MEHN ONOP 2

Ni Mwomwen Koasoakoasoipene

2 Korint 2:17

DAHME KE PAHN WIA: Koasoi sang nan omw mohngiong ni ahl me ke uhdahn kin wia, oh me pahn kasalehda duwen omw pepehm ong ireo oh sounrongorong kan.

IA DUWEN OMW PAHN WIA MET:

Kapakap oh kaunopada mwahu. Kapakapki sawas pwe ken dehr medemedewe pein kowe ahpw omw padahko. Wehwehki mwahu ire kesempwal kan me ke anahne kasalehda. Kasalehda madamadau kan sang ni pein omw lokaia; dehr wadekte ehuehu lepin lokaia ko sang dahme ntingdier.

Ma ke koasoanehdi ken wadek sang nan Paipel de ehu pwuhk tohrohr, esehla mwahu ireo pwe omw wadawad en maledek. Ma aramaso me koasoi nan ireo, ni omw wadek arail lokaia ko, kasalehda pepehm ahpw dehr daulihala.
Koasoi sang nan omw mohngiong. Medewe ia kahrepen sounrongorong kan ar anahne rong ireo. Medemedewe duwen irail. Eri omw pepehm oh kadek pahn sansalda sang ni mwomwomw, omw mwekid oh pohn mesomwen.

Koasoi ni ahl me ke uhdahn kin wia sohte wehwehki me ke pahn sohte kasalehda wahu. Kolokol wahupen omw padahko sang ni omw doadoahngki lokaia sansal oh idawehn koasoandi pwung en lokaiao.
Kilang sounrongorong kan. Kilikilang meserail ma met sohte pahn kahrehda soansuwed. Ma ke wia padahk, kilang emen nanpwungen sounrongorong kan ekis ahnsou, ahpw dehr katangahte mesomwen pohrail.