Koakon En Peidek
◼ Ia kamwahupen iang towehda mihding kan ni mwomwohdiso me pwukoahki wasahn kalohk me ke kousoan loale?
Sang nan koasoandi en mwomwohdiso, se kin ale kangoang pwehn kasalehda ‘limpoak oh wiewia mwahu kan.’ (Ipru 10:24, 25) Kitail sukuhliki padahk mehlel oh kitail kak kapwaiada atail pwukoa en katohnpadahk pwehki sawas me kitail kin ale sang mwomwohdiso. (Madiu 28:19, 20) Kitail pil kin ale kakehl pwehn powehdi kasongosong kan oh kolokol atail lelepek oh pil Siohwa ketikihong kitail sounapwalih limpoak kan pwehn kak sewese kitail en powehdi kahpwal akan oh kapwunod akan me kin pwarapwarada ahnsou koaros. E sansal mwahu me koasoandi en mwomwohdiso kin kesempwal ong atail pitsang soahng kan me kak kauwehla atail pali ngehn. Ahpw, mie kamwahupen iang towehda mihding kan ni mwomwohdiso me pwukoahki wasahn kalohk me ke kin kousoan loale?
Mehlel, irair en emenemen kin kak wekpeseng, oh pil soahng kan duwehte doadoahk en mwohni, de ahmw pwoud sohte iang padahk mehlel, de mehn peidaid me kak kahrehong emen en anahne wia ah pilipil duwen mehnia mwomwohdiso me e pahn iang towehda mihding kan. Ahpw, mie kamwahupen—kamwahupe kan ni pali ngehn de kamwahupe teikan—iang towehda mihding kan ni mwomwohdiso me pwukoahki wasahn kalohk me ke kousoan loale. Elder kan pahn kak mwadang tuhwong sounkalohk kan mwadang ma peian mehkot karuwaru pwarada. Oh pil, Koakon en Peidek kan en pahr teiko kin kasalehda pil ekei kamwahupe kan.—May 1991, March 1976, oh January 1967.
Oh pil, e kin mengei ong kitail ma kitail pahn iang towehda mihding kan nan Kingdom Hall me karanih wasao me kitail kin kousoan, oh kitail kak mwadang lel Kingdom Hall oh met kin kihong kitail atail ahnsou mwahu en koasoiong meteikan, koasoanehdi soahng kan me kesempwal, oh iang tepin koul oh kapakap. Ni ahnsou me kitail kin tuhwong irail aramas akan me kin mihmi nan atail wasahn kousoan, e kin kamengeila atail kin tuhwong irail, oh tepida onop en Paipel rehrail oh pil luhke irail ong mihding kan me kin karanih arail wasahn kousoan.
Se kamehlele me tapwin peneinei kan pahn kapakapki ire wet oh medemedewe duwen irair kan me kesempwal ni arail pahn wia arail pilipil mwahu ong dahme keieu mwahu ong arail peneinei—dahme keieu mwahu ong arail anahn en paliwar oh pali ngehn.—1 Tim. 5:8.