Soai Keweneu: Dene Koht Kupwurki Aramas en Doadoahngki Dikedik De Sansal Nan Kaudok
Ia wasa me soai wet tepisang ie? Pwuhk ehu koasoia: “Tepin Kristian akan sohte kin doadoahngki dikedik de sansal kan nan arail kaudok . . . Sangete pahr 300 samwa lel 400 samwa, mweimweidahn doadoahngki dikedik de sansal kan nan mwomwohdiso wiawi pwehki dene met pahn sewese aramas mwahusang kapahrek de pwuhk kan pwe irail me rotorot kan en kak wehwehkihla padahk kan en Kristian.”—Cyclopedia of Biblical, Theological, and Ecclesiastical Literature, sang McClintock oh Strong, Volume 4, pali 503 oh 504.
Dahme Paipel mahsanih? “Kumwail sohte pahn wiahiong kumwail dikedik en eni de sansal en mehkot me mi pahnlahng, de nin sampah, de nan pihl kan pahn sampah. Kumwail sohte pahn poaridiong dikedik en eni men de pwongih.” (Eksodus 20:4, 5) Wahnpoaron Pohl ntingkihlahng tepin Kristian akan: “Eri, kompoakepahi ko, kumwail kadohwaneweisang kumwail tiahk en pwongih dikedik en eni kan.”—1 Korint 10:14.
Pelien lamalam kan kin koasoia me dikedik de sansal kan kin wia wiliepen soahng me re kin kaudokiong oh soahng pwukat kin ongete sewese irail en karanih oh kawauwih. Met mehlel? Ehu dikseneri koasoia: “Nin tapio sansal kan kin wiahte mehn kasukuhl oh kapwat kan. Ih mwomwen arail kin kawehwe. Ahpw mwuhr mepwukat tapiada wiahla mehn kaudok kei. Met keieu mehlel rehn pelien lamalam en Eastern Orthodoxy me sansal kan wialahr mehkot me inenen kesempwal nan arail kaudok.” (The Encyclopedia of Religion) Ahpw, dahme soukohp Aiseia peidengki me pwung: “Eri, ihs me kumwail kak karasahiong atail Koht? Ia duwen amwail pahn koasoiahda mwomwe?”—Aiseia 40:18.
Menlau pil tehk iren Paipel pwukat: Aiseia 44:13-19; Wiewia 10:25, 26; 17:29; 2 Korint 5:7
IRE MEHLEL:
Koht sohte kupwurki aramas en doadoahngki dikedik de sansal
SOIKEWEISANG REHMWAIL SOAI LIKAMW KAN, TENGEDIONG PADAHK MEHLEL
Eri dahme kitail pahn medewehki soai pwukat me pelien lamalam tohto rahnpwukat kin wie padapadahngkihte? ‘Soai likamw’ pwukat sohte kak pahrekiong padahk mehlel kan en Paipel me mengei en wehwehki oh me kin wahdo kamweit.—2 Piter 1:16.
Ihme kahrehda, ieremen mwadang koasoanehdi dahme ke men kamehlele. Dehr peikasalki ahpw tehk dahme Mahsen en Koht kin mahsanih ma e pahrekiong dahme ke kin kamehlele sangete mahs pwehki iei ih poahsoanpen padahk mehlel. (Sohn 17:17) Omw wia met kak kahrehda ken kamehlele inou wet: “Oh kumwail pahn dehdehki dahme mehlel, oh me mehlelo pahn kasaledengkumwailla.”—Sohn 8:32.
[Kawehwehpen kilel kan nan ehu ehu pali 9]
Pictorial Archive (Near Eastern History) Est.