Sapwellimen Sises Mahsen Kin Kamwakid Omw Wiewia?

“Ih me Koht ketin poaronedohr kin ketin mahmahsanih mahsen en Koht.”​—SOHN 3:34.

1, 2. Dahme mahsen kan en Sises nan sapwellime Kapahrek en Pohn Dohl kak karasahiong? Dahme kahrehda kitail kak nda me e poahsoanda sang “mahsen en Koht”?

DAIMON me keieu laud rahnwet dierek nan Aperika. Daimon wet inenen kesempwal! Ahpw kesempwal sang met iei mahsen kan nan sapwellimen Sises Kapahrek en Pohn Dohl. E sohte kapwuriamwei ong kitail pwehki mahsen en Krais pwilisang rehn Siohwa! Sises pil pein mahsanih: “Ih me Koht ketin poaronedohr kin ketin mahmahsanih mahsen en Koht.”​—Sohn 3:34-36.

² Mendahki Kapahrek en Pohn Dohlo ele sohte lel elep en awa, e audaudki ire 21 sang nan pwuhk waluh kan en Palien Pwuhk Sarawi ni Lokaiahn Ipru. Eri met kasalehda me e poahsoanda sang “mahsen en Koht.” Kitail pahn kilang ia duwen atail kak doadoahngki mahsen kesempwal kan sang kapahrek en sapwellimen Koht Ohl.

“Kapwungala Nanpwungamwa”

3. Mwurin Sises panawih sapwellime tohnpadahk kan me pid lingeringer, kaweid dahieu me e ketikihda?

³ Nin duwen Kristian kan, kitail kin nsenamwahu oh meleilei pwehki sapwellimen Koht manaman kin sewese kitail en kapwarehda irair en peren oh popohl. (Kal. 5:22, 23) Sises sohte kupwurki sapwellime tohnpadahk kan en sohla ahneki meleilei oh peren, eri e panawihekin irail duwen keper en kolokol arail lingeringer me kak imwikihla mehla. (Wadek Madiu 5:21, 22.) Mwuri e mahsanih: “Eri, ni omw pahn wiahiong Koht omw meirong pohn pei sarawi ehu, ke ahpw tamanda me riomw mehn Suhs men nsensuwed pahmw, pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa; mwuri, ke ahpw pwurodo wia omw meirong ong Koht.”​—Mad. 5:23, 24.

4, 5. (a) “Meirong” dahieu me Sises mahsanih nan Madiu 5:23, 24? (b) Ia uwen kesempwal en kapwungala nanpwungen kowe oh riomw Kristian men ma mie nsensuwed pwarada?

⁴ “Meirong” me Sises mahsanih duwe iei soangen meirong kan koaros me wiawi nan tehnpas sarawi en Serusalem. Karasepe, meirong en mahn akan kin kesempwal pwehki iei kisehn kaudok me kin wiawi ong Siohwa sang sapwellime aramas kan. Ahpw Sises ketin kasalehda mehkot me kesempwal sang met, iei kapwungala nanpwungen kowe oh riomw men mwohn ke pahn wia omw meirong ong Koht.

⁵ “Kapwungala nanpwungamwa” wehwehki en kamwahwihala nanpwungen riemen ma mie nsensuwed pwarada. Eri mehn kasukuhl dahieu kitail kak sukuhlki sang sapwellimen Sises mahsen wet? Iei me atail wiewia ong meteikan kin pidada atail nanpwungmwahu rehn Siohwa. (1 Sohn 4:20) E sansal me meirong kan me wiawiong Koht mahs sohte katepe ma emen me wia meirongo sohte kin mwahu ong emen rie.​—Wadek Maika 6:6-8.

Kasalehda Karakarahk

6, 7. Dahme kahrehda karakarahk anahn ni omw pahn kamwahwihala nanpwungen kowe oh riomw Kristian men me nsensuwedla?

