempwalki iei kapwaiada kupwuren Koht me pil iangahki ritingadahng aramas akan elen mour soutuk. E ketin wia met ni eh ketin tounmeteikihla sapwellime mour unsek nin duwen meirong ehu ong aramas dipan akan.—Mark 10:45; Sohn 5:28, 29.
17. Koapworopwor kaselel dahkei me sapwellimen Sises mour lelepek kin ritingadahng irail kan me kin wia kupwuren Koht?
17 Mwurin pwoulahn Sises, Siohwa ketin kaiasada ih ong mour nanleng oh ketikihong ih manaman laud, oh mwuhr, e ketin idihada ih nin duwen Nanmwarki en Wehin nanleng. (Madiu 28:18; Rom 14:9; Kaudiahl 11:15) Sapwellimen Sises meirong elehiong ekei aramas ren pilipilda pwe ren iang ih kaunda Wehio. E pil ritingadahng aramas me mohngiong pwung kan mour unsek nin sampah me pahn pwurehng wiahla paradais. (Kaudiahl 5:9; 20:6; 14:1, 4; 21:3-5; 22:1-4) Ehu pwais kaselel me kitail kin ahneki rahnwet iei en padahkihong mehn mpatail kan rongamwahu kaselel wet.—Madiu 24:14.
18. Mehnia mehn kataman oh mehn kangoang me kin kohwong peneinei oh pil emenemen?
18 Nin duwen wahnpoaron Pohl eh kin kasalehda, mourki mour ehu me poadidiong Koht kin kahrehiong kitail en kolokol inou en sohsohki kapai pwukat nan mour “ahnsou kohkohdo.” Ni mehlel, met iei ahl me keieu mwahu ong ahneki nsenamwahu! Tamataman me “sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.” (1 Sohn 2:17) Eri, mehnda ma kowe seri men, de pahpa men, de nohno men, ohl pwopwoud de lih pwopwoud, de me kiripw men me naineki seri de soh, nantihong wia kupwuren Koht. Pil ni ahnsou me ke pwunod de ahneki kahpwal me inenen laud, dehr manokehla me kowe emen ladu en Koht ieias. Eri, omw wiewia kan en kin kaperenda Siohwa. (Lepin Padahk 27:11) Omw wiewia en pil kin kaperenihiuk ahnsou wet oh kihong uhk mour soutuk nan sampah kapw me pahn kohdo!
IA DUWEN IRE MEHLEL EN PAIPEL PWUKAT EH KAK SEWESE . . .
OMW PENEINEI EN PEREN?
Kitail kak kakairada irair en kaunda pein kitail. —Kalesia 5:22, 23, NW.
Pwehki ira kin ahneki madamadau pwung ong tapwi, ohl oh lih pwopwoud kin nsenohki dahme pahn kin keieu mwahu ong peneinei. —Episos 5:22-25, 28-33; 6:4.
Koasoakoasoipene pil kin iangahki rongorong.—Seims 1:19.
Limpoak ong Siohwa pahn kin katengehdi pwopwoud ehu.—1 Sohn 5:3.
Wia kupwuren Koht iei mehn akadei me kin keieu kesempwal ong peneinei ehu. —Melkahka 143:10; 1 Timoty 4:8, NW.
[Koakon nan pali 219]
KISAKIS EN KIRIPW
Kaidehn aramas koaros kin pwopwoudida. Oh kaidehn pwopwoud koaros kin pilada ren naineki seri. Sises ketin wia emen me kiripw oh e mahsanih me kiripw kin wia kisakis ehu ma iei “pwehki Wehin Koht.” (Madiu 19:11, 12) Wahnpoaron Pohl pil pilada en dehr pwopwoud. E nda me koaros kiripw oh pwopwoud iei kisakis ehu. (1 Korint 7:7, 8, 25-28) Ihme kahrehda, mendahki pali laud en pwuhk wet kin koasoia duwen ire kan me pid pwopwoud oh kakairada seri, kitail en dehr kin manokehla kapaipen oh ketingpen kiripw de pwopwoud ahpw sohte naineki seri.