Iren Sawas kan ong Doaropwehn Kasukuhl ong Mihting en Mour oh Kalohk
February 6-12
SOAHNG KESEMPWAL KAN SANG MAHSEN EN KOHT | AISEIA 47-51
“Peikiong Siohwa Kin Wahdo Kapai kan”
ip-2-E 131 par. 18
Siohwa Kin Ketin Padahkih Kitail Pwehn Wia Kamwahupatail
“Rongete Ei Kosonned akan!”
18 Soukohpo mwekidki sapwellimen Siohwa manaman oh mahsanih: “Kaun-o, Wasa Lapalahpie, ketikihiongieier sapwellime manaman oh ketin kadariedohr. Koht sarawien Israel, Kaun-o me omw sounkomour, mahsanih: ‘Ngehi me Kaun-o omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.’” (Aiseia 48:16b, 17) Kasalepen limpoak wet duwen Siohwa eh kin ketin apwalihala sapwellime kan pahn kamehlelehiong wehin Israel me Koht pahn ketin kahluwairailsang Papilon. Ih me arail Sounkomour. (Aiseia 54:5) Siohwa uhdahn ketin kupwurki mehn Israel ko en pwurehng ahneki nanpwungmwahu reh oh rong kanahieng sapwellime kosonned kan. Kaudok mehlel kin poahsoankihda atail en peikiong sapwellimen Koht kaweid kan. Mehn Israel ko sohte kak keid ni ahl pwungo ma re sohte ale kaweid en keid ‘nan ahl me re pahn keid ie.’
ip-2-E 131 par. 19
Siohwa Kin Ketin Padahkih Kitail Pwehn Wia Kamwahupatail
19 Siohwa eh ketin kupwurki sapwellime kan en soikala kahpwal oh ahneki mour nsenamwahu sansalda nan mahsen kaselel wet: “Ma ke rongete ei kosonned akan! Eri, omw popohl pahn duwehla pillap pwoat. Oh omw pwung pahn duwehte iloak en nansed kan.” (Aiseia 48:18, NW) Met uhdahn wia mahsen loal kei me kohsang Sounkapikpatail lapalapo! (Deuderonomi 5:29; Melkahka 81:13) Mehn Israel ko sohte pahn sensel, ahpw re kak ahneki popohl me pahn duwehla pillap pwoat. (Melkahka 119:165) Arail pwuhng kak duwehte iloak en nansed kan. (Eimwos 5:24) Nin duwen emen me uhdahn ketin nsenohki irail, Siohwa kin ketin kupwurki mehn Israel ko oh ni limpoak kasalehiong irail ahl me re pahn keid ie. Ma irail rongete!
ip-2-E 132 par. 20-21
Siohwa Kin Ketin Padahkih Kitail Pwehn Wia Kamwahupatail
20 Kapai dah kan pahn kohwong mehn Israel ko ma re koluhla? Siohwa mahsanih: “Kadaudokomw kan pahn tohto rasehng pihk en ni oaroahr, oh I pahn tetehk mwahu pwe re en dehr mwomwla.” (Aiseia 48:19) Siohwa ketin katamankihong aramas ako duwen sapwellime inou me kadaudoken Eipraam ko pahn tohtohla, “duwehte ngeder en usu kan en pahnlahng de ngeder en pihk kan pohn oaroahr kan.” (Senesis 22:17; 32:12) Ahpw, kadaudoken Eipraam ko uhwongada Koht, oh re sohte ahneki pwuhng en paiekihda dahme Koht ketin inoukihda. Dahme re wiahdahr inenen suwed kahrehda nin duwen sapwellimen Siohwa Kosonned, e konehng irail nin duwen wehi ehu en sohrala. (Deuderonomi 28:45) Ahpw, Siohwa sohte ketin kupwurki sapwellime kan en sohrala, oh e sohte ketin kupwurki likidmeliehla irail.