⁶ Kapwungala nsensuwed rehn emen riomw Kristian me nsensuwedla kak kasonge omw irair en karakarahk. Emen me karakarahk sohte kin akamai de akupwung rehn rie Kristian men duwen ihs me pwung. Met pahn kauwehla nanpwungara duwehte dahme wiawi ong Kristian en mahs kan nan Korint. Me pid ire wet, wahnpoaron Pohl kihda iren madamadau kesempwal ehu: “Amwail kin wia amwail repenpwung nanpwungamwail kasalehda me mie mehkot sapwung rehmwail. E soh pahn mwahu ong kumwail ma kumwail mweidalahte amwail repenpwung kan oh tounmeteikihla? E soh pahn mwahu ong kumwail ma emen pirapai kumwail?”​—1 Kor. 6:7.

⁷ Sises sohte mahsanih me kitail anahne kohla rehn riatail Kristian men oh kamehlelehiong me kitail me pwung ah ih me sapwung. Atail mehn akadei iei en kamwahwihala nanpwungatail. Pwehn kamwahwihala nanpwungen riemen, kitail anahne kasalehda duwen atail pepehm ni mehlel. Kitail pil anahne pohnese me pepehm en meteio pil medekla. Oh ma kitail me sapwung, kitail men pek mahk ni elen karakarahk.

‘Ma Palimaun en Pwoaren Mesomw Kahrehiong Uhk nan Dihp’

8. Menlau kawehwehda ni mwotomwot sapwellimen Sises mahsen kan nan Madiu 5:29, 30.

⁸ Nan sapwellime Kapahrek en Pohn Dohl, Sises ketikihda kaweid me pid tiahk mwakelekel. E mwahngih me paliwaratail me soh unsek oh kak kahrehiong kitail nan keper. Sises eri mahsanih: “Eri, ma palimaun en pwoaren mesomwen pahn kahrehiong uhk nan dihp, pwadikasang oh kesehweisang uhk, pwe e mwahuwong uhk kisehn paliwaromwen en lekdekla sang eh pwonte kolahng nan ehl [“Gehenna,” NW]. Oh ma palimaun en pehmwen pahn kahrehiong uhk nan dihp, lipukasang oh kesehweisang uhk; pwe e mwahuwong uhk kisehn paliwaromwen en lekdekla sang eh pwonte kolahng nan ehl [“Gehenna,” NW].”​—Mad. 5:29, 30.

9. Ia duwen “pwoaren mesetail” de “pehtail” kin kak ‘kahrehiong kitail nan dihp’?

⁹ “Pwoaren mesomwen” me Sises mahsanih kin wehwehki atail kehl en kihong atail madamadau en uhlangete mehkot, oh “pehmwen” kin pid dahme pehtail kin wia. Ma kitail sohte kanahieng, kisehn paliwaratail ele kak ‘kahrehiong kitail nan dihp’ oh sohla “poadidiong Koht.” (Sen. 5:22; 6:9) Ma kitail lelohng kasongosong en sapeik ong Siohwa, eri kitail anahne ni kehlail kapwaiada mouren karasaras en pwadikasang pwoaren mesetail de lupukasang pehtail kan.

10, 11. Dahme kak sewese kitail en liksang dipen nenek?

¹⁰ Ia duwen kitail kak irehdi pwoaren mesetail en dehr kilikilang soahng suwed kan? Sohp koasoia: “I wiadahr inou lapalap ehu: I en dehr kin kangkakil serepein men ni ineng suwed.” (Sohp 31:1) Sohp ohl pwopwoud men me sohte kin kauwehla sapwellimen Koht kosonned ong tiahk mwakelekel. Kitail pil anahne kahlemengih ih mehnda ma kitail pwopwoud de kiripw. Pwehn dehr lohdi nan dipen nenek, kitail anahne mweidohng sapwellimen Koht manaman en kahluwa kitail. Met kin kahrehiong irail akan me poakohng Koht en liksang me suwed.​—Kal. 5:22-25.

