Ihs Koht?
IA DUWEN ke pahn sapengla peidek wet? Ekei kin medewe me re uhdahn ese Koht, oh e wia kompoakparail men. Aramas akan kin kamehlele me mie Koht, oh re kin poadidi ong ih oh pil lemmwiki ih. Ahpw pali laud en irail sohte uhdahn ese ihs ih. Ma ke kin kamehlele Koht, ia duwen ke pahn sapengla peidek pwukat me kileldi pah?
1. Koht kin ketiket wasa koaros?
2. Mie mwaren Koht?
3. Sises iei Koht Wasa Lapalahpie?
4. Koht kin ketin nsenohkin ie?
5. Koht kin kupwurki pelien lamalam koaros?
Ma ke pahn idek peidek pwukat rehn meteikan, ke pahn alehdi soangsoangen pasapeng tohto. Kahrehda, e sohte kapwuriamwei me soai kan oh lamalam sapwung kan me pid Koht kin kalapw pwarada.
Pasapeng en Peidek Pwukat Inenen Kesempwal
Ni e mahmahsaniong lih emen me kin kamehlele Koht limwahn pwarer ehu, Sises Krais ketin kasalehda ni sansal duwen anahnepen en uhdahn esehla ihs Koht. Lih en Sameria menet kin pohnese me Sises wie emen soukohp. Ahpw mie mehkot me liho sohte wehwehki. Sapwellimen Sises pelien lamalam weksang ahn liho. Ni e kasalehda met, Sises mahsanihong ih: “Kumwail mehn Sameria kan sohte ese ihs me kumwail kin kaudokiong.” (Sohn 4:19-22) Met sansal me Sises kin ketin padahngki me kaidehn aramas koaros me kin kamehlele Koht kin uhdahn ese ih.
Ia duwe, sapwellimen Sises mahsen pwukat kin wehwehki me sohte me kak uhdahn esehla Koht? Soh. Sises ketin doula mahsanihong lih menet: “Tohn kaudok mehlel kan pahn kaudokiong Sahmo ni ngehn oh mehlel, pwe iei soangen tohn kaudok kan me Sahmo ketin kupwurki en kaudokiong ih.” (Sohn 4:23) Ia duwe, kowe emen me kin kaudokiong Koht ni “mehlel”?
E inenen kesempwal en ese pwung en pasapeng wet. Dahme kahrehda? Sises ketin kasalehda ni sansal anahnepen alehda loalokong pwung ni eh ketin loulou mahsanih: “Oh iet mour: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.” (Sohn 17:3) Ei, ahmw mour ni ahnsou kohkohdo kin pidada laud ahmw esehla dahme mehlel duwen Koht!
Ia duwe, ke uhdahn kak esehla dahme mehlel duwen Koht? Ei, uhdahn! Eri, ia duwen ke kak wia met? Sises mahsanih duwen ih: “Ngehi me ahl, ngehi me mehlel, ngehi me mour; sohte me kak kolahng Semei ma soh ngehi.” (Sohn 14:6) E pil mahsanih: “Sohte emen ese duwen Sahm, pwe Sapwellimen Kohtohte, oh irail kan me Sapwellimen Kohto ketin kupwurki en kasalehiong.”—Luk 10:22.
Eri, mahsen kan en sapwellimen Koht Ohl, Sises Krais, iei ahl en esehla Koht. Ni mehlel, Sises ketin inoukihong kitail: “Ma kumwail pahn peikiong ei padahk kan, kumwail uhdahn pahn wiahla nei tohnpadahk mehlel. Oh kumwail pahn dehdehki dahme mehlel, oh me mehlelo pahn kasaledengkumwailla.”—Sohn 8:31, 32.
Eri, ia duwen Sises pahn ketin sapengla peidek limau me kileldi powe?
[Kawehwehpen kilel kan nan ehu ehu pali 4]
Ke kin kaudokiong Koht men me ke sohte nohn ese?