21 Kaweid oh ire mehlel kan me kileldi nan mahsen kehlail wet kin dokedoke sapwellimen Siohwa tohnkaudok kan rahnwet. Siohwa iei Utupen mour, oh e ketin mwahngih laudsang koaruhsie ia duwen atail en doadoahngki atail mour. (Melkahka 36:9) E ketikihong kitail kaweid kan pwehn wia kamwahupatail a kaidehn pwehn kihsang peren nan atail mour. Kristian mehlel kan kin mwekidki met sang ni arail kin rapahki elen ale kasukuhl sang Siohwa. (Maika 4:2) Sapwellime kaweid kan kin pere atail nanpwungmwahu reh, oh kin pere kitail sang ahn Sehdan kasongosong kan. Ni atail kin kalahnganki kaweid oh ire mehlel kan nan sapwellimen Koht kosonned kan, kitail pahn kilang me Siohwa kin ketin padahkih kitail pwehn wia kamwahupatail. Kitail pohnese me “sapwellime kosonned akan me sohte apwal.” Oh kitail sohte pahn sohrala.—1 Sohn 2:17; 5:3.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Aiseia—II
49:6—Ia duwen Mesaiao eh wia “mehn kamarainpen wehi kan,” mendahkihte eh doadoahk en kalohk pohn sampah dokedokehte sapwellimen Israel seri kan? Kahrepen met iei pwehki dahme wiawi mwurin Sises pwoula. Paipel doadoahngki iren Aiseia 49:6 ong sapwellime tohnpadahk ko. (Wiewia 13:46, 47) Rahnwet, Kristian keidi kan, me kin ale sawas sang irail pokon kalaimwun en tohn kaudok kan, kin wia “mehn kamarainpen wehi kan,” me kin kamakamarainih irail “tohn sampah koaros.”—Madiu 24:14; 28:19, 20.
it-1-E 643 par. 4-5
Mweipeseng en Pwopwoud
Mweipeseng en Pwopwoud nin Duwen Karasaras. Paipel pil kin doadoahngki pwopwoud nin duwen karasaras ehu. (Ais 54:1, 5, 6; 62:1-6) Met pil kin dokedoke mweipeseng en pwopwoud ni karasaras, de kesehla lih pwopwoudo.—Ser 3:8.
Wehin Suda mwomwla oh Serusalem sohrala nan pahr 607 mwohn Krais, oh towe kan kalipilipala Papilon. Sounpar kan mwowe Siohwa ketin mahsanih nan kokohp ehu ong mehn Suhs ko me pahn kalipilipala: “Ia duwe, kumwail lemeleme me I kadarala nei aramas akan, rasehng ohl emen me kesehla eh pwoud? Eri a, ia kisinlikoun kamweid?” (Ais 50:1) Pwihn wet, kamwomwomwla pwehki kahrepe mwahu ehu, kaidehn pwehki Siohwa ketin kauwehla sapwellime inou lap oh tepida wiahda koasoandi en mweipeseng, ahpw pwehki re kauwehla inou lap en Kosonnedo ni arail wia soahng sapwung kan. Ahpw mehn Israel malaulau kei koluhla oh kapakapki ren pwurehng ahneki nanpwungmwahu me rasehng pwopwoud rehn Siohwa nan sapwarailo. Pwehki pein mware, Siohwa ketin kapwurehdo sapwellime aramas akan ni sapwarailo nin duwen me e ketin inoukidahr, nan pahr 537 mwohn Krais, ni imwin sounpar 70 me wehio tehnlahr.—Mel 137:1-9; menlau kilang PWOPWOUD.
February 13-19
SOAHNG KESEMPWAL KAN SANG MAHSEN EN KOHT | AISEIA 52-57
“Krais Lokolongkin Kitail”
Sapwellimen Siohwa Ladu me ‘Lipwalipwkihda Dipatail kan’
“Sohpeisangehr Sohte Men Kilang” oh “Likamwete Sohte Mwahn Ih Mehkot”
3 Wadek Aiseia 53:3. Medewehla duwen sapwellimen Koht Iehros eh pwilikihdi peren en papah limwahn Semeo oh ketidihdo sampah pwehn meirongkihla moure oh kamaiau aramas sang dihp oh mehla! (Pil. 2:5-8) Kahrepen sapwellime meirong iei en ketikihda mahkpen dipen aramas me meirong en mahn akan pahn Kosonned en Moses kin ihte kamwomwada. (Ipru 10:1-4) E pahn uhdahn konehng ma aramas akan, ahpw mehlel mehn Suhs kan, pahn kasamwo Sises oh kawauwih ih nin duwen Mesaia me inoudahr oh me re kin kasikasik? (Sohn 6:14) Ahpw weksang met, mehn Suhs kan kin “sohpeisangehr sohte men kilang” oh re kin wiahkin ih “likamwete sohte mwahn ih mehkot,” duwehte me Aiseia kohpadahr. Wahnpoaron Sohn ntingihdi: “E ahpw ketidohng sapwellime wasa, a sapwellime kan sohte kasamwo.” (Sohn 1:11) Wahnpoaron Piter mahsanihong mehn Suhs kan: “Koht en atail pahpa kahlap ako, . . . ketikihongehr sapwellime manaman lingan ong sapwellime ladu Sises. Kumwail ahpw pangala Sises rehn me lapalap akan, oh ni en Pailet eh men kapitala, a kumwail ahpw kahmahmkihla. Ih me ketin sarawi oh mwahu.”—Wiewia 3:13, 14.
