IREN MEHN KASUKUHL 39
Dahme Koht Ketin Mahsaniheki Duwen Nta?
Nta kin kesempwal. Ma sohte nta, kitail sohte kak mour. Pwehki Koht me Sounkapikpik, e ketin sapwellimanki pwuhng en mahsanih ia duwen atail pahn doadoahngki nta. Dahme e ketin mahsaniheki duwen nta? Kitail kak kang de ale doken nta? Oh ia duwen omw kak wiahda pilipil mwahu duwen nta?
1. Ia sapwellimen Siohwa madamadau duwen nta?
Mahsie, Siohwa ketin mahsanihong sapwellime tohnkaudok kan: “Mour en mehkoaros me momour mihmi ni nta.” (Lipai 17:14) Ong Siohwa, nta kin wia wiliepen mour. Mour wia mehkot sarawi oh kisakis tohrohr ehu sang rehn Koht, eri nta pil uhdahn kesempwal oh sarawi.
2. Dahme Koht ketin keinapwihdi?
Mwohn mwomwohdisohn Kristian eh wiawihda, Siohwa ketin kehkehlingkihong sapwellime tohnkaudok kan ren dehr tungoale nta. (Wadek Senesis 9:4 oh Lipai 17:10.) E pil ketin pwurehng kapwurehda kehkehlik wet ni ahnsou me pwihn me kin apwalih mwomwohdiso kan kaweidki Kristian kan ren “kin liksang . . . nta.”—Wadek Wiewia 15:28, 29.
Ia wehwehn liksang nta? Ma toahkte men ndaiong uhk ken liksang sakau en wai, ke sohte pahn nim. Ahpw ke pahn kang mwenge me doalkihda sakau en wai de ke pahn doakoahlong sakau en wai nan omw selin nta kan? Uhdahn soh. Duwehte met, Koht ketin kehkehlingki kitail en liksang nta me wehwehki kitail en dehr nim nta de kang uduk me nta sohte kakerkersang. De pil kang mwenge ehu me doalkihda nta.
Ahpw ia duwen wiepen palien wini me pid nta? Ekei wiepen palien wini kan kin kauwehla kosonned en Koht ni sansal. Me duwehte ale doken nta pwon de ehu rehn soahng pahieu kan me wiahda nta—red cells, white cells, platelets, oh plasma. Ong ekei wiepe kan, e kakete sohte sansal ma e kauwehla kosonned en Koht de soh. Karasepe, ekei wiepe kan kin doadoahngki soahng kan me inenen tikitik me kohsang soahng pahieu ko me wiahda nta. Ekei wiepe kan kin doadoahngki pein en aramaso nta. Emenemen kitail anahne kasawih wiepe pwukat oh pein wiahda atail pilipil.a—Kalesia 6:5.
KALAUDEHLA OMW ESE MET
Tehk ia duwen atail kak wiahda pilipil duwen wiepen palien wini kan me pid nta.
3. Pilada wiepen palien wini me kin kaperenda Siohwa
Ia duwen omw kak wiahda pilipil me pahrekiong sapwellimen Koht madamadau? Kilang KISIN KASDO, oh mwuri koasoiapene kesempwalpen idawehn kahk pwukat pah.
Kapakapki erpit.—Seims 1:5.
Rapahki ire mehlel kan sang nan Paipel oh ia duwen omw pahn doadoahngki.—Lepin Padahk 13:16.
Rapahki wiepen palien wini kan me mie nan omw wasa.
Esehda soangen wiepen palien wini kan me uhdahn sansal ke sohte kak ale.
Kanahieng pwe omw pilipil dehr kauwehla omw nsenmwakelekel.—Wiewia 24:16.b
Ken ese me pilipil kan me ke anahne pein wiahda sang ni kadeikpen loalomw, sohte emen, duwehte omw pwoud, elder men de me onop Paipel rehmw pahn ndaiong uhk pilipil dah me ke pahn wiahda.—Rom 14:12.
