MEHN ONOP 10

Doadoahngki Ngihl me Pwungiong Audepen Koasoi

Lepin Padahk 8:4, 7

DAHME KE PAHN WIA: Kasalehda madamadau kan ni sansal oh kamwakidada pepehm kan sang ni omw kin wekidala uwen ngihl laud de tikitik en ngilomw, ni ngihl marahra de toutou, oh pitipit de wawai.

IA DUWEN OMW PAHN WIA MET:

Wekidala uwen ngihl laud de tikitik en ngilomw. Kalaudehla ngilomw pwehn kasansalehda ire kesempwal kan oh kamwakid sounrongorong kan. Wia soahngohte ni omw wadek iren Paipel ehu me kasalehda kadeik ehu. Katikitikihala ngilomw pwehn kahrehiong sounrongorongo en kasikasik de pwehn kasansalehda masak de pwunod.

Dehr kalapw kalaudehla ngilomw pwe sounrongorongo en pehm me ke lipwlipwoar. Dehr kahrehda sounrongorongo en tetehk uhkete ni omw pahn nohn wekiwekid ngilomw kan.
Wekidala uwen marahra de toutou en ngilomw. Ma konehng ni omw lokaia, wiahiong ngilomwen en marahrahla pwehn kasalehda ngoang de en kasansalehda uwen laud de doh. Wiahiong ngilomwen en toutou pwehn kasalehda pahtou de pwunod.
Wekidala uwen pitipit de wawai en ngilomw. Lokaia pitipit pwehn kasalehda kaperen. Lokaia wawai ni omw pahn koasoia ire kesempwal kan.

Pwe ken dehr kapwuriamweih sounrongorongo, dehr mwadangete wekid ngilomw kan. Dehr nohn lokaia pitipit me pahn kahrehda sounrongorong kan en sohte wehwehki pwehki omw sohte ndahla lepin lokaia kan ni sansal.