4 Aiseia pil kohpada me Sises pahn ketin “ahnlahr soangen medek koaros.” Erein eh kalokalohk, mie pak me Sises kin pwangada, ahpw met sohte wehwehki me e soumwahuda. (Sohn 4:6) E kin ketin ahnlahr medek en irail me soumwahu kan me e tuhwong nan kalohk. E kin ketin kupwureirailla oh kamwahwihala arail soumwahu kan. (Mark 1:32-34) Eri Sises ketin kapwaiada kokohp me mahsanih: “Ahpw, atail tungoal lokolok kan me e lokolongki, atail medek me e toutoukihla.”—Ais. 53:4a; Mad. 8:16, 17.
Mwomwen me “Koht me Ketikihong Kalokolok Wet”
5 Wadek Aiseia 53:4b. Pali laud en aramas kan ni mwehin Sises sohte kin wehwehki kahrepen eh lokolok oh pwoula. Irail kin kamehlele me Koht ketin kalokehki ih. (Mad. 27:38-44) Mehn Suhs kan kin karaun likamwih Sises me dene e kin lahlahwe Koht. (Mark 14:61-64; Sohn 10:33) Ahpw kitail ese me Sises kaidehn aramas dipan emen oh e sohte ketin lahlahwe Koht. Pwehki limpoak laud me ahneki ong Semeo, en pwoula pwehki karaun likamw wet kakete kalaudehla eh lokolok nin duwen Ladu en Siohwa. Ahpw mendahki met, e kin kupwurkihte en uhpah kupwuren Siohwa.—Mad. 26:39.
Sapwellimen Siohwa Ladu me ‘Lipwalipwkihda Dipatail kan’
“Rasehng Sihmpwul Men me Nektehn Kamakamala”
10 Wadek Aiseia 53:7, 8. Ni ahnsou me Sohn Sounpapidais kilangada Sises eh ketiket kohdo reh, e ahpw patohwan: “Kilang! Ien Sihmpwul en Kohto me kin ketikihsang dipen sampah koaros.” (Sohn 1:29) Ni e koasoia me Sises iei Sihmpwulo, Sohn ele kin medemedewe mahsen kan en Aiseia duwen Sises eh “rasehng sihmpwul men me nektehn kamakamala.” (Ais. 53:7) Aiseia kohpada: “E meirongkihla eh mour sang ni pein nsene.” (Ais. 53:12) Pil nipwong me Sises ketikihda koasoandi en Kataman en eh pwoula, e ketikihong kep en wain ong sapwellime wahnpoaron lelepek kan oh mahsanih: “Pwe ntahi met, ntahn inowo, me pahn kepwilipwildi pwe en lapwahda dipen aramas tohto.”—Mad. 26:28.
Sapwellimen Siohwa Ladu me ‘Lipwalipwkihda Dipatail kan’
Laduwo “Toutoukihla Lokolok en Aramas Ngeder”
13 Wadek Aiseia 53:11, 12. Ong sapwellime Ladu pilipilidahro, Siohwa mahsanih: “Ei ladu loalopwoat me I kin kupwurperenki, me pahn toutoukihla lokolok en aramas ngeder.” Ni ahl dahieu? Kaimwiseklahn iretikitik 12 kin kihda pasapeng. “[Laduwo] wilianla me dipan ngeder.” Kadaudok en Adam koaros “dipadahr,” oh met kahrehda ren “tialahng mehla.” (Rom 5:12; 6:23) Ahl en kahluwalahng aramas dipan akan ong Siohwa kin inenen anahn. Kokohp en Aiseia irelaud 53 kin kawehwehda mwahu ia duwen Sises ketin “wilianla” aramas dipan akan koaros, ni eh mahsanih: “Lokolok wet kamwahwihkitailla, lipwen ohla kan ni paliwere kaunsekihkitailla.”—Ais. 53:5.
