“Mehn Keiru kei” Kin Miniminpene nan Kaudok Mehlel

“Mehn liki kan pahn papah kumwail . . . oh wiahda mwetuwel nan sapwamwail oh apwalih amwail mwetin wain kan. A kumwail, kumwail pahn wiahla samworoun KAUN-O.”​—AIS. 61:5, 6.

IA DUWEN OMW PAHN SAPENG?

Dahme ekei aramas kin medewehiong mehn liki kan? Dahme Paipel padahngki duwen met?

Dahme aramas akan sang sahpw koaros lukohng ren wia?

Ni ahl dahieu me aramas solahr wia mehn liki kei nanpwungen Sounkadehdehn Siohwa kan?

1. Dahme ekei aramas kin medewehiong mehn liki kan? Dahme kahrehda e sapwung en ahneki soangen madamadau wet?

NIN duwen me iren onop en mwoweo kasalehda, ekei aramas sohte kin mwahuki mehn liki de aramas me kohsang sahpw teikan. Re kin medewe me re mwahusang mehn liki kan. Ahpw e sohte kadek ren ahneki soangen madamadau wet ong aramas en ehu wehi tohrohr. Sohte emen mwahusang meteikan. Ehu pwuhk koasoia me aramas akan en keinek kan kin wia pirien ehu, nin duwen me Paipel padahngki. (The Races of Mankind) Mendahki pirien kan kin wekpeseng, re kin wiahte pirien ehu.

2, 3. Ia duwen Siohwa eh ketin kilangwohng mehn liki kan ni mwehin mehn Israel ko?

² Ni ahnsou kan nan Paipel, Siohwa Koht ketin wiahda inou ehu pwehn ketin wiahkihla mehn Israel kan sapwellime aramas pilipil kan. Mendahki re ahneki nanpwungmwahu tohrohr rehn Siohwa Koht, Kosonnedo koasoia me mehn Israel kan anahne kasalehda wiewia pahrek oh wauneki irail me sohte wia mehn Israel. Kitail pil anahne wia met rahnwet. Kristian akan en dehr lipilipilki mehn liki kan. Dahme kahrehda? Wahnpoaron Piter nda: “Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.”​—Wiewia 10:34, 35.

³ Mehn liki kan ni mwehin mehn Israel ko kin paiekihda arail kousoan wasao. Dahme kahrehda? Pwehki Siohwa ketin kupwurki irail me wia mehn liki kei. Mwuhr, wahnpoaron Pohl ndahki duwen Siohwa: “De ia duwen Koht? Ih Koht en mehn Suhs akante? Kaidehn ih pil Koht en mehn liki kan? Ei, ih pil Koht en mehn liki kan.”​—Rom 3:29; Soel 2:32.

4. Dahme kahrehda sohte me pahn wia mehn liki nan “Israel en Koht”?

⁴ Mwurin Koht ketin wiahda inou kapw rehn mwomwohdisohn Kristian keidi kan, irail pwilidak en wehin Israel ko solahr ahneki nanpwungmwahu tohrohr reh. Mwomwohdisohn Kristian keidi kan me uhd wiahla “Israel en Koht.” (Kal. 6:16, NW) Pohl kawehwehda me nan wehi kapw wet, “solahr mehkot mie me kin katohrepeseng mehn liki oh mehn Suhs, me sirkumsaisla de sohte sirkumsaisla kan, me rotorot akan, de mehn wai kan, lidu de me saledek kan; ahpw Krais ketin oarepene mehkoaros.” (Kol. 3:11) Pwehki met, sohte me pahn wiahki emen mehn liki nan mwomwohdisohn Kristian keidi kan.

5, 6. (a) Dahme kahrehda ekei kin medewe duwen wehwehn Aiseia 61:5, 6? (b) Ihs irail kan me wia “samworoun KAUN-O” oh ihs me wia “mehn liki kan” me Aiseia koasoia? (c) Ia duwen “samworoun KAUN-O” kan oh pil “mehn liki kan” arail kin doadoahkpene?

⁵ Mwein ekei kin medewe duwen dahme Aiseia irelaud 61 koasoia, me audaudki kokohp ehu me pweidahr nan mwomwohdisohn Kristian. Iretikitik 6 en irelaudo koasoia duwen ekei me pahn papah nin duwen “samworoun KAUN-O.” Ahpw nan iretikitik 5 kin koasoia duwen “mehn liki kan” me pahn sewese oh iang samworo ko doadoahk. Dahme kahrehda e koasoia duwen “mehn liki kan”?

