Dahme Koht Ketin Wiadahr ong Uhk?

Met iei ehu iren Paipel me pali moron en aramas akan esehla oh pil kin doadoahngki. Ekei nda me sohte ehu ire me “oaralapihada ni sansal duwen nanpwungen Koht oh aramas akan oh pil duwen elen komour.” Pwehki met, ekei sahpw kin kalapw doadoahngki iren Paipel wet, de nting wet “Sohn 3:16” nan mwekid kan me wehi pokon kin wia. Re pil kin kapasahda ni wararail sidohsa kan, mahlenihada de ntingihada ni dihd kan de wasa teikan.

Ele irail me kin doadoahngki ire wet uhdahn kamehlele me sapwellimen Koht limpoak iei me pahn kahluwalahng aramas mour soutik. A ia duwen kowe? Ia wehwehn sapwellimen Koht limpoak ong uhk? Oh dahme ke medewe Koht ketin wiadahr pwehn kasalehda sapwellime limpoak ong uhk?

“KOHT EH KETIN LOALLOALE SAMPAH”

Aramas tohto men kapingahki Koht kepikipikdahn lahng oh sampah, kepikipik teikan oh pil pein irail. Wiawihdahn kepikipik kan uhdahn kapwuriamwei oh mwahu me kahrehda uhdahn mie emen me sapwellimaniki erpit lapalap me kahrehda mepwukat en wie momour. Mie me tohto me kin rahn koaros kalahngankihong Koht kisakis en mour. Re pil pohnese me re uhdahn anahne Koht pwe ren kak ale soahng kan me anahn, duwehte kisinieng, pihl, mwenge, oh pil mwekimwekid en pahnlahng oh sampah, pwe ren kak pousehlahte momour oh wiewia dahme re perenki wia.

E mwahu kitail en kalahngankihong Koht soahng pwukat koaros pwehki ih me uhdahn Sounkapikpatail oh me ketikihong kitail mour. (Melkahka 104:10-28; 145:15, 16; Wiewia 4:24) Kitail kak wehwehkihda sapwellimen Koht limpoak ong kitail ni atail kin medemedewe duwen soahng koaros me e ketin wiadahr pwe mour en kak mie. Wahnpoaron Pohl kawehwehda ni ahl wet: “[Koht] me pahn ketikihong mour oh esingek oh soahng teikan ong aramas akan koaros. Pwe ‘Kitail kin momourki ih, oh mwekimwekidki ih, oh pil mihmi pwehki ih.’”​—Wiewia 17:25, 28.

Ahpw sapwellimen Koht limpoak kin sansalda ni ahl tohto sang eh ketin apwalihte atail anahn en paliwar. E ketin wiakitailda ni ahl ehu me tohrohr de ileilehsang mahn akan, oh ketin kawauwih kitail ni eh ketikihong kitail anahn en men ahneki nanpwungmwahu reh oh pil sewese kitail en kaitarala anahn wet. (Madiu 5:3) Ni ahl wet, aramas peik kan kak ahneki koapworopwor en wiahla kisehn sapwellime peneinei, sapwellime “seri kan.”​—Rom 8:19-21.

Nin duwen me Sohn 3:16 doula mahsanih, Koht ketin kasalehda sapwellime limpoak ong kitail sang ni eh ketin poaronedohng sampah sapwellime Ohl, Sises, pwehn padahkihong kitail duwen eh Koht oh Semeo oh pil matkinkitailla. Ahpw me tohto pahn nda me re sohte uhdahn wehwehki dahme kahrehda Sises anahne pwoukihla tohnsampah oh ia duwen eh pwoula kin wia kasalepen sapwellimen Koht limpoak ong kitail. Kitail pahn tehkpene ia duwen Paipel eh kawehwehda kahrepen pwoulahn Sises oh kesempwalpe.

“E KETIKIHDOHKI SAPWELLIME IEHROS”

Aramas koaros kin mehla. Re sohsohki soumwahu, mahla, oh mehla. Ahpw kaidehn ihme Siohwa Koht ketin kupwurki nin tapio. E ketikihong tepin pwopwoudo koapworopwor en mour kohkohlahte nan paradais nin sampah. Pwehn ahneki koapworopwor wet, ira anahne wia mehkot. Ira anahne peikiong Koht. Koht mahsanih me ma ira pilada en sapeik, ira pahn mehla. (Senesis 2:17) Tepin ohlo uhwongada sapwellimen Koht manaman en kaunda, oh kahrehda mehla ong ih oh pil kadaudoke kan. Wahnpoaron Pohl nda: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.”​—Rom 5:12.