Raparapahki Soahng Kesempwal kan Sang Mahsen en Koht
w06-E 3/15 11 par. 2
“Karasaras Pwoat” me Kesempwal ong Kitail
Ihs me ‘lih maiaudao’ Sara oh nah pwutako, Aisek dokedoke? Pohl kasalehda me Sara, ‘liho me sohte nah seri,’ ni karasaras wia sapwellimen Koht werek, me iei sapwellime pwihn nanleng. Mwohn Sises ketido, lih menet nan karasaraso, sohte naineki “seri” me keikihdi sapwellimen Koht manaman pohn sampah. (Kalesia 4:27; Aiseia 54:1-6) Ahpw, nan Pendekos 33, sapwellimen Koht manaman keiehdi pwihn en ohl oh lih kei me ipwsapahl nin duwen nein liho seri. Koht ketin wiahkihla irail pwukat, me sapwellime pwihn nanleng wiahda, nin duwen sapwellime seri kan oh re pahn iang Sises Krais wia nanmwarki kei pahn inou lap kapw ehu. (Rom 8:15-17) Emen irail, wahnpoaron Pohl, ntingihedi: “Serusalem en nanleng me saledek, iei ih atail nohno.”—Kalesia 4:26.
Kakairada Aktikitik Mehlel
Mehn Kahlemeng Keieu Mwahu me Pid Aktikitik
3 Siohwa me inenen lapalap oh ile, ahpw e kin “ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.” (2 Kronikel 16:9) Dahme Siohwa kin ketin wia ni ahnsou me e kin diar irail tohnkaudok me sohte lapalap kan me kin nsensuwedkihlahr soangsoangen kahpwal akan? E kin mwomwen “ketiket” rehn irail pwukat ki sapwellime ngehn sarawi “pwe I en kak kasapahldo arail koapworopwor oh likilik.” (Aiseia 57:15) Kahrehda, sapwellime tohnkaudok kan kak papah Siohwa ni peren. Ia uwen Koht eh inenen aktikitik!
February 20-26
SOAHNG KESEMPWAL KAN SANG MAHSEN EN KOHT | AISEIA 58-62
“Lohkihda Pahr en Sapwellimen Siohwa Kupwuramwahu”
ip-2-E 322 par. 4
Wiewia Pwung Wosada nan Saion
“Ahnsou me Kaun-o Pahn Ketin Komourala Sapwellime Aramas akan”
4 Aiseia ntingihedi: “[“Sapwellimen Siohwa manaman,” NW] ketier rehi. E ketin keieiedier pwe I en lohkiong me semwehmwe kan rongamwahu, I en kansenamwahwihala me nan kapehd toutoulahr akan, I en lohkiong me sensel kan ar saledek oh saledek ong irail kan me mih mi nan imweteng.” (Aiseia 61:1) Ihs me pwukoahki en padahkihong meteikan duwen rongamwahwo? Ele nin tapio, Aiseia me pwukoahki wia met. Koht ketin doadoahngki ih en ntingihedi duwen rongamwahwo ong irail ko me sensel Papilon. Ahpw, Sises ketin kasalehda pweidahn kokohp me keieu kesempwal ni eh ketin doadoahngki dahme Aiseia nda duwen ih. (Luk 4:16-21) Ei, Koht ketin poaronehdo Sises en ketin padahkihong me aktikitik kan duwen rongamwahwo, oh ni ahnsowo Sises keikihdi sapwellimen Koht manaman ni eh papidaisla.—Madiu 3:16, 17.