⁶ Irail “samworoun KAUN-O” iei Kristian keidi kan me iang “iasada keieu” oh me “pahn wiahla samworo en Koht oh Krais, oh re pahn iang kakaun erein pahr kido.” (Kaud. 20:6) Mie Kristian lelepek tohto teikan me ahneki koapworopwor en kousoan nan Paradais nin sampah. Irail pwukat kin iang oh pil ehuong irail kan me pahn papah nanleng. Irail kan me ahneki koapworopwor en mi sampah sohte iang kisehn “Israel en Koht,” ahpw re mwomwen duwehte mehn liki kei. Re kin perenki doadoahk rehn “samworoun KAUN-O” nin duwen soun “wiahda mwetuwel” oh me kin ‘apwalih arail mwetin wain kan’ ni ahnsoun rahk. Re kin sewese me keidi kan kawauwihala Koht sang ni arail wia doadoahk en kalohk oh padahkihong meteikan duwen padahk mehlel. Me keidi kan oh pil “sihpw teikan” kin padahkihong aramas akan duwen padahk mehlel oh ni limpoak sewese irail en kapwaiada nan arail mour.—Sohn 10:16, NW.

“MEHN KEIRU KEI” DUWEHTE EIPRAAM

7. Ia duwen Kristian kan rahnwet arail duwehte Eipraam oh me lelepek teikan nan Paipel?

⁷ Nin duwen atail sukuhlki nan iren onop en mwoweo, Kristian mehlel kan kin duwehte mehn liki kan pwehki re wia “mehn keiru kei” nan ahn Sehdan sampah suwed wet. Re duwehte Eipraam oh pil me lelepek teikan nan Paipel me sohte men iang kisehn ahn Sehdan sampah oh me kin mour nin duwen “mehn liki oh mehn keiru kei nin sampah.” (Ipru 11:13) Mehnda ma kitail ahneki koapworopwor en mi nanleng de nin sampah, kitail kak ahneki nanpwungmwahu tohrohr rehn Siohwa duwehte me Eipraam ahneki. Sounnting en Paipel Seims kawehwehda me “‘Eipraam pwosonlahr Koht, oh pwehki eh pwoson, Koht ketin kupwurehda pwe en pwungla reh.’ Koht ahpw pil ketin kamwarehki ‘Kompoakepahi Eipraam.’”​—Seims 2:23.

8. Dahme Siohwa ketin inoukihong Eipraam? Ia ahn Eipraam pepehm ong inou wet?

⁸ Koht ketin inoukihda me e pahn ketin kapaiada peneinei koaros en sampah pwehki Eipraam oh kadaudoke kan. Inou wet sohte wehwehki me ehute wehi me pahn ale kapai wet. (Wadek Wiewia 3:25.) Mehnda ma inou wet pahn pweida mwurin Eipraam eh mehla, e kamehlele me met uhdahn pahn wiawi. Erein sounpar epwiki, Eipraam oh eh peneinei kin kesekeseuseli nan sahpw akan oh e sohte uhdi sang eh wia kompoakepahn Siohwa.

9, 10. (a) Ia duwen atail kak alasang Eipraam? (b) Dahme kitail kak sewese aramas akan ren wia?

⁹ Mendahki Eipraam sohte ese iahd me sapwellimen Siohwa inou ong ih pahn pweida, e pousehlahte poakohng oh kaudokiong Siohwa. Pwehki Eipraam kin tamataman ahnsou koaros me e wia mehn keiru men, e sohte ahneki soangen mour me duwehte ahn uhdahn tohn wasao. (Ipru 11:14, 15) Kitail en idawehn ahn Eipraam mehn kahlemeng oh mourki mour ehu me sohte kedirepwki wiewia kan me sohte uhdahn kesempwal. Kitail en dehr medewe me en ahneki dipwisou tohto, ndandla nan atail wasahn kousoan, de ahneki doadoahk mwahu iei me keieu kesempwal nan atail mour. Ia kahrepen atail en song en ahneki mour me duwehte mour en meteikan nan koasoandi wet me pahn kereniong imwisekla? Ia kahrepen atail en poakohng sampah ehu me pahn mihmi ahnsou kiste? Duwehte me Eipraam wia, kitail kin awiawih mehkot me mwahusang sampah wet. Kitail kin men kanengamah oh awih lao sapwellimen Koht inou kan pahn pweida.​—Wadek Rom 8:25.

¹⁰ Kapai kan me Koht ketin inoukihda en ketikihda pwehki Eipraam oh kadaudoke kan kin mihmiehte ong aramas akan en wehi koaros rahnwet. Irail “samworoun KAUN-O” me keidi kan oh pil “mehn liki kan,” de sihpw teikan, kin padapadahkihong aramas akan sampah pwon ni lokaia daulih 600 me Koht kin ketin luke irail en sukuhlki duwen kapai pwukat.

