Ke Kin Ese Duwen Met?

Likin dahme Paipel mahsanih, ia mehn kadehde teikan me mehn Israel kan wia lidu kei nan Isip?

Paipel kasalehda me mwurin mehn Midian kan wahla Sosep Isip, Seikop oh eh peneineio keseusang Kenan kohla wasao. Irail mihla nan kisin wasa ehu nan Isip me adaneki Kosen, limwahn Nail Delta. (Sen. 47:1, 6) Mehn Israel ko “kehlailla oh audehla wasa koaros.” Eri mehn Isip ko tepida masak men Israel ko oh idingkihong irail en wiahla lidu.​—Eks. 1:7-14.

Ekei soun uhwong kan kouruhrki dahme Paipel koasoia, ndahki me met soai pwoat. Ahpw, mie mehn kadehde me mehn Sehm kana kin kousoan nan Isip mahso nin duwen lidu kei.

Karasepe, sounkasawih dipwisoun mahs kan diarada mohn kahnimw en mahs kei ni paliepeng en Isip. Dr. John Bimson ripohtki me mie mehn kadehde 20 de tohtohsang me kin kasalehda wasahn kousoan en mehn Sehm kan me mi kisin wasa ehu ni paliepeng en Isip. Oh pil, sounsamanih poadopoad en Isip (Egypotologist) James K. Hoffmeier koasoia: “Mwein mpen pahr 1800-1540 Mwohn Krais, Isip wia wasa kaselel ehu ong mehn Sehm kan me kohsang Palikapi en Eisia en kousoan ie.” E koasoia “Ahnsowo duwehte ahnsou en Seikop oh eh peneineio oh e pil duwehte ahnsou oh irair me kitail wadek nan Senesis.”

Miehte pil ekei mehn kadehde duwen Palieir en Isip. Doaropwe limilim ehu me wiawihdahsang tuhke papyrus (c. 2000–c. 1600 Mwohn Krais) audaudki eden lidu ko me doadoahk nan ihmw ehu ni Palieir en Isip. Eden aramas tohtohsang 40 me wia mehn Sehm. Irail lidu de sounpapah pwukat kin doadoahk nin duwen sounkuk kei, soundeidei kei, tohndoadoahk kei. Soupoad Hoffmeier koasoia: “Pwehki daulih mehn Sehm 40 me doadoahk nan ihmw ehute nan Thebaid [palieir en Isip], nempehn mehn Sehm kan nan Isip me uhdahn tohto, ahpw mehlel nan Delta.”

Sounkasawih dipwisoun mahs David Rohl koasoia me ekei eden irail lidu ko me ntingdi “duwehte ahd kan me kitail wadek nan Paipel.” Karasepe doaropwe ko audaudki ahd kan me duwehte Isakar, Aser, oh Sipra. (Eks. 1:3, 4, 15) Rohl nda: “Met wia mehn kadehde mehlel ong ahnsowo me mehn Israel kan mi nan Isip nin duwen lidu kei.”

Dr. Bimson koasoia: “Koasoipen mehn Israel kan ar wia lidu nan Isip oh arail mweselsang wasao me pwarada nan Paipel wia poadopoad ehu me uhdahn mehlel.”