Ntingihedi omw pilipilo.
4. Sounkadehdehn Siohwa kan kin rapahki wiepen palien wini me keieu mwahu
Kitail kak peikiong kosonned en Koht me pid nta oh alehdi epwelpen wini me keieu mwahu me sohte anahne nta. Kilang KISIN KASDO.
Wadek Taitus 3:2, oh mwuri koasoiapene peidek wet:
Dahme kahrehda kitail anahne kasalehda wahu oh mpahi ahnsou koaros ni atail koasoiong toahkte kan?
Sohte kak ale |
Kristian en pilada |
|---|---|
A. Blood plasma |
Soahng kan me inenen tikitik sang plasma |
B. White cells |
Soahng kan me inenen tikitik sang white cells |
C. Platelets |
Soahng kan me inenen tikitik sang platelets |
D. Red cells |
Soahng kan me inenen tikitik sang red cells |
5. Ma e pidada soahng kan me inenen tikitik me kohsang nan nta
Nta wiawihkihda soahng pahieu, me iei, red cells, white cells, platelets, oh plasma. Soahng pwukat pil kohpeseng wiahda soahng kan me inenen tikitik me kohsang nan nta.c Ekei soahng tikitik pwukat kin mi nan wini me kin sewese peiong soumwahu de sewese kauhdi kerekerlahn nta.
Duwen soahng kan me inenen tikitik me kohsang nan nta, emenemen Kristian anahne pein wiahda eh pilipil sang ni kadeikpen loale me poahsoankihda Paipel. Ekei ele pahn pilada en dehr ale epwelpen de wiepen wini me pidada soahng kan me inenen tikitik me kohsang nan nta. Meteikan ele pahn pehm me kadeikpen loalarail mweidohng ren ale soahng kan me inenen tikitik.
Ni omw pahn wiahda omw pilipil, medemedewe peidek wet:
Ia duwen ei pahn kawehwehiong toahkte men kahrepen ei sohte pahn ale de kahrepen ei pahn ale ehu soahng kan me inenen tikitik me kohsang nan nta?
MA EMEN IDEK: “I sohte wehwehki dahme doken nta sapwungki—pwe e kin doarehla mour.”
Ia duwen omw pahn sapeng?
DAHME KE SUKUHLKIER
Siohwa ketin kupwurki kitail en dehr doadoahngki nta ni ahl sapwung.
Kousapahl
Dahme kahrehda Siohwa kin ketin wiahki nta mehkot sarawi?
Ia duwen atail ese me sapwellimen Koht kehkehlik en liksang nta pil kin pidada doken nta?
Ia duwen omw kak wiahda pilipil mwahu duwen palien wini me pid nta?
PIL TEHK
Dahme ke anahne medewe mwohn omw pahn pilada ma ke pahn ale wiepen palien wini me pidada nta?
Dahme ke anahne medewe ni omw pahn pilada ma ke pahn ale soahng kan me inenen tikitik me kohsang nan nta?
Dahme kahrehiong toahkte men en kamehlele me sapwellimen Siohwa madamadau ong nta me pwung?
Kilang ia duwen elder kan me kin iang Pwihn me Kin Ehuiong Imwen Wini kan ar kin sewese riarail Kristian kan.
a Kilang Iren Mehn Kasukuhl 35, “Ia Duwen Atail Kak Wiahda Pilipil Mwahu?”
b Kilang ire 5, “Ma E Pidada Soahng kan me Inenen Tikitik me Kohsang nan Nta,” oh Oaritik 3, “Wiepen Palien Wini me Pid Nta.”
c Ekei toahkte kan kin wiahki soahng pahieu kan me wiahda nta nin duwen soahng kan me inenen tikitik (fractions). Kahrehda, ele ke pahn anahne kawehwehiong omw toahkteo omw pilipil en dehr ale doken nta pwon de red cells, white cells, platelets, de plasma.