ip-2-E 326-327 par. 13-15
Wiewia Pwung Wosada nan Saion
13 Sangete Pendekos 33, Koht ketin padokedi ni karasaras “tuhke kan me . . . kin wia dahme pwung,” me iei Kristian keidi eimah kan, nan sapwellime wehi kapw, “Israel en Koht.” (Kalesia 6:16, NW) Dauliher sounpar epwiki kei, nempehn irail “tuhke” pwukat kekeirda wiahla meh 144,000, re kin kihda wah mwahu me kin kalinganahla, de wahdo kaping, ong Siohwa Koht. (Kaudiahl 14:3) Luhwen irail “tuhke” pwukat wie kekeirda sangete pahr 1919, ni Siohwa eh ketin pwurehng kakehlailiada me luhwe kan en Israel en Koht me wawaila nan doadoahk en kalohk erein ahnsou kis. Sang ni eh ketikihong irail padahk mehlel me karasaraskihong pihl, Siohwa ketin kakairada tuhke kan me kin wia dahme pwung oh wahrail kan kin audehla sampah.—Aiseia 27:6.
14 Aiseia kasalehda duwen doadoahk me “tuhke” pwukat kin wiewia ni eh nda: “Re pahn onehda sapahl kahnimw kan me ohlahr mahsie.” (Aiseia 61:4) Pahn pahngok en Nanmwarki Sairus en Persia, mehn Suhs lelepek kan pwurasang Papilon oh onehda sapahl Serusalem oh tehnpas sarawio, me ohla erein sounpar tohto. Doadoahk en onohnsapahlda pil pahn wiawi nan pahr 33 oh pahr 1919.
15 Nan pahr 33, sapwellimen Sises tohnpadahk kan uhdahn nsensuwedla ni eh ketin selidi, kopwung, oh pwoula. (Madiu 26:31) Ahpw, arail madamadau ong met wekila ni Sises eh ketido rehrail mwurin eh ketin iasada. Oh ni ahnsowohte me sapwellimen Koht manaman keiehdi irail, re tepida soupisengki doadoahk en kalohki rongamwahwo, “nan Serusalem, nan Sudia pwon, oh Sameria, oh lelohng ni irepen sampah.” (Wiewia 1:8) Re tepida pwurehng kapwurehdo kaudok mwakelekel. Ni ahlohte, sangete pahr 1919 Sises Krais ketin kahrehiong luhwen Kristian keidi kan en onehda sapahl “kahnimw kan me ohlahr mahsie.” Erein sounpar tohto kaunen pelien lamalam kan me kose irail Kristian kei sohte kin padahngki duwen Siohwa, ahpw re uhd kin padahngki duwen tiahk en aramas akan oh pil padahk kan me uhwong Paipel. Kristian keidi kan kamwakelehsang nan arail mwomwohdiso tiahk en kaudok likamw kan pwe onohnsapahl en kaudok mehlel en kak wonlahte. Oh re tepida wia doadoahk en kalohk me keieu kesempwal nan sampah.—Mark 13:10.
“Mehn Keiru kei” Kin Miniminpene nan Kaudok Mehlel
5 Mwein ekei kin medewe duwen dahme Aiseia irelaud 61 koasoia, me audaudki kokohp ehu me pweidahr nan mwomwohdisohn Kristian. Iretikitik 6 en irelaudo koasoia duwen ekei me pahn papah nin duwen “samworoun Kaun-o.” Ahpw nan iretikitik 5 kin koasoia duwen “mehn liki kan” me pahn sewese oh iang samworo ko doadoahk. Dahme kahrehda e koasoia duwen “mehn liki kan”?
6 Irail “samworoun Kaun-o” iei Kristian keidi kan me iang “iasada keieu” oh me “pahn wiahla samworo en Koht oh Krais, oh re pahn iang kakaun erein pahr kido.” (Kaud. 20:6) Mie Kristian lelepek tohto teikan me ahneki koapworopwor en kousoan nan Paradais nin sampah. Irail pwukat kin iang oh pil ehuong irail kan me pahn papah nanleng. Irail kan me ahneki koapworopwor en mi sampah sohte iang kisehn “Israel en Koht,” ahpw re mwomwen duwehte mehn liki kei. Re kin perenki doadoahk rehn “samworoun Kaun-o” nin duwen soun “wiahda mwetuwel” oh me kin ‘apwalih arail mwetin wain kan’ ni ahnsoun rahk. Re kin sewese me keidi kan kawauwihala Koht sang ni arail wia doadoahk en kalohk oh padahkihong meteikan duwen padahk mehlel. Me keidi kan oh pil “sihpw teikan” kin padahkihong aramas akan duwen padahk mehlel oh ni limpoak sewese irail en kapwaiada nan arail mour.—Sohn 10:16, NW.