¹¹ Pwehn liksang dipen nenek, e mwahu kitail en idek rehtail peidek pwukat, ‘I kin mweidohng pwoaren mesei kan en kahrehiong ie I en inengieng kilang soahng suwed kan nan pwuhk, kasdo de Internet?’ Kitail en pil tamanda dahme tohnpadahk Seims koasoia: “A aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp. Eri, eh kin kanaitikihada eh ineng suwed, oh ni dihp eh kin pweidahr mehlel, e kin kahrehiong mehla.” (Seims 1:14, 15) Ni mehlel, ma emen me inoukihda e mour ong Koht “kin kangkakil” emen ki ineng suwed, e anahne wiahda wekidekla laud me rasehng en pwadikasang pwoaren mese oh kosikihla.​—Wadek Madiu 5:27, 28.

12. Kaweid dahieu Pohl kihda me kak sewese kitail en peiong ineng suwed kan?

¹² Pwehki pehtail kan kak kahrehiong kitail en kauwehla sapwellimen Siohwa koasoandi en tiahk pwung, kitail anahne en koasoanehdi teng en kolokol tiahk mwakelekel. Ihme kahrehda kitail anahne kapwaiada en Pohl kaweid me koasoia: “Kumwail . . . kemehla ineng kan en sampah me kin wie doadoahk loalamwail, eri, iet akan; kamwahl, sarsuwed, ineng suwed, oh noahrok kepwe (pwe noahrok kepwe iei ehu soangen kaudok ong dikedik en eni kan).” (Kol. 3:5) Lepin lokaia “kemehla” kin kasalehda uwen kehlail en atail anahne peiong soangen ineng suwed pwukat.

13, 14. Dahme kahrehda e kesempwal kitail en liksang madamadau oh tiahk samin?

¹³ Pwehn kak mour werei, aramas emen ele anahne en mweidala neh en lopla pwehki e soumwahu. Karasaras en “kesehweisang uhk” pwoaren mesomw oh pehmw kin kesempwal pwe kitail en liksang madamadau oh wiewia samin kan me kak kauwehla atail nanpwungmwahu rehn Koht. En kolokol madamadau mwakelekel, tiahk mwakelekel oh nanpwung mwahu rehn Siohwa iei ihte ahl en pitsang kasohrala soutuk me karasahiong Gehenna.

¹⁴ Pwehki dihp me kitail sohsohki oh atail soh unsek, ke anahne doadoahk laud pwehn kolokol tiahk mwakelekel. Pohl koasoia: “I kin kaloke paliwereiet oh irehdi pein ngehi, pwe I perki I dehr lekdekla mwurin ei kapahrengkihongehr meteikan rongamwahwo.” (1 Kor. 9:27) Eri kitail en koasoanehdi teng en doadoahngki sapwellimen Sises kaweid ong tiahk mwakelekel oh dehr wia tiahk me kasalehda atail sohte kalahnganki sapwellime meirong tomw.​—Mad. 20:28; Ipru 6:4-6.

“Kihkihwei”

15, 16. (a) Ia duwen Sises ketikihda mehn kahlemeng en kihkihwei? (b) Ia wehwehn sapwellimen Sises mahsen kan nan Luk 6:38?

¹⁵ Sapwellimen Sises mahsen oh mehn kahlemeng me keieu mwahu kin kalaudehla peren en kihkihwei. E ketin kasalehda kadek sapan ni eh ketidihdo pohn sampah ong kamwahupen aramas soh unsek kan. (Wadek 2 Korint 8:9.) Sises kupwurki en tounmeteikihla eh mour en nanleng pwehn wia aramasala oh ketikihda sapwellime mour ong aramas dipan akan. Ekei irail pahn wia iengen Krais nan sapwellime Wehio nanleng. (Rom 8:16, 17) Oh Sises uhdahn kangoange aramas en kin sapan ni eh mahsanih:

¹⁶ “Kumwail kihkihwei oh aramas akan pahn kasapahldohng kumwail. Irail pahn wudekidi pohmwi uwe ehu me itar, me pahn idaidpene, itpene oh dirla kowahlap. Pwe mehn sohngohte me kumwail pahn sohngki meteikan, re pahn pil sohngkin kumwail.” (Luk 6:38, NW) “Wudekidi pohmwi” kin wia tiahk ehu ong wasahn netinet kan ni wehin Palimese ni arail kin audehda en sounetinet kan arail likou kan ki soahng kan duwehte ehd ehu. Atail kadek sapan kakete imwikihla atail ale uwe ehu me itar, mwein ahnsou me kitail anahne sawas.​—Ekl. 11:2.

