Koht Kin Ketiket Wasa Koaros?
Pasapeng kan me kalapw kohda:
◼ “E ketiket wasa koaros oh pil mi nan soahng koaros. E duwehte kisinieng.”
◼ “Ih kehl lapalap ehu me sohte dehde de sansal ong aramas.”
Dahme Sises mahsanih?
◼ “Pere tohto mie nan tehnpesen Semei.” (Sohn 14:2) Sises mahsanih ni karasaras me mie tehnpesen Semeo.
◼ “I kohdo sang rehn Sahmo, oh kodohngehr sampah. Eri, met I pahn mweselsangehr sampah oh kolahng rehn Sahmo.” (Sohn 16:28) Sises kin ketin kamehlele me Koht kaidehn kehl ehu me kin ketiket wasa koaros ahpw mie tehnpese.
SOHTE pak ehu me Sises mahsanih me sohte kahlap en Koht. Weksang met, e kin mahsen ong Seme oh pil kapakap ong ih. E kin kalapw likwerihki Siohwa Seme me ketiket nanleng ni ahl ehu me kasalehda me nanpwungara uhdahn kerenpene.—Sohn 8:19, 38, 54.
Mehlel me “sohte me kin kilangki Koht mese” oh me “ngehn ehu Koht.” (Sohn 1:18; 4:24) Ahpw met sohte wehwehki me Koht sohte sapwellimaniki kahlap ehu. Paipel mahsanih: “Pwe ma mie paliwar me kisehn pwehl, eri, e uhdahn pil mie paliwar me kisehn ngehn.” (1 Korint 15:44) Eri ia duwe, Siohwa sapwellimaniki kahlap en ngehn ehu?
Ei. Ni en Sises ketin iasada, “e ketilong nanleng, wasa e ketiket ie ahnsou wet mwohn silangin Koht pwehn sewesei kitail.” (Ipru 9:24) Met padahkihong kitail ire kesempwal riau duwen Koht. Keieu, mie wasa me e kin ketiket ie. Keriau, kaidehn ih kehl ehu me kin ketiket wasa koaros.
Eri, ia duwen Koht kak sapwellimaniki kehl en wia soahng koaros? Koht kin kak ketikihwei sapwellime manaman de kehl, wasa koaros me e kupwurki. Duwehte pahpa men me kin kapahwei peh kan pwehn kansenamwahwih oh pil sewese nah seri kan, Koht pil kin ketin kapahwei sapwellime manaman pwehn kapwaiada kupwure.—Melkahka 104:30; 139:7.
Koht sapwellimaniki irair kan me kin kasalehda soahng kan me e kupwurki oh pil soahng kan me e sohte kupwurki, pil mie sapwellime pepehm kan. Paipel mahsanihong kitail me e kin ketin poakohng sapwellime aramas akan, kupwurperenki sapwellime doadoahk, kalahdeki me kin pwongih dikedik kan, oh kin pil kupwur toutoukihla soahng suwed kan. (Senesis 6:6; Deuderonomi 16:22; 1 Nanmwarki 10:9; Melkahka 104:31) Nan 1 Timoty 1:11, mahsanih me ih iei “Koht kalahngan.” Ihme kahrehda Sises mahsanih me kitail kak sukuhlki en esehla limpoak ong Koht ki mohngiong unsek.—Mark 12:30.a
[Nting tikitik me mi pah]
a Pwehn kalaudehla omw wehwehki ire wet, kilang pwuhken Dahme Paipel Uhdahn Padahngki? (What Does the Bible Really Teach?) me Sounkadehde Siohwa kan wiahda.
[Kawehwehpen kilel kan nan ehu ehu pali 5]
Duwehte pahpa men me kin kapahwei peh kan, Koht kin kapahwei sapwellime manaman pwehn kapwaiada kupwure