Raparapahki Soahng Kesempwal kan Sang Mahsen en Koht
Doadoahk Laud Pwehn Kalinganahla Atail Popohl oh Minimin me Rasehng Paradais
14 Me mah tohto nan atail mwomwohdiso kan iang kilang wekidekla kan me wiawi me kalaudehla lingan en sapwellimen Koht pwihn nin sampah. Irail taman ahnsou me mwomwohdiso kan ahneki emente elder me wia sounepwelpen mwomwohdiso, ahpw kaidehn nin duwen pwihn en elder kan. Re pil taman ahnsowo me emente elder me kin wia sounepwelpen Ohpis en Sounkadehdehn Siohwa kan ahpw kaidehn nin duwen Pwihn me Kin Apwalih Ohpis en Sounkadehdehn Siohwa kan. De ni ahnsou me president en Watch Tower Society iei me kin kihda kaweid kan a kaidehn Pwihn me Kin Apwalih Mwomwohdiso en Sounkadehdehn Siohwa kan sampah pwon. Mendahki mie me lelepek kan me kin sewese brother pwukat koaros, emente me kin pwukoahki wiahda pilipil kan nan mwomwohdiso, ni poasen kaun oh pil ohpis en Sounkadehdehn Siohwa kan. Mwurin pahr 1970, wekidekla kan wiawihda pwe pwihn en elder kan me pahn pwukoahki wiahda pilipil kan ahpw kaidehn emente.
15 Dahme kahrehda wekidekla pwukat wia kamwahu kei ong sapwellimen Siohwa pwihn? Pwehki wekidekla pwukat kin poahsoankihda laudlahn arail wehwehkihla Paipel. Pwihn wet kin paiekihda irair kaselel kan en elder kan koaros, de “kisakis en aramas akan” me Siohwa ketikihda, ahpw kaidehn emente elder me pahn wiahda pilipil koaros.—Ep. 4:8, NW; Lep. Pad. 24:6.
16 Medewehla ekei wekidekla kan me wiawi kerendo nan neitail sawaspen Paipel kan. Kitail kin perenki kihla pwuhk kaselel kan nan doadoahk en kalohk. Pil medewehla duwen atail kin doadoahngki soahng kapw kan nan doadoahk en kalohk. Karasepe, aramas tohto kin kilang website en jw.org pwe ren kak ale soangen sawas kan me re uhdahn anahne. Kitail kin kilang nan soangen wekidekla pwukat koaros duwen Siohwa eh kin ketin nsenohki oh pil poakohng aramas akan.
17 Kitail pil kalahnganki wekidekla kan me wiawihong atail mihting kan pwe kitail en kak ahneki ahnsou ong atail kaudok en peneinei de pein atail onop. Oh kitail kalahnganki wekidekla kan me wiawihong prokram en atail mihting tohrohr kan. E kin mwomwen me prokram pwukat kin mwamwahula sounpar koaros! Kitail pil kalahnganki kasukuhl kan me kitail kin ale sang atail sukuhl en Paipel tohto. E sansal sang wekidekla pwukat koaros me Siohwa kin ketin kaweid sapwellime pwihn oh kin ketin pousehlahte kalinganahla atail irair en popohl oh minimin me rasehng paradais!
Ire Kesempwal akan Sang nan Pwuhken Aiseia—II
Pasapengpen Peidek kan me Pid Duwen Iren Paipel kan:
61:8, 9—Dahme wia “inou poatopoat ehu,” oh ihs irail akan me wia “wahrail [NW]”? Met wia inou kapw me Siohwa ketin wiahda ohng irail Kristian keidi kan. “Wahrail” iei “sihpw teikan”—irail meh rar kei me rohng oh mwekidki rohng me irail kin kalohki.—Sohn 10:16.