17. Ia duwen Siohwa ketikihda karasepe keieu mwahu duwen kihkihwei? Soangen kihkihwei dah me kin wadohng kitail peren?

¹⁷ Siohwa kupwurperenki irail akan me kin perenki kihkihwei. E ketikihda karasepe keieu mwahu ni eh ketikihdo sapwellime Iehros “pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Pohl ntingihdi: “Kumwail tamataman duwen aramas me kin kamwarak kisin werentuhke malaulau, eh pahn dolung wa malaulau; a aramas me kin kamwarak werentuhke tohto, eh pahn dolung wa tohto. Eri, emenemen en kihda eh kisakis duwen me e koasoanedier nan kapehde, kaidehk ni mehnseiren de ni mwomwen idihd; pwe Koht kin ketin poakohng me kin perenki kihwei mehkot.” (2 Kor. 9:6, 7) En kihong atail ahnsou, kehl oh dipwisou kan pwehn utungada kaudok mehlel uhdahn pahn wahdo peren oh kapai kan.​—Wadek Lepin Padahk 19:17; Luk 16:9.

“Dehr Peuk Sowi Mwowe”

18. Nan soangen irair dahieu kitail pahn sohte ‘ ale ketingpatail’ sang Samatail nanleng?

¹⁸ “Kumwail kaleke pwe kumwail dehr kin wia amwail wiewia mwahu kan en souleng [Kristian] mwohn mesen aramas akan pwe re en kin kilang. Pwe ma kumwail wia met, kumwail sohte pahn ale ketingpamwail sang rehn Samamwail me ketiket nanleng.” (Mad. 6:1) Wehwehn “wiewia mwahu,” me Sises mahsanih iei en wekiong kupwuren Koht. Met sohte wehwehki me atail wiewia mwahu en dehr sansalda mwohn aramas akan, pwehki e ketin padahkihong sapwellime tohnpadahk kan me ‘arail marain en sansal mwohn aramas akan.’ (Mad. 5:14-16) Ahpw kitail sohte ‘pahn ale ketingpatail’ sang Samatail nanleng ma atail wiewia mwahu ongete ‘aramas akan en kin kilang’ oh kapinga, duwehte sounwia kasdo kan me kin mwomwehdahte. Ma ih me kitail kin wia, kitail sohte pahn perenki atail nanpwungmwahu rehn Koht de kapai kaselel soutuk en kaundahn Wehio.

19, 20. (a) Ia wehwehn en Sises mahsanih duwen ‘pepeuk sowi’ ni omw pahn “kin wia kisakis sapan”? (b) Ia duwen atail sohte pahn mweidohng peh palimeing en ese dahme peh palimaun kin wia?