Ahpw Koht “kin kupwurperenki dahme pwung.” (Melkahka 37:28) Mendahki e sohte kak ketin pohnsehsehla wiewiahn dihp me tepin ohlo nsenki wiahda, Koht sohte ketin kalokehki aramas koaros lokolok oh mehla kohkohlahte pwehki sapeik en aramas tehmen. Weksang met, e ketin kapwungala irairo ni pwung pahrek ni eh ketin doadoahngki kaweid en kosonned me pid “mour pwehki mour” oh kahrehda mour soutuk en kak pwurehng miehla ong aramas peik kan. (Eksodus 21:23) Ahpw peideko iei, Ia duwen mour en aramas unsek me Adam kasalongehla eh kak pwurehng miehla? Pasapengo iei: Emen anahne kihda, de meirongkihla, mour ehu me mi ni uwen pweipwei ehu me pahrekiong mour en Adam, me iei mour en aramas unsek men.

E sansal me sohte kadaudok en Adam men me unsek oh me kak kihda uwen pweipwei wet, ahpw Sises kelehpw. (Melkahka 49:6-9) Sises ketin ipwidi oh sohte sohsohki dihp. E ketin unsek, duwehte Adam nin tapio. Kahrehda ni eh tounmeteikihla eh mour, Sises ketin pwainda aramas sang arail wia lidu en dihp. Sang ni eh ketin wia met, e ketikihda ong kadaudok en tepin pwopwoudo ahl en ahneki soangen mour unsekohte me Adam oh Ihp ahneki nin tapio. (Rom 3:23, 24; 6:23) Ia duwe, mie mehkot me kitail anahne wia pwehn paiekihda soangen limpoak inenen sapan wet?

“PWE MEHMEN ME KIN KAMEHLELE IH”

Sohn 3:16 pil mahsanih me “mehmen me kin kamehlele [Sises] en dehr mehla, a en ahneki mour soutuk.” Met wehwehki me kitail anahne wia mehkot pwehn kak ale kisakis en mour soutuk. Ma kitail men “ahneki mour soutuk,” kitail anahne kamehlele Sises oh peikiong ih.

Ele ke medewe: ‘Ia duwen peik eh pidada met? Kaidehn Sises mahsanih me “mehmen me kin kamehlele ih” pahn ahneki mour soutuk?’ Ei, en kamehlele, de pwoson, kin kesempwal. Ahpw e kesempwal en tamataman me nan Paipel, en pwoson kin laudsang en ihte kamehlele. Pwe Koht en kupwurkin kitail, emenemen anahne wia laudsang en ihte pohnese me Sises iei Sounkomour. Me pwosono pil anahne uhdahn nantihong doadoahngki dahme Sises ketin padahngki. Ma sohte wiewia iang, pwoson wet pwoson mwahl ehu. Paipel mahsanih: “Pwoson, ma sohte wiewia iang, pwoson mehla ehu.” (Seims 2:26) De dahme me pwosono anahne wia iei en kasalehda eh pwoson Sises, me wehwehki e anahne mour pahrekiong dahme e kamehlele oh pwoson.

Pohl kawehwehda ni ahl wet: “Pwe limpoak en Krais me kamwakamwakid kiht, pwehki at dehdehkier padahk wet: aramastehmen [Sises] pwoukihla aramas koaros . . . E ketin pwoukihla aramas koaros, pwe irail kan me momour, re dehr kin mourki pein ihr, ahpw re en kin mourkihte ih me pwoukinirailla oh ketin iasada.” (2 Korint 5:14, 15) Atail kasalehda me kitail uhdahn kalahnganki sapwellimen Sises meirongo anahne kamwakid kitail en wiahda wekidekla kan nan atail mour, me iei en dehr mourki pein kitail ahpw en mourkihte Sises me ketin pwoukinkitailla. Met wehwehki me kitail anahne mwohneki mahs en kapwaiada nan atail mour dahme Sises ketin padahngki. Soangen wekidekla wet pahn kakete wekidala soahng kan me kitail kesempwalki, atail pilipil kan oh soahng koaros me kitail kin wia. Eri, keting dahieu me irail kan me kamehlele oh kasalehda pwoson Sises pahn alehdi?

“EN DEHR MEHLA, A EN AHNEKI MOUR SOUTUK”

Kaimwiseklahn ire wet nan Sohn 3:16 kasalehda sapwellimen Koht inou ong irail kan me kin kasalehda arail pwoson meirongo oh mour pahrekiong sapwellime koasoandi kan. Koht kupwurki me irail me lelepek pwukat “en dehr mehla, a en ahneki mour soutuk.” Ahpw mie koapworopwor riau ong irail kan me paiekihda sapwellimen Koht limpoak.