February 27–March 5
SOAHNG KESEMPWAL KAN SANG MAHSEN EN KOHT | AISEIA 63-66
“Lahng Kapw oh Sampah Kapw Pahn Kahrehda Peren Laud”
ip-2-E 383 par. 23
“Nsenamwahukihla oh Pereperenki Kohkohlahte Mehkan me I Pahn Wiahda”
23 Pwuhken Kaudiahl kawehwehda duwen kaudiahl ehu me wahnpoaron Sohn kilangada me pid duwen rahnen Siohwa me kerendohr, ni ahnsou me imwin koasoandi suwed wet eh pahn sohrala. Mwurin mwo, Sehdan pahn lekdekla nan pwoahr loalo me soh kapi. (Kaudiahl 19:11–20:3) Mwurin eh kawehwehda duwen kaudiahl wet, Sohn kapwurehiong kokohp me Aiseia koasoiao ni eh ntingihedi: “I ahpw kilangada lahng kapw ehu oh sampah kapw ehu.” Iretikitik kan mwurin kaudiahl kaselel wet, kasalehda duwen ahnsowo me Siohwa Koht pahn ketin kamwahwihala irair en sampah. (Kaudiahl 21:1, 3-5) E sansal me ahn Aiseia inou duwen “lahng kapw ehu oh sampah kapw ehu” pahn uhdahn pweida nan sapwellimen Koht sampah kapwo! Pahn kaundahn koperment kapwo nanleng, aramas peik kan pahn nsenamwahuki irair en popohl oh minimin me rasehng paradais oh pil uhdahn paradais ehu nin sampah. E uhdahn kansenamwahu en ese me inowo me “mehkoaros me pweidahr nan ahnsou samwalahr ako [soumwahu, lokolok, oh soahng suwed tohto me aramas akan kin lelohng] pahn manokonokla douluhl.” Sohte lipilipil dahme kitail ele tamanda ni ahnsowo, met sohte pahn kahrehiong kitail en nsensuwed de medek, me duwehte dahme me tohto kin mworuskihla rahnwet.
ip-2-E 384 par. 25
“Nsenamwahukihla oh Pereperenki Kohkohlahte Mehkan me I Pahn Wiahda”
25 Pil rahnwet, Serusalem kapwo me Siohwa ketin wiahda pahn “diren peren.” Ia duwen? Nin duwen me kitail kilangehr, e pahn mie meh 144,000 me pahn iang kaunda nan lahng kapwo me miehla nan pahr 1914, irail pwukat pahn iang kisehn kopermento nanleng. Kokohp kasalehda me irail pwukat iei “Serusalem Kapw.” (Kaudiahl 21:2) Me pid duwen Serusalem Kapw, Koht mahsanih: “Serusalem kapw me I pahn wiahda pahn diren peren, oh towe kan pahn kin diren nsenamwahu.” Koht pahn ketin doadoahngki Serusalem Kapw pwehn ketikihong aramas peik kan kapai me kaselel sang dahme kitail kak medewe. Solahr me pahn rong ngilen sengiseng de peksawas, pwe Siohwa pahn ketikihong kitail ‘dahme kitail keieu inengieng.’—Psalm 37:3, 4.
Popohl Erein Pahr Kid oh Kohkohlahte!
RE PAHN KAUWADA IMWARAIL OH WIAHDA ARAIL MWETIN WAIN
4 Aramas koaros men imwaneki pein imwarail, wasa ehu me irail oh arail peneinei sohte pahn perki mehkot. Ahpw nan sampah rahnwet, e kin apwal en diarada wasahn kousoan. Aramas tohto audehlahr nan kahnimw kan. Ele re anahne mi nan ihmw sakanakan de tok en ihmw kan. Ihte me re kak wia iei ouramanki ren mi nan pein imwarail.
5 Ni ahnsou me Wehio pahn kaunda sampah, koaros pahn mie pein imwarail. Aiseia kohpada: “Aramas akan pahn kauwada imwarail kan oh kousoanla loale. . . . Re pahn wiahda ar mwetuwel en wain oh pahn kin nsenamwahuki wahn wain kan.” (Ais. 65:21) Ahpw, re kak kasik laudsang en imwanekihte pein imwarail. Rahnwet, ekei kin kousoan nan pein imwarail oh ekei kin imwaneki lapalahn ihmw. Ahpw re kin pwunodki me re solahr pahn kak pwain. De re kin pwunodki me lipirap akan de aramas mwersuwed kan pahn kauwehla oh pedolong. Ni ahnsou me Wehio pahn kaunda, solahr me pahn pwunodki soahng pwukat. Soukohp Maika ntingihedi: “Aramas koaros pahn mour meleilei pahn mwetehn arail tuhkehn wain de tuhke pik kan; re sohte pahn perki mehkot.”—Maika 4:4.