¹⁹ Ma kitail kin ahneki madamadau pwung, kitail pahn idawehn sapwellimen Sises kehkehlik: “Eri, ma kumwail kin wia kisakis sapan, kumwail dehr peuk sowi mwowe, duwen me mwalaun akan kin wia nan imwen sinakoke kan oh nanial akan, pwe aramas en kin kapinga irail. I men kumwail en ese pwe re aleier ketingparail.” (Mad. 6:2, NW) “Kisakis sapan” iei en sewese me paisuwed kan. (Wadek Aiseia 58:6, 7.) Sises oh sapwellime wahnpoaron kan kin pil kihda sawas ong me semwehmwe kan. (Sohn 12:5-8; 13:29) Pwehki kitail sohte kin uhdahn peuk sowi mwohn atail kin sewese me semwehmwe kan, e sansal me Sises ketin doadoahngki karasaras ni eh mahsanih me kitail en dehr “peuk sowi” mwohn atail wia “kisakis sapan” kan. Kitail en dehr kalohki atail kisakis, duwehte Parisi kan en mehn Suhs. Sises kahdaneki irail mwalaun pwehki re kin kalohki “nan imwen sinakoke kan oh nanial akan” arail sawas kan ong me semwehmwe kan. Irail me mwalaun pwukat “aleier ketingparail.” Ihte me re pahn ale iei kaping sang rehn aramas oh en kin mwohd lempahntamw nan dewen me lapalap, ahpw Siohwa sohte pahn ketikihong irail mehkot. (Mad. 23:6) Ahpw dahme sapwellimen Krais tohnpadahk pahn wia? Sises mahsanihong irail oh kitail:

²⁰ “Eri, ma kumwail kin wia kisakis sapan, kumwail dehr kin mweidohng peh palimeing en ese dahme peh palimaun kin wia, pwe amwail sawas en rir; eri Samamwail me kin mwahngih amwail wiewia rir kan, en ketin katingihkin kumwail.” (Mad. 6:3, 4, NW) Pehtail kan kin kalapw doadoahkpene. Eri, en dehr mweidohng dahme peh palimeing en ese dahme peh palimaun kin wia, wehwehki en dehr lohki atail sawas kan, mehnda ma pil ong kompoakepatail keren kan.

21. Kating dah kan me kin kohsang rehn Siohwa ‘me kin mwahngih atail wiewia rir kan’?

²¹ Ma kitail sohte kin suweiki dahme kitail kin kihwei, atail “kisakis sapan” pahn wiawi ni rir. Eri Samatail ‘me kin mwahngih atail wiewia rir kan’ pahn ketin katingih kitail. Pwehki e kin ketiket nanleng oh aramas sohte kin kilangki meserail, Samatail nanleng kin ketiket ni “rir.” (Sohn 1:18) Kating me kohsang rehn Siohwa ‘me kin mwahngih atail wiewia rir kan’ kin patehng atail ahneki nanpwungmwahu reh, mahkpen dipatail kan, oh mour soutuk. (Lep. Pad. 3:32; Sohn 17:3; Ep. 1:7) Kating pwukat me inenen mwahusang kaping me kitail ale sang rehn aramas!

Kesempwalki Mahsen Kesempwal kan

22, 23. Dahme kahrehda kitail en kesempwalki mahsen kan en Sises?

²² Kapahrek en Pohn Dohl kin audaudki padahk kesempwal kan me rasehng lingan en takai kesempwal kan. E kin audaudki mahsen kesempwal kan me kak kihong kitail peren nan sampah suwed wet. Ei, kitail pahn nsenamwahu ma kitail kin kesempwalki mahsen kan en Sises oh mweidohng en kamwakid atail wiewia oh elen atail mour.

²³ Koaros me kin “rong” oh “kapwaiada” dahme Sises ketin padahngki pahn paiekihda. (Wadek Madiu 7:24, 25.) Eri kitail en koasoanehdi teng en kapwaiada sapwellimen Sises kaweid. Kitail pahn tehkpene sapwellime mahsen teikan nan Kapahrek en Pohn Dohl nan iren onop en mwuhr.

Ia Ahmw Pasapeng?

• Dahme kahrehda e kesempwal en kapwungala nanpwungen kowe oh riomw Kristian men me nsensuwedla?

• Ia duwen atail kak liksang lohdiong nan dihp pwehki “palimaun en pwoaren mesomwen”?

• Ia pahn mwomwen atail wiewia me pid kihkihwei?

[Kawehwehpen kilel kan nan ehu ehu pali 15]

Ia uwen mwahu en “kapwungala nanpwungen” kowe oh riomw Kristian men!

[Kawehwehpen kilel kan nan ehu ehu pali 17]

Siohwa kin kapaiada me kin perenki kihkihwei