Ong ehu pwihn, Sises ketin inoukihda mour soutuk nanleng. E mahsanihong sapwellime tohnpadahk kan ni sansal me e pahn ketin kaunopada wasa ehu ong irail pwe ren iang ih kaunda ni lingan. (Sohn 14:2, 3; Pilipai 3:20, 21) Irail me iasadahng mour nanleng “pahn wiahla samworo en Koht oh Krais, oh re pahn iang kakaun erein pahr kido.”​—Kaudiahl 20:6.

Me malaulaute sang sapwellimen Krais kan me pahn ale pwais kaselel wet. Ni mehlel, Sises mahsanih: “Kumwail kisin pwihn sihpw, kumwail dehr perki mehkot. Pwe Samamwail kupwurperenkidahr en ketikihong kumwail sapwellime wehi.” (Luk 12:32) Ia uwen tohtohn irail “kisin pwihn sihpw” wet? Kaudiahl 14:1, 4 mahsanih: “I ahpw kilangada Sihmpwulo [Sises Krais me iasadahro] me ketiket pohn dohlen Saion [nanleng]; oh aramas lopw pahnen pahkid me iang ket wasao, me mwaren Sihmpwulo oh mwaren Sahm ntinting ni temwarail kan. . . . Re kamaiaudahsangehr rehn aramas teikan oh iei irail me tepin meirongalahr ong Koht oh Sihmpwulo.” Pwehn kapahrekihong aramas lik lik kei me mour mahs oh pil ahnsou wet, meh 144,000 wiahte “kisin pwihn sihpw.” Paipel kahdaneki irail pwukat nanmwarki kei. Eri ihs me irail pahn kaunda?

Sises mahsanih duwen keriaun pwihn en irail me lelepek kan me pahn ale kapai kan sang Wehin nanleng. Nin duwen me Sohn 10:16 kasalehda, Sises mahsanih: “Pil mie ekei nei sihpw me sohte mi nan kehl wet. I uhdahn pahn weiraildo, oh re pahn rong ngilei. Eri, re pahn wiahla pwihn sihpw teieu, oh sileparail pahn mehtehmen.” Irail “sihpw” pwukat kin ahneki koapworopwor en mour soutuk nin sampah, me iei koapworopwor ohte me Adam oh Ihp ahneki nin tapio. Ia duwen atail ese me arail koapworopwor pahn pweida nin sampah?

Pak tohto, Paipel kin koasoia duwen irair en Paradais me pahn pweida nin sampah. Pwehn kilang duwen met, ke kak pahkala noumw Paipel oh wadek ire pwukat: Melkahka 37:9-11; 46:8, 9; 72:7, 8, 16; Aiseia 35:5, 6; 65:21-23; Madiu 5:5; Sohn 5:28, 29; Kaudiahl 21:4. Iretikitik pwukat kohpada me mahwen, lehk lapalap, soumwahu, oh mehla pahn imwisekla. Iretikitik pwukat pil koasoia ahnsou ehu me aramas mwahu kan pahn ahneki peren en kak kauwada pein imwarail, koadoahkihada wahn sapwarail, oh neirail seri kan pahn kekeirda nan wasa meleilei.a Ia duwe, ke sohte perenki soangen koapworopwor wet? Kitail ahneki kahrepe mwahu en kamehlele me inou pwukat pahn kereniong pweida.

KOHT KETIN WIADAHR SOAHNG TOHTO

Ma ke uhdi oh medemedewe soahng koaros me Koht ketin wiadahr ong uhk oh pil tohnsampah, e sansal me e ketin wiadahr soahng tohtohie. Kitail ahneki mour, loalokong, roson, oh soahng kan me kitail anahne pwehn wie momour. Laudsang met, kisakis en meirong me Koht ketikihda ni eh ketin doadoahngki Sises, me pwoukinkitailla, kak wahdo kapai laud teikan, nin duwen me kitail sukuhlki sang Sohn 3:16.

En ahneki mour soutuk nan wasa meleilei oh kaselel, me sohte mie keperpen soumwahu, mahwen, lehk de mehla, pahn uhdahn ritidahng kitail mour nsenamwahu oh kapai kan me sohte imwi. Sohte lipilipil ma ke pahn ale kapai pwukat de soh, met wia pein omw pilipil. Ahpw miehte peidek ehu, Dahme ke wiewia ong Koht?