Raparapahki Soahng Kesempwal kan Sang Mahsen en Koht
Ire Kesempwal akan Sang nan Pwuhken Aiseia—II
63:5—Ia duwen sapwellimen Koht engieng eh kin utung ih? Sapwellimen Koht engieng kin wia engieng me sohte kin wiawi ni elen soh kanengamah—sapwellime engieng pwung. Sapwellime engieng kin utung oh kamwakid ih en wia kapwung me pwung.
Mweidohng Sapwellimen Siohwa Kaweid en Kaiahne Iuk
SIOHWA KETIN DOADOAHNGKI SAPWELLIME PWUHNG NIN DUWEN SOUNWIA SAH
3 Paipel mahsanih me Siohwa ketin duwehte sounwia sah men pwehki eh sapwellimanki pwuhng pohn aramas oh wehi kan. Aiseia 64:8 mahsanih: “Ahpw komwi me samat, Maing Kaun. Se rasehng pwehl, a komwi sounwia sah. Komwi me ketin wiaikitada.” Sounwia sah men kak wiahda dahme e mwahuki wiahda sang pwehl. Pwehlo sohte kak ndaiong sounwia saho dahme en wiahda. Met duwehte aramas oh Koht. Kitail sohte ahneki pwuhng en ndaiong Koht ia mwomwen eh pahn ketin kaiahne kitail, duwehte pwehlo eh sohte kak ndaiong sounwia saho mwomwen sah, de dahl dah en wiahda.—Wadek Seremaia 18:1-6.
4 Rasehng sounwia sah men eh wiahda sah sang pwehl, Siohwa ketin kaiahne mehn Israel kan ren wiahla soangen aramas me e ketin kupwurki. Ahpw ia duwen Siohwa eh ketin weksang sounwia sah aramas men? Siohwa ketikihong aramas akan oh wehi kan kisakis tohrohr en saledek en wiahda pilipil me iei, e ketin mweidohng irail en wiahda pein arail pilipil kan. E sohte ketin wiahda ekei aramas ren mwahu a ekei ren suwed. E pil sohte ketin doadoahngki sapwellime pwuhng en ketin idingkihong aramas akan ren peikiong ih. Ahpw aramas akan anahne pilada ma re men mweidohng Sounkapikadao Siohwa en ketin kaiahne irail de soh.—Wadek Seremaia 18:7-10.
5 Ia duwen ma emen kin keptakai oh sohte mweidohng Sounwia Saho Siohwa en ketin kaiahne ih? Ia duwen Siohwa eh pahn ketin doadoahngki sapwellime pwuhng nin duwen sounwia sah men? Eri ni eh kin apwal en wekidala pwehlo nin duwen me sounwia saho men wia, e kak pilada en wia mehkot me weksang, de e kak kesehla pwehlo. Met kin kalapw wiawi pwehki sounwia saho sohte wekidala mwomwen pwehlo ni pwung. Ahpw Siohwa kin ketin kaiahne aramas ni pwung ahnsou koaros. (Deud. 32:4) Ni aramas men eh sohte kin mweidohng Siohwa en ketin kaiahne ih, sapwungo kin ahnsou koaros en aramaso. Siohwa kin ketin wekidala mwomwen eh kin kaiahne aramas men sang mwomwen ahn aramaso kin mwekidki sapwellime kaweid. Ni aramas akan ar kin peikiong Siohwa, Siohwa kak ketin doadoahngki irail. Karasepe, Kristian keidi kan “milahr pahn sapwellime kalahngan” oh wiahlahr “einpwoat [“sah,” NW] . . . ehu me kaselel ong ni doadoahk kesempwal akante.” Ahpw aramas akan me sohte kin peikiong sapwellimen Koht kaweid “milahr pahn sapwellime engieng” oh e sohte kak ketin doadoahngki irail.—Rom 9:19-23.