IREN MEHN KASUKUHL 49
Ia Duwen Omw Peneinei Ar Kak Nsenamwahu?—Pali 1
Pwopwoud kapw kan kin koapworopworki me peren me re ahneki ni ar rahnen kapwopwoudo pahn poatopoat. Oh met kak wiawi. Kristian kan me pwopwoudkier ahnsou reirei oh kin nantihong kapwaiada kaweid en Paipel kan ese me met kak wiawi.
1. Dahme Paipel kaweidki ohl pwopwoud kan?
Siohwa ketin koasoanehdi ohl pwopwoud en wia moangen peneinei. (Wadek Episos 5:23.) Siohwa ketin kupwurki ohlo en wiahda pilipil me pahn wia kamwahupen peneineio. Paipel kaweidki ohl pwopwoud kan: “Kumwail pousehlahte poakohng amwail pwoud kan.” (Episos 5:25) Ia wehwehn met? Ohl pwopwoud limpoak men kin kadekohng eh pwoudo ni imwarailo oh ni ara kin mi rehn aramas teikan. E kin perehsang mehkot keper oh wia uwen eh kak pwe eh pwoud en kin nsenamwahu oh ahneki dahme e anahne. (1 Timoty 5:8) Me keieu kesempwal, e kin sewese liho en ahneki nanpwungmwahu keren rehn Siohwa. (Madiu 4:4) Karasepe, e kak iang eh pwoudo kapakap oh wadek Paipel. Ni ohl pwopwoud men eh kin apwalih eh pwoud ni limpoak, e kak kolokolete eh nanpwungmwahu rehn Siohwa.—Wadek 1 Piter 3:7.
2. Dahme Paipel kaweidki lih pwopwoud kan?
Mahsen en Koht mahsanih me lih pwopwoud “uhdahn pahn kin wauneki laud eh pwoud.” (Episos 5:33) Ia duwen eh kak wia met? Liho kak medewe soahng mwahu kan duwen eh pwoudo oh eh kin nantihong apwalih ih oh neira seri kan. E pil kak wauneki ohlo sang ni eh kin utung eh pilipil kan oh kin koasoi kadekohng ih oh koasoia soahng mwahu kan duwen ih, mehnda ma ohlo sohte kin kaudokiong Siohwa.
3. Ia duwen pwopwoud ehu ara kak kakehlaka ara pwopwoud?
Paipel mahsaniheki duwen pwopwoud: “Ira pahn wiahla warteieu.” (Madiu 19:5) Met wehwehki me ira anahne pelianda mehkot me kak kahrehiong ara limpoak en luwetala. Ira kin wia met ni ara kin kaukaule wiahda ahnsou en patpene oh ni ara kin kasalepene ara madamadau oh pepehm kan ni mehlel oh limpoak. Emenemen ira sohte kin mweidohng mehkot de mehmen—likin Siohwa—en kesempwalsang eh pwoud. Ira kin uhdahn kanahieng ira en dehr nohn karanihala emen tohrohr.
KALAUDEHLA OMW ESE MET
Kilang kaweid en Paipel kan me kak kakehlaka amwa pwopwoud.
4. Ohl pwopwoud—poakohng oh apwalih mwahu omw pwoud
Paipel mahsanih me “ohl pwopwoud kan uhdahn pahn kin poakohng arail pwoud kan duwehte ar kin poakohng pein paliwararail kan.” (Episos 5:28, 29) Ia wehwehn met? Kilang KISIN KASDO, oh mwuri koasoiapene peidek wet.
Ia ekei soangen ahl akan me ohl pwopwoud men kak kasalehda me e kin poakohng oh kin apwalih eh pwoud?
Wadek Kolose 3:12, oh mwuri koasoiapene peidek wet:
Ia duwen ohl pwopwoud men eh kak kasalehda irair pwukat nan eh pwopwoud?
5. Lih pwopwoud—poakohng oh wauneki omw pwoud
Paipel kin kangoange lih pwopwoud en wauneki eh pwoud mehnda ma e kin papah Siohwa de soh. Wadek 1 Piter 3:1, 2, oh mwuri koasoiapene peidek pwukat:
Ke uhdahn pahn men omw pwoudo en kin kaudokiong Siohwa, ma e sohte kin. Mehnia me pahn mwahu—kin kalapw kalohkohng de kasalehda wiewia mwahu oh wauneki ih? Dahme kahrehda?
Ohl pwopwoud oh lih pwopwoud kak ehupene wiahda pilipil mwahu kan. Ahpw, ekei pak liho kakete sapwungki en ohlo pilipil. Eri e kak kasalehda eh madamadau ni meleilei oh wahu, ahpw e anahne pohnese me Siohwa ketikihong ohlo pwukoa en pilada dahme keieu mwahuong peneineio. Liho anahne wia uwen eh kak en sewese en ohlo pilipilo en pweida. Ni eh wia met, e kin sewese peneineio pwon en nsenamwahu. Wadek 1 Piter 3:3-5, oh mwuri koasoiapene peidek wet:
Ia sapwellimen Siohwa pepehm ni lih pwopwoud men eh kin wauneki eh pwoud?
6. Kumwa kak powehdi kahpwal kan nan amwa pwopwoud
Sohte pwopwoud ehu me unsek. Kahrehda, pwopwoud kan anahne doadoahkpene pwehn powehdi kahpwal kan. Kilang KISIN KASDO, oh mwuri koasoiapene peidek pwukat.
Dahme kasalehda me ohlo oh liho sohla kerenpene?
Dahme ira wia pwe ira en kakehlaka ara pwopwoud?
Wadek 1 Korint 10:24 oh Kolose 3:13. Mwurin omw wadek ehuehu iren Paipel, koasoiapene peidek wet:
Ia duwen omw doadoahngki kaweid wet eh kak kakehlaka omw pwopwoud?
Paipel mahsanih me kitail anahne wauneki emenemen. Kasalehda wahu kin pidada me atail wiewia ong aramas emen en kin kadek oh wahu. Wadek Rom 12:10, oh mwuri koasoiapene peidek pwukat:
E pwung ohlo de liho en awih mahs eh pwoudo en wauneki ih? Dahme kahrehda?
EKEI ARAMAS KIN NDA: “Ngehi oh ei pwoudo solahr kerenpene duwehte mahso.”
Ia duwen omw pahn kawehwehda me Paipel kak sewese ira?
DAHME KE SUKUHLKIER
Ohl pwopwoud oh lih pwopwoud kak nsenamwahu ni ara kin limpoakpene, wauneki emenemen oh kapwaiada kaweid en Paipel kan.
Kousapahl
Dahme ohlo kak wia pwe eh pwopwoud en kak nsenamwahu?
Dahme liho kak wia pwe eh pwopwoud en kak nsenamwahu?
Ma ke pwopwoud, mehnia kaweid en Paipel me kak kakehlaka omw pwopwoud?
PIL TEHK
Sukuhlki kaweid mwahu kan me kak seweseiuk en ahneki mour en peneinei nsenamwahu.
Kilang kisin kasdohn koul me kasalehda kapaipen doadoahngki kaweid en Koht nan omw pwopwoud.
Tehk ia wehwehn en uhpah moangen peneinei.
“Dahme Kahrehda Lih akan Anahne Uhpah Arail Pwoud kan?” (Kahn Iroir, May 1, 2010)
Ia duwen pwopwoud ehu ara powehdi kahpwal laud kan—iangahki ara mweipesengo?