POAKOHNG ARAMAS EN SAHPW KOAROS

11. Dahme Solomon luke aramas en wehi kan ren wia?

¹¹ Ni ahnsou me Solomon kasarawihong tehnpaso Siohwa nan pahr 1026 mwohn Krais, e wia kapakap ehu me sewese kitail en kilang sapwellimen Siohwa madamadau ong aramas en wehi koaros. Solomon peki rehn Siohwa en ketin karonge kapakap en aramas en wehi koaros me kin kapakap mwohn tehnpaso. Met ehu ahl me re kak paiekihda inou me Siohwa ketin wiahiong Eipraam. Solomon kapakapki: “Ni mehn liki men me koukousoan wasa doh eh pahn rong duwen ndand en mwaromwi, oh soahng kapwuriamwei koaros me komw ketin wiahiong sapwellimomwi aramas akan, oh patohdo pwe en kaudokiong komwi oh kapakap nan Tehnpas wet, eri, komw ketin karonge eh kapakap. Komw ketin karonge sang nan mwoalomwi nanleng, oh ketin kapwaiada eh pekipek, pwe aramas koaros en sampah en esei komwi oh peikiong komwi, nin duwen sapwellimomwi aramas akan ar kin wia.”​—1 Nan. 8:41-43.

12. Dahme kahrehda Sounkadehdehn Siohwa kan duwehte mehn liki kei nan sahpw me re kousoan ie?

¹² Mehn liki men iei aramas emen me kin mwemweitla de kousoan nan sahpw ehu me kaidehn uhdahn sapwe. Sounkadehdehn Siohwa kan kin duwehte mehn liki kei. Irail kin kousoan nan sahpw tohto nan sampah, ahpw re kin utungte Wehin Koht me mi nanleng oh Nanmwarki en wehi wet, Sises Krais. Eri, re sohte kin iang pidada palien politik en sahpw kan me re kousoan ie, mehnda ma meteikan kin medewe me re anahne wia met.

13. (a) Ni ahl dah kitail kak sukuhlki en dehr kilangwohng emen nin duwen mehn liki men? (b) Ia duwen Siohwa eh ketin kupwurki aramas koaros en kilangwohng emenemen nin tapio?

¹³ Ekei pak e kin kak sansal en kilang me meteikan wia mehn liki kei pwehki mwomwen arail lokaia, tiahk me re kin idawehn, mwomwarail de pil mwomwen arail likou. Ahpw soahng kan me kin kahrehda aramas en wehi koaros en duwepenehte kesempwal sang soahng wekpeseng pwukat. Eri ni atail kin sukuhlki en dehr medewe ahl akan duwen emen eh weksang kitail, kitail sohte pahn kilangwohng ih nin duwen mehn liki men. Ma sampah pwohn ahneki koperment ehute de wia wehi tehieu, sohte emen pahn wia mehn liki. Ni mehlel, nin tapio Siohwa ketin kupwurki aramas koaros en wia peneinei ehu pahn sapwellime kaunda. Mehlel aramas en wehi koaros pahn kak uhdihsang kilangwohng meteikan nin duwen mehn liki kei?

14, 15. Dahme Sounkadehdehn Siohwa kan nin duwen pwihn ehu kak wia?

¹⁴ Kitail wie momour nan sampah ehu me aramas tohto kin roporop oh re kin medewe me arail wehi me keieu mwahu. Ahpw e mwahu en ese me mie ekei aramas me kin poakohng aramas en wehi koaros. Ei, nanti laud kin anahn pwehn wekidala mwomwen atail kin medewe duwen meteikan. Ted Turner me tapihada palien nuhs en TV me adaneki CNN, kin iang doadoahk rehn aramas koahiek kei sang soangsoangen wehi kan. E nda: “I tepida kilangwohng irail kan sang sahpw teikan kaidehn nin duwen ‘mehn liki kei’ ahpw nin duwen iengei towe mehlel en sampah wet.” E wiahda kosonned ehu me sohte mweimwei nah tohndoadoahk kan en doadoahngki lepin lokaia wet “mehn liki.”

¹⁵ Sounkadehdehn Siohwa kan iei ihte pwihn nan sampah pwon me kin uhdahn alasang sapwellimen Koht elen madamadau duwen aramas koaros sang sahpw koaros. Re sukuhlki ren kilangwohng aramas akan nin duwen Siohwa eh kin ketin wia, oh imwilahn met, re wekidala mwomwen arail madamadau oh pepehm duwen meteikan. Re sohte kin kailongki aramas me kin kohsang sahpw teikan de medewe me re sohte kak likih mehn liki kan. Sounkadehdehn Siohwa kan kin perenki kilang soangsoangen aramas akan oh soangsoangen koahiek kan me aramas akan ahneki. Mie pak ke kin medemedewe ia uwen kaselel me Sounkadehdehn Siohwa kan nin duwen pwihn ehu ar kak wia met oh ia uwen eh wia kamwahupatail koaros en wekidala atail madamadau duwen meteikan?

SAMPAH EHU ME SOHTE EMEN PAHN WIA MEHN LIKI

16, 17. Ia pahn mwomwen mour ong uhk ni ahnsou me Kaudiahl 16:16 oh Daniel 2:44 pahn pweida?

¹⁶ Ahnsou keren, wehi koaros pahn mahweniong sapwellimen Koht kaunda ni mahwen en Armakedon. (Kaud. 16:14, 16; 19:11-16) Tohtohsang sounpar 2,500 samwalahro, soukohp Daniel kohpada dahme pahn wiawihong koperment en aramas. E ntingihedi: “Eri, ni ahnsou me nanmwarki ko pahn kakaun wasa, Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”​—Dan. 2:44.

¹⁷ Medewehla ia pahn wehwehn met ong uhk. Ahnsou wet, kitail koaros kak wia mehn liki kei pwehki sampah eh pwalpeseng nin duwen soangsoangen wehi kan me mie irepe. Ahpw mwurin Armakedon, solahr pahn mie irepen wasa kan. Mendahki aramas akan pahn wekpeseng, met pahn kasalehda me sapwellimen Koht kapikipik kan kin wekpeseng ni ahl kaselel. Soangen koapworopwor kaselel wet pahn kamwakid kitail koaros en pousehlahte kapinga oh wauneki Sounkapikpatailo ni uwen atail kak.

18. Karasaras dah me kasalehda me Sounkadehdehn Siohwa kan sohte kin medewehiong emenemen nin duwen mehn liki kei?

¹⁸ Ia duwe, aramas akan sang wasa koaros kak uhdahn sohte kilangwohng meteikan nin duwen mehn liki kei? Kitail kak uhdahn kamehlele me met pahn wiawi. Pil ahnsou wet, Sounkadehdehn Siohwa kan sohte kin medewehiong meteikan nin duwen mehn liki kei. Karasepe, me keren, ekei ohpis tikitik en Sounkadehdehn Siohwa kan iangala ohpis en Sounkadehdehn Siohwa kan nan sahpw teikan. Met wiawi pwehn tehk mwahu me doadoahk en kalohk en wiawi ni ahl me keieu mengei. (Mad. 24:14) Pilipil pwukat sohte poahsoankihda irepen sahpw akan, ihte ma kosonned ehu me kahrehda met en wiawi. Sises Krais, Nanmwarki en Wehin Koht, ketin sewesewese Sounkadehdehn Siohwa kan ren dehr tohrohrkipeseng irepen wehi kan. Ahnsou keren e pahn ketin kaimwisekala irepen wehi koaros ni ahnsou me e pahn ketin “kalowehdi eh imwintihti kan.”​—Kaud. 6:2.

19. Dahme Sounkadehdehn Siohwa kan kak wia pwehki padahk mehlel?

¹⁹ Sounkadehdehn Siohwa kan kohsang nan sahpw tohto oh re kin lokaiahki lokaia tohto. Ahpw re kin miniminkihpene padahk mehlel oh re sohte kak tohrohrpeseng. (Wadek Sepanaia 3:9.) Re wia pwihn en peneinei laud ehu nan sampah pwon. Mendahki re anahne mour nan sampah suwed ehu ni ahnsou wet, re sohte kin iang wia kiseh. Ire mehlel me pid peneinei wet arail kin miniminpene ahnsou wet kadehdehda me nan sampah kapwo, sohte emen pahn wia mehn liki men. Eri koaros nin sampah pahn perenki kilangwohng aramas akan sang keinek oh wehi koaros nin duwen riarail kan.

[Blurb nan pali 31]

Ke kin kasikasik sampah ehu me sohte irepe, wasa me sohte emen pahn wia mehn liki?

[Kilel nan pali 28]

Ke pahn kilangwohngete pweidahn sapwellimen Koht inou kan duwehte me Eipraam wia?

[Kilel nan pali 30]

Mwohn silangin Siohwa, sohte emen kin